| Cun la fin dal project graubünden Trailrun èsi er pussaivel da guardar enavos sin in viadi inspirant da quatter onns, ch’ha posiziunà il Grischun durablamain sco hotspot dal currer trails en la regiun alpina europeana da lingua tudestga. La planisaziun e realisaziun premurusa da las bleras mesiras n’han betg mo consolidà il currer trails sco sport, mabain er rinforzà la creaziun da valur locala ed il sentiment da solidaritad. Per mantegnair la basa stgaffida dal project e per cuntinuar cun las mesiras introducidas er suenter sia fin, è vegnì fundà il mars 2024 l’uniun graubünden Trailrun. Quest’uniun vegn a coordinar en futur tut ils giavischs e las dumondas en il sectur dal currer trails en il chantun Grischun, concentrar las activitads e las mesiras ed utilisar cun quai sinergias resp. rinforzar vinavant la communitad. E l’uniun crescha vinavant – fin ussa èn registrads 86 commembers, tranter quels otg destinaziuns, diesch events, quatter guids ed in affar da sport. |
