Il november 2004 han il pievel ed ils chantuns acceptà la refurma da la gulivaziun da finanzas e da la reparIl november 2004 han il pievel ed ils chantuns acceptà la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) cun ina maioritad da 64 pertschient da las vuschs (basa constituziunala e lescha davart la gulivaziun da las grevezzas). En la sessiun d'october 2006 han las chombras federalas relaschà la legislaziun executiva federala (differentas leschas spezialas). Sco tut ils auters chantuns ha er il chantun Grischun adattà sia legislaziun a la NGF. La NGF vegn introducida l'onn 2008 tar la confederaziun e tar ils chantuns.

Las incumbensas tranter la confederaziun ed ils chantuns duain vegnir separadas tenor pussaivladad ed a moda raschunaivla, e la gulivaziun da finanzas duai vegnir concepida a moda simpla, transparenta, efficazia e dirigibla. Tras quai vegnan rinforzads la confederaziun ed ils chantuns. I vegnan creadas novas libertads d'agir ed i vegn sminuida la differenza tranter ils chantuns cun finanzas fermas e quels cun finanzas deblas.

Tschintg instruments innovativs
La NGF sa basa sin 5 pitgas: 

• separaziun da las incumbensas tranter la confederaziun ed ils chantuns
• ina collavuraziun pli stretga tranter ils chantuns cun gulivaziun da las grevezzas
• novas furmas da collavuraziun e da finanziaziun tranter la confederaziun ed ils chantuns
• nova gulivaziun da las resursas tranter la confederaziun ed ils chantuns cun finanzas fermas d'ina vart ed ils chantuns cun finanzas deblas da l'autra vart
• indemnisaziuns da la confederaziun per grevezzas spezialas dals chantuns dal center e dals chantuns da muntogna

Noss chantun è actualmain fitg dependent da la confederaziun; quai n'è betg il cas mo tar incumbensas, per las qualas la confederaziun è primarmain cumpetenta, sco tar il militar, tar l'agricultura e tar las vias naziunalas, mabain er en secturs d'incumbensas chantunalas fitg impurtantas sco tar il guaud, tar las vias principalas, tar ils stabiliments per dismetter ruments, tar las sereneras, tar l'agid da vegliadetgna, tar la protecziun civila e tar la scolaziun speziala. Totalmain survegn il Grischun annualmain circa 1 milliarda francs da la confederaziun. Quai correspunda a ca. 50 % da nossas entradas totalas.

Ulteriuras infurmaziuns
Urs Brasser, tel. 081 / 257 32 12, mail: urs.brasser@dfg.gr.ch