| Fatschas novas tar il post spezialisà per il traffic betg motorisà |
Dapi questa primavaira èn tar l’Uffizi da construcziun bassa dal Grischun sco post spezialisà per il traffic betg motorisà duas novas persunas responsablas per il traffic da peduns e da velo, numnadamain Michael Christ e Christoph Oetiker. Gia dapi l’atun 2023 è Andrea Strub da la partida. Quels trais èn il nov team che s’occupa sin nivel chantunal da las differentas dumondas dal traffic da peduns e da velo. Michael Christ è la persuna da contact principala per il traffic da temp liber, cun il focus sin spazis orientads a l’abitadi ed urbans. Andrea Strub sa fatschenta da las dumondas dal traffic dal mintgadi, cun il focus sin spazis orientads a l’abitadi ed urbans. Christoph Oetiker è il nov manader da la gruppa ed elavura differents temas dal traffic da peduns e da velo. Tuts trais s’occupan a moda globalisada e cumplessiva dal traffic da peduns e da velo e sa legran da vegnir en contact cun regiuns, destinaziuns, vischnancas, organisaziuns spezialisadas, uffizis chantunals ed auters partenaris.
Il manader da fin qua, Claus Caluori, va la stad 2025 en pensiun. Fin là vegn el a tgirar projects currents ed a garantir ina surdada d’uffizi speditiva.
Illustraziun: Il team dal traffic betg motorisà (da s. a d.: Michael Christ, Christoph Oetiker, Claus Caluori, Andrea Strub) |
|
|
| Dieta davart il traffic betg motorisà ils 31. d’october 2024 |
Il tema dal di da la dieta da quest onn sa numnà «mobilitad concreta». As laschai inspirar da referats interessants e d’actualisaziuns da projects concrets grischuns.
Data: gievgia, ils 31 d’october 2024
Lieu: Auditori da la Banca chantunala grischuna BCG a Cuira
Temp: da las 9 a las 16 uras
En occasiun da la dieta da quest onn survegnis Vus infurmaziuns dals trais blocs tematics traffic da bike/traffic da velo, traffic da viandar/peduns e traffic public. I dat in’intervista interessanta cun la cussegliera guvernativa dr. Carmelia Maissen davart il traffic betg motorisà. Amplifitgai Vossa savida davart quel tema. Las pausas tranteren dattan als participants l’occasiun da barattar lur experientschas relevantas.
Sin la pagina d’internet davart la dieta chattais Vus tant il program sco er impressiuns e documents da las davosas dietas.
S’annunziai anc oz a la dieta davart il traffic betg motorisà: annunzia online. La participaziun è gratuita. Termin d’annunzia è ils 11 d’october 2024.
|
|
|
| Open Space graubünden Bike |
Al segund Open Space da graubünden Bike avais Vus la pussaivladad singulara da furmar ensemen cun auters partenaris engaschads ils proxims pass dal project. En workshops interessants e discussiuns avertas vegn quel instradà per l’onn che vegn. Vegni ils 28 e 29 da november a Tusaun e purtai Vossas ideas!
Intervegnir dapli e S’annunziar pudais Vus qua. |
|
|
| Curs davart il mantegniment da trails 2024 èn stads in plain success – reservai in curs er en Vossa vischnanca |
Ils curs davart il mantegniment da trails per 2024 èn stads occupads bunamain dal tuttafatg! Ensemen cun il curs da pilot da l’atun 2023 han pudì vegnir beneventads 47 participants da l’entir chantun, la gronda part or da las gruppas da lavurers communals. La collavuraziun cun las vischnancas è stada en quell’occasiun zunt engaschada e constructiva, ils resuns èn tuts positivs. Werner Putzi, il manader da vias da bike e da viandar / passlung Tavau, rapporta: «Ils collavuraturs eran fascinads da bell’entschatta fin a la fin. Ina tala reacziun n’hai jau anc mai survegnì.»
Vulessas Vus far il 2025 in curs en Vossa vischnanca? Contactai Colin Thalmann da Tu'risch u visitai la pagina d’internet Trailunterhalt-Kurse - graubünden Bike per ulteriuras infurmaziuns.
|
|
|
Savevas Vus che nossa selvaschina na vesa betg la colur cotschna e ch’ils corduns da saivs electricas èn perquai savens colurads alv e blau empè dad alv e cotschen? Quai per evitar ch’ils animals siglian en las saivs.
Tals fatgs vegnan probablamain a vegnir communitgads pli savens a partir dal 2025, per rinforzar la «relaziun» tranter ils utilisaders da vias e l’ambient. Messadis e chanals per far quai vegnan alingiads spezialmain per trais u quatter gruppas avisadas.
En pli vulain nus rinforzar vers anen il barat cun tut ils furniturs da servetschs. Grazia a la nova newsletter da fairtrail survegnis Vus novitads actualas d’emprim maun e pudais contribuir activamain al svilup da fairtrail. S’annunziai e parti il link cun ils furniturs da servetschs (gastronomia, hotels, biros da turissem, shops, purs, selviculturs etc.) en Vossa regiun: gr-shop.fairtrail.ch/pages/newsletter. |
|
|
| Uniun graubünden Trailrun: ina revista da l’inscunter da las raits |
Mez avust ha gì lieu a Vargistagn il segund inscunter da las raits da graubünden Trailrun cun inputs interessants e discussiuns animadas. En il center da l’occurrenza è sta il tema: «Rinforzar la communitad e svegliar l’interess da currer trails: ina creaziun da basegns u il svilup d’offertas?»
Suenter in’actualisaziun da l’uniun graubünden Trailrun da vart da sia manadra Angelika Lehmann, ha Thomas Häusermann (Zenit run) preschentà sis temas concernent il svilup en chaussa currer trails, quels èn adina puspè vegnids recepids e discutads durant il suentermezdi.
Silsuenter hai dà trais referats externs d’input dal Scott Ambassador ed influencer Sebastian Sonntag, da Livio Bieler, mainafatschenta da Bieler Sport Panaduz e da Lukas Müller, il manader da project da l’hotel Swiss Trailrunning-Weissbad Lodge.
Da gronda valur è sa mussà il barat tranter curridur*as activ*as da l’uniun e represchentant*as da las destinaziuns e d’ulteriurs purtaders da servetschs. |
|
|
| Bikesharing Grischun tschertga novs partenaris |
Il nov bikesharing (sa parter velos) «Mooinz» a Cuira funcziuna. Cun mintgatant passa1000 viadis per di è l’utilisaziun ed occupaziun creschida fermamain las davosas emnas. Il fanadur 2024 è la rait vegnida schlargiada a 20 staziuns. Nov vegnan offrids er uschenumnads cargobikes. Mess a disposiziun vegnan ils velos da «nextbike». Mooinz vegn vinavant sustegnì da divers partenaris al lieu e coordinà da l’uniun Pro Velo Grischun. Quest partenadi da finanziaziun innovativ public-privat è unic en Svizra ed è vegnì distinguì da la Confederaziun. Per la logistica da cumpensaziun, per midar ils accus dals velos electrics ed er per far controllas e reparaturas pissera la fundaziun integrativa Feschtland da Cuira. Per la fin dal 2024 èn planisadas purschidas cumbinadas per abunents ed abunentas dal traffic public; purschidas spezialas per il turissem datti gia.
Pro Velo Grischun sa legra sin la collavuraziun cun ulteriurs partenaris en l’entir chantun Grischun: il success dal bikesharing na duai betg esser limità a Cuira, novas vischnancas e regiuns èn tschertgadas! Tar quai chattais Vus qua infurmaziuns. U contactai nunliantamain la «Pro Velo». |
|
|
| © 2024 Uffizi da construcziun bassa, Traffic betg motorisà. Tut ils dretgs resalvads. |
|
|
