| Dieta traffic betg motorisà |
Il tema dal di da la dieta da quest onn sa numnà «mobilitad concreta». As laschai inspirar da referats interessants, actualisaziuns da projects concrets ed intervistas. En occasiun da la dieta da quest onn survegnis Vus infurmaziuns dals trais blocs tematics traffic da bike/traffic da velo, traffic da viandar/peduns e traffic public. I spetgan inputs captivants, mainsvart er da la cussegliera guvernativa dr. Carmelia Maissen. Cun referats infurmativs, tranter auter tar graubünden Bike, cun in’actualisaziun dal model da cumparter bikes Mooinz e dal sistem da reservar velos tar AutoDaPosta Grischun sco er in update da l’administraziun da donns da vias amplifitgais Vus Vossa savida davart il tema traffic betg motorisà. Curts projects da pitch tar Hikeo, currer trails en Grischun e fairtrail mainan variaziun en il program. Sin la pagina d’internet da la dieta chattais Vus sper infurmaziuns actualas er impressiuns e documents da las dietas dals davos onns. La participaziun è gratuita, il termin d’annunzia è ils 11 d’october 2024.
Tar l‘annunzia |
|
|
| Bikesharing a Cuira cumplettà – ulteriuras vischnancas pon far part |
Suenter in’emprova da pilot gartegiada è la rait da cumparter bikes «Mooinz» a Cuira vegnida extendida a 20 staziuns. Nov fan er cargobikes part da l’offerta. Mess a disposiziun vegnan ils velos da ‘nextbike’. Mooinz vegn sustegnì vinavant da plirs partenaris al lieu e coordinà da l’uniun Pro Velo Grischun. Quest partenadi da finanziaziun innovativ public-privat è unic en Svizra, el è vegnì distinguì da la Confederaziun. Per ina logistica equilibrada, per midar ils accus dals e-bikes sco er per controllas e reparaturas pissera la fundaziun integrativa Feschtland da Cuira. Fin la fin dal 2024 vegnan vitiers anc dapli velos ed er offertas cumbinadas per abunaments da traffic public. Offertas spezialas per il turissem existan gia, minutas gratuitas per indigens vegnan examinadas.
Pro Velo Grischun sa legra sin ina collavuraziun cun ulteriuras vischnancas da l’entir chantun Grischun: Il success dal cumparter bikes na duai betg sa restrenscher sin Cuira! Ans contactai senza obligaziun.
Infos
Contact
|
|
|
| Fin uffiziala dal project graubünden Trailrun finanzià cun agid da daners da la NPR |
Cun far ils documents finals ha il project da quatter onns pudì vegnir terminà cun success. Tras quai èsi er pussaivel da dar in’egliada enavos sin in viadi inspirant da quatter onns, ch’ha posiziunà il Grischun persistentamain sco hotspot dal currer trails en il spazi alpin da lingua tudestga. La planisaziun e realisaziun premurusa da las bleras mesiras n’han betg mo rinforzà il currer trails sco sport, mabain er fortifitgà la valur locala ed il spiert da cuminanza. Per mantegnair la basa fundada dal project e per cuntinuar cun las mesiras introducidas er suenter sia fin, è vegnida fundada il mars 2024 l’uniun graubünden Trailrun. Questa uniun coordinescha da nov tut ils giavischs e las dumondas en il sectur dal currer trails en il chantun Grischun, structurescha tant las activitads sco er las mesiras, nizzegia sinergias e rinforza vinavant la communitad.
Vulessas Vus vegnir a savair dapli dal svilup e dals terms cuntanschids? Alura guardai ils suandants documents!
|
|
|
| La campagna da fairtrail 2024 ha cumenzà |
Fairdinands repartan diligentamain zainets e zucher d’ivas. En pli vegn lavurà bler davostiers per modernisar la cumparsa da fairtrail a partir dal 2025: Nov vegn rendì attent bler pli ferm, sper la coexistenza tranter viandants, bikeras e curridurs da trail, er ad ina demananza plain resguard envers l’ambient. Per elavurar quels messadis datti actualmain plirs workshops.
Dasperas vulain nus rinforzar il barat cun ils purtaders da prestaziuns, ustieras, alpegiants, guids etc. ch’enconuschan numnadamain il pli bain ils process e basegns al lieu. Cun nossa nova newsletter survegnis Vus novitads actualas d’emprim maun ed As pudais far valair activamain entaifer il svilup da fairtrail. S’annunziai qua e derasai il link en Vossa regiun / destinaziun. |
|
|
| Promoziun da sendas da viandar tras Sendas svizras |
L’uniun Sendas svizras è l’organisaziun tetgala da las 26 organisaziuns da sendas da viandar chantunalas da la Svizra (t.a. Sendas grischunas). Ella porscha cun projects da sendas da viandar attractivs pussaivladads da promoziun interessantas. Cun il fond da sendas da viandar, il fond da la Mobiliar punts & sendas ed il premi da promoziun da la posta vegnan sustegnids projects elegids che garanteschan sendas da buna qualitad. En pli distingua il Prix Rando projects da sendas da viandar construidas da nov ch’adempleschan ina u pliras miras da qualitad da las Sendas svizras en moda excellenta. Nov vegn lantschada tar il premi da promoziun da la posta er ina ediziun d’enviern. Il termin d’annunzia per publitgar la premiera cuzza anc fin ils 31 d’avust 2024. Tut ils detagls chatt’ins sin la pagina d’internet da las Sendas svizras.
Illustraziun: Surdada dal premi da promoziun da la posta 2024 a la Val Müstair. © Sendas grischunas |
|
|
| Proxim workshop da graubünden Bike a La Punt |
Il proxim workshop da OKR* ha lieu ils 6 da settember 2024 da las 9 a las 13 uras a La Punt. L’emprima part dal workshop tracta il stadi actual da las mesiras currentas. Durant la segunda part lavurain nus vi da las mesiras ch’èn en svilup sco er vi da novas ideas. Per insatge da mangiar vegni pisserà. E per tut quels ch’han temp e gust, datti suenter ina runda dal suentermezdi sin il velo. Qua vai tar l’annunzia.
*Metoda OKR (Objektives and Key Results) è in’ovra generala per diriger il svilup interprendent e per realisar la strategia. |
|
|
| Ultim curs da mantegniment da graubünden Bike per quest onn |
Ils 7 ed 8 d‘october ha lieu il curs da mantegniment final da graubünden Bike per quest onn. Quest curs da dus dis per persunas avanzadas sa drizza a tut quels ch’èn incaricads cun il mantegniment en il chantun Grischun, ch’han fatg cun success il curs da basa e rimnà almain 30 experientscha pratica.
Il curs tracta ils suandants temas en moda approfundada: responsabladad, signalisaziun, tecnica da far curvas, stabilisaziun dal terren, management d’aua ed il mantegniment da construcziuns artifizialas.
Prendai la pussaivladad d’approfundir Vossa savida e da sa preparar optimalmain per las lavur da mantegniment vegnentas. Tut las infurmaziuns davart il curs chattais Vus qua. |
|
|
| Novs curs a l‘Allegra Academy |
| Per tut quels che stattan en contact direct cun giasts da Bike datti trais novs curs a l’Allegra Academy. Els intermedieschan la basa la pli impurtanta, d’infurmaziuns da rutina fin a basegns dals giasts. Ils curs èn vinavant gratuits per tut las Grischunas e tut ils Grischuns. Grazia che Vus partis questa offerta cun ils partenaris/las partenarias en Vossa regiun. |
|
|
| © 2024 Uffizi da construcziun bassa, Traffic betg motorisà. Tut ils dretgs resalvads. |
|
|
