Dumonda Pfiffner concernent la liberaziun da taglia per interpresas
Sessiun: 13.06.2006
La liberaziun da taglia per las interpresas che sa domicilieschan da nov u per manaschis existents che midan la branscha da producziun vegn pratitgada savens. Ella vegn resguardada – parallelmain a las pussaivladads da la lescha per promover il svilup economic – sco instrument impurtant per promover l'economia e per crear plazzas da lavur. Cun quests dus instruments sa tschentan dumondas dal tractament egual dals manaschis dentant er da la transparenza en connex cun ils meds da promoziun impundids.
Perquai supplitgain nus la regenza da respunder las suandantas dumondas:
1. Co è sa sviluppada la summa totala da las liberaziuns da taglia che vegnan concedidas annualmain ad interpresas ils ultims 10 onns?
2. Tge gener resp. tge dimensiun da manaschis ha pudì profitar ils ultims onns il pli fitg da talas liberaziuns da taglia?
3. Co giuditgescha la regenza da princip la cumbinaziun da contribuziuns da promoziun (tenor la lescha per promover il svilup economic) e da la liberaziun da taglia?
4. Tenor tge criteris vegn applitgada la cumbinaziun da daners da promoziun (contribuziuns) e da liberaziuns da taglia?
5. Co vegn garantì in tractament egual general per manaschis en il chantun Grischun tar las liberaziuns da taglia per "novas branschas da producziun"?
6. Co vegn controllada l'attribuziun correcta resp. la cunfinaziun dals resultats dals manaschis areguard las branschas da producziun liberadas da la taglia tar manaschis usitads ch'èn obligads da pajar taglia?
Cuira, ils 13 da zercladur 2006
Name: Pfiffner, Jaag, Bucher-Brini, Arquint, Baselgia, Frigg, Jäger, Meyer Persili (Cuira), Peyer, Pfenninger, Schütz, Trepp, Zindel, Caviezel
Session: 13.06.2006
Vorstoss: rg Anfrage
Resposta da la regenza
Per lantschar novs roms da producziun po la regenza tenor l'art. 5 LT suenter avair consultà las vischnancas participadas ed en l'interess da l'economia publica grischuna conceder ad interpresas novas u existentas levgiaments fiscals per maximalmain diesch onns. L'interess da l'economia publica vegn resguarda en quest connex en emprima lingia las plazzas da lavur che pon vegnir creadas e las investiziuns che ston vegnir fatgas. En quest connex vegni dà dapli pais a las investiziuns en las regiuns periferas che a quellas en ils centers. Cun conceder in levgiament fiscal duai la domiciliaziun da novas interpresas vegnir facilitada e la creaziun da plazzas da lavur a lunga vista vegnir segirada.
Las differentas dumondas po la regenza respunder sco suonda:
1. La summa totala dals levgiaments fiscals ha importà l'onn 1995 1,36 milliuns francs. L'onn 2000 è ella s'augmentada a 4,94 milliuns francs e l'onn 2004 ha ella impurtà 7,48 milliuns francs. Ils retgavs fiscals numnads cumpiglian la taglia chantunala, la taglia supplementara e la taglia da cultus.
2. Levgiaments fiscals pon vegnir garantids tranter auter, sche la domiciliaziun d'ina nova interpresa è en l'interess da l'economia publica. Quel dependa dal dumber da las plazzas da lavur che pon vegnir creadas e da l'impurtanza per la regiun sco er da las investiziuns.
Tut tenor la regiun datti uschia areguard la dimensiun da l'interpresa differentas premissas per conceder in levgiament fiscal.
Ils levgiaments fiscals vegnan concedids en emprima lingia ad interpresas da producziun. En cas singuls po dentant er ina interpresa dal sectur da servetsch ademplir las premissas da l'art. 5 LT.
3. La regenza beneventescha sch'i vegnan applitgads differents instruments per cuntanscher ina finamira. Las contribuziuns da promoziun fan perquai lur effect plitost en la fasa iniziala, cur ch'i sa tracta da metter en pe l'interpresa. Ils levgiaments fiscals mussan savens lur effects pir suenter in pèr onns, cur che l'interpresa entra suenter la fasa iniziala en la fasa da gudogn.
4. Da princip èsi il pli impurtant ch'il project saja en l'interess da l'economia publica grischuna. Questa premissa vegn examinada da l'administraziun da taglia en collavuraziun cun l'uffizi per economia e turissem. Per conceder contribuziuns resp. levgiaments fiscals valan ils medems criteris. Quai vul dir en il cas concret ch'i stoppian vegnir creadas plazzas da lavur e ch'i stoppian vegnir fatgas investiziuns.
5. In levgiament fiscal è exclus, sche la nova interpresa concurrenzescha autras interpresas en il chantun ch'èn suttamessas cumplettamain a la taglia. Uschia vegn garantì in tractament egual da las interpresas. Ultra da quai vegnan fatgas grondas pretensiuns a la concepziun da la nova branscha da producziun. Mo là, nua ch'i vegn sviluppà in product dal tuttafatg nov, in novum tecnologic, po in levgiament fiscal insumma vegnir tratg en consideraziun. I va qua a la fin per il tractament egual da las interpresas grischunas cun interpresas che sa domicilieschan da nov. Per la medema novaziun innovativa duai en domaduas constellaziuns vegnir concedì il medem tractament fiscal. I duai er vegnir evità ch'ina interpresa grischuna sa domicilieschan cun ina nova branscha da producziun en in chantun vischin, perquai ch'ella survegn là in levgiament fiscal.
6. Interpresas cun ina branscha da producziun ch'è deliberada da la taglia ston manar in quint separà, en il qual i ston vegnir preschantads separadamain tut ils custs e tut ils gudogns da la sparta. Quests quints separads vegnan examinadas detagliadamain da l'administraziun da taglia. Ultra da quai servan els a giuditgar la prestaziun dal management e vegnan gia pervia da quest motiv manads correctamain.
Datum: 11 da settember 2006