Gea a la libertad da navigaziun, dentant senza negliger la natira e l'ambient
La lescha federala davart la navigaziun cumpiglia il princip che la navigaziun sin tut las auas publicas è libra. Sco excepziun dastgan ils chantuns bain relaschar restricziuns, dentant be cur ch'i dat in interess public u sche quai è necessari pervia da la protecziun da bains giuridics impurtants. L'ordinaziun executiva a la lescha federala davart la navigaziun interna che vala oz en il chantun Grischun è vegnida relaschada dal cussegl grond il 1. d'october 1980. Cuntrari a la lescha federala determinescha ella che la navigaziun sin flums, auas currentas accumuladas, chanals ed uals en il Grischun è da princip scumandada. Exceptads èn sulettamain bartgas a pala ed autras bartgas senza motor u vela. Quai stat en contradicziun cun las directivas stringentas dal dretg federal. La nova lescha introductiva a la lescha federala davart la navigaziun interna (LI a la LNI) vul uss coordinar il dretg chantunal cun il dretg federal ed abrogar uschia il scumond da navigaziun en general. Quai na vul dentant betg dir ch'i duai dar en il futur ina libertad absoluta da navigaziun en il Grischun. Là nua che motivs da protecziun da la natira e da l'ambient pretendan quai, duai valair vinavant il scumond da navigar sin auas currentas cun tschertas categorias da bartgas. Questas auas currentas vegnan enumeradas individualmain en il decret nov.

Directivas per viadis commerzials cun bartgas da gumma (river-rafting)
Durant las bellas fins d'emna da stad regia sin numerus flums grischuns in grond traffic da bartgas. I sa chapescha da sasez che quai ha consequenzas per la natira e l'ambient. Perquai èsi necessari da suttametter a tschertas restricziuns oravant tut il rafting commerzial. Uschia han la flora e la fauna temp da sa recrear. Correspundentamain prevesa la lescha nova da limitar viadis commerzials cun bartgas da gumma da princip sin il temp tranter ils 15 da matg ed ils 30 da settember. Sin singulas auas currentas e singuls trajects enumerads individualmain dastga vegnir navigà excepziunalmain dal 1. da matg fin la davosa fin d'emna d'october. Il manaschi da rafting è mintgamai permiss tranter las 9 e las 19, e l'entschatta e la fin dals viadis sco era las pausas e l'alimentaziun dastgan be succeder als lieus permiss per quest intent. Per proteger ils utschels vala finalmain in scumond strict d'ir a riva sper inslas en il flum e da metter pe sin questas.

Ina decisiun tant en favur dal turissem sco er da la protecziun da la natira e da l'ambient
La lescha introductiva a la lescha federala davart la navigaziun interna vegn beneventada fitg tant dal cussegl grond sco er da la regenza e merita grond sustegn. Surtut la coordinaziun reussida da basegns dal turissem cun quels da la protecziun da la natira e da l'ambient garantescha ch'ils interess da tut las burgaisas e da tut ils burgais ch'èn da respectar en il rom dal dretg federal vegnan observads. En num da la regenza e dal cussegl grond As invid jau d'avrir la via ad ina reglamentaziun orientada vers il futur da la navigaziun cun in "GEA" persvadì.

Gremi: president da la regenza
Funtauna: rg president da la regenza