Mars 2024 Revisiun dal plan sectorial velo dal chantun Grischun approvada La regenza ha approvà ils 23 da schaner 2024 la revisiun dal text dal plan sectorial velo dal chantun Grischun che remplazza il plan sectorial da l’onn 2019. Cun il plan sectorial velo stgaffescha il chantun Grischun las basas da planisaziun per promover durablamain il velo sco med da traffic favuraivel a l’ambient, effizient e saun per il traffic da mintga di e dal temp liber. En il plan sectorial vegnan reglads ils decurs e la participaziun finanziala dal chantun a moda transparenta e la rait da velo d’impurtanza chantunala vegn registrada. Qua chattais Vus il download tudestg (rumantsch e talian davent dal matg 2024) Proxim lavuratori d’OKR* da graubünden Bike a Flem Laax graubünden Bike è plain schlantsch e l’onn 2024 ha gia manà svilups interessants per il project. Lavuratoris èn l’element central da graubünden Bike – els èn ina plattafurma, nua ch’ideas vegnan profundadas e mesiras concretisadas. Perquai envidain nus cordialmain al proxim lavuratori d’ORK ils 7 da zercladur 2024 a Flem Laax. Vus As pudais annunziar online a partir d’immediat – segirai Vossa plazza sur quest link. Il lavuratori ha lieu da las 9 a las 13 uras. Suenter envidain nus ad ina tura da velo da muntogna. In bigliet da teleferica vegn regalà a mintgin ch’ha plaschair e temp. Faschai il bain da notar en Voss chalender er ils termins per ils lavuratoris che suondan: • venderdi, ils 6 da settember 2024 • venderdi, ils 6 da december 2024 Nus ans legrain da beneventar Vus ad in da noss lavuratoris d’OKR per concepir cuminaivlamain la via ad in project da graubünden Bike plain success. *Objectives and Key Results Scolaziun professiunala davart il mantegniment da vias Il project graubünden Bike porscha ina nova furmaziun supplementara per augmentar la qualitad e la segirezza da trails da velo da muntogna. Il program che consista d’in curs per principiants e d’in curs per avanzads intermediescha tranter auter ina savida fundada davart praticas da mantegniment persistentas, davart il manaschament da l’aua ed er davart la coexistenza sin la rait da vias. Prendai l’occasiun da scolar Voss responsabels per il mantegniment da las vias ad experts cun certificat naziunal e d’augmentar cun quai la cumpetenza specifica da Vossa squadra. Daventar lieu d’execuziun: Sco lieu ospitant profitais Vus – sper la curta via d’arrivada e da partenza – d’exempels pratics specifics per quel lieu, da lavur da mantegniment locala, da la rait regiunala e da pussaivladads da marketing turisticas. Interessà? Intervegnì dapli davart las cundiziuns da participaziun, il program dal curs, las datas ed ils lieus d’execuziun qua. Optimai ensemen cun nus ils trails en il Grischun! graubünden Trailrun – rapport annual 2023 Il rapport annual dal project da la NPR* graubünden Trailrun è puspè vegnì realisà per l’ultim onn da project 2023 en furma digitala. Questa furma moderna da la documentaziun da projects renda accessiblas las finamiras parzialas dal project ad in vast public e contribuescha uschia al schlargiament da la communitad dals curridurs da trail. Il rapport è repartì en totalmain 11 chapitels e dat invista en il mund captivant dal currer trails en il chantun Grischun. Cun il rapport annual va a fin il project da la NPR. Las investiziuns fatgas èn sa cumprovadas e la collavuraziun suror las destinaziuns e coordinada centralmain è vegnida stimada fitg dals participants. Ina cuntinuaziun adequata da la tgira da quel sport è ussa centrala per pudair sviluppar vinavant il segment a moda duraivla ed a lunga vista. * Nova politica regiunala L’uniun «graubünden Trailrun» vegn fundada Suenter ch’il svilup dal sport da currer trails (trailrunning) ha pudì vegnir finanzià e manischà ils ultims quatter onns sur il project da la NPR, èn neccessarias novas structuras suenter la finiziun dal project. La basa erigida fundadamain duai durar er suenter la fin dal project e las mesiras introducidas duain vegnir tgiradas e realisadas vinavant. Per quel motiv vegn fundada l’uniun «graubünden Trailrun» che coordinescha tut ils giavischs e las dumondas en il sectur dal currer trails en il chantun Grischun e che structurescha tant las activitads sco er las mesiras. En quella moda pon vegnir tratgas a niz sinergias e rinforzada la communitad. Curriduras e curridurs da trail pon far part da l’uniun precis tant activamain sco destinaziuns turisticas, organisaziuns d’events, guids, affars da sport u purschiders da turas. Registrar ussa e furmar, promover e rinforzar cuminaivlamain il svilup dal trailrunning!Infos ed annunzia qua. Mobilitad en il Grischun – cumportament da la populaziun grischuna en il traffic Il chantun Grischun è puspè sa participà l’onn 2021 cun in augment da controllas a la microretschertga davart mobilitad e traffic organisada da la Confederaziun, Sin basa da quella èn plirs aspects dal cumportament da traffic da la populaziun grischuna vegnids registrads ed evaluads, Il resultat mussa differenzas internas entaifer il chantun e fa er conguals cun ils resultats naziunals. Er sche tscherts resultats èn vegnids influenzads da la pandemia da Covid, cumparegliaziuns cun auters onns n’èn perquai betg pussaivlas senza resalva, pon ins tuttina observar intginas tendenzas interessantas. Legiai qua dapli davart il tema. Uffizi da construcziun bassa, Traffic betg motorisà Loëstrasse 14, CH-7001 Chur flv@tba.gr.ch  •  Pagina-web © 2024 Uffizi da construcziun bassa, Traffic betg motorisà. Tut ils dretgs resalvads.

In Shared Service da Graubünden Ferien