| Dieta spezialisada davart il traffic betg motorisà: Retrospectiva 2024 & perspectiva 2025 |
La dieta spezialisada davart il traffic betg motorisà ha gì lieu ils 31 d'october 2024 en l'auditori da la Banca chantunala grischuna a Cuira. A la dieta ha l'Uffizi da construcziun bassa dal Grischun sco Post spezialisà per il traffic betg motorisà dastgà beneventar var 180 participantas e participants interessads che derivavan da differentas spartas. Il tema da la dieta «Mobilitad concreta» era program. Ils giasts han survegnì updates da projects concrets che pertutgavan ils trais blocs tematics Traffic da velo da muntogna/traffic da velo, Traffic public e Traffic da viandar e da peduns. Las participantas ed ils participants èn vegnids preparads cun ina intervista interessanta davart il traffic betg motorisà en il Grischun, cun la cussegliera guvernativa dr. Carmelia Maissen. Ulteriuras infurmaziuns, impressiuns sco er ils documents davart ils referats stattan a disposiziun sin la pagina d'Internet.
La proxima dieta spezialisada davart il traffic betg motorisà è gia en planisaziun e vegn ad avair lieu gievgia, ils 6 da november 2025 en il Forum im Ried a Landquart.
|
|
|
| Actualisà il flyer «Sustegn da projects dal traffic betg motorisà» |
L'Uffizi da construcziun bassa sco Post spezialisà per il traffic betg motorisà ha elavurà danovamain il fegl d'infurmaziun existent cun las dumondas e las infurmaziuns las pli impurtantas davart il «sustegn spezialisà e las pussaivladads da finanziar projects dal traffic betg motorisà». Quest fegl d'infurmaziun dat ina buna survista davart ils cuntegns ils pli impurtants en quests secturs ed è vegnì adattà en moda decisiva al Plan sectorial Velo actualisà dals 23 da schaner 2024.
|
|
|
| Traffic betg motorisà: Signalisaziun viandar d'enviern & ir cun gianellas |
Perquai che la signalisaziun en ils secturs dal viandar d'enviern e da l'ir cun gianellas è sa sviluppada vinavant durant ils ultims onns, è il fegl d'infurmaziun correspundent en il Manual davart il traffic betg motorisà vegnì elavurà danovamain. El è vegnì adattà al mussavia naziunal e cumplettà cun la signalisaziun da basa sco er cun la varianta cun la staila da naiv, ch'è enconuschenta en il Grischun.
|
|
|
| Analisa da las reclamaziuns 2024: Tge che commova viandantas e viandants sco er ciclistas e ciclists da velos da muntogna |
La Scola auta spezialisada dal Grischun (SASGR) analisescha mintga onn las reclamaziuns dals giasts dal turissem da stad en il Grischun. Malgrà posts da consultaziun supplementars è il dumber total da las annunzias en il sectur dal viandar 2024 restà sin il nivel dals onns precedents – in signal allegraivel.
Quest onn è plinavant vegnida fatga per l'emprima giada in'analisa separada da las reclamaziuns da las ciclistas e dals ciclists da velo da muntogna. Questa analisa permetta d'obtegnair in maletg pli cumplessiv dals interess da las viandantas e dals viandants sco er da las ciclistas e dals ciclists da velo da muntogna en il chantun Grischun. I sa mussa: Blers resuns pertutgan temas cuminaivels sco la rait da sendas e la signalisaziun.
Er interessant: Conflicts tranter viandantas e viandants e ciclistas e ciclists da velo da muntogna restan in tema, vegnan dentant annunziads quasi exclusivamain da viandantas e viandants. Quai metta en evidenza, quant differenta che la percepziun sin las sendas cuminaivlas po esser.
Qua vai tar l'analisa cumpletta
|
|
|
L'onn nov cumenza cun in term impurtant: Il codex da Fairtrail repassà è qua! Il layout è vegnì simplifitgà, temas da l'ambient e da l'agricultura èn vegnids resguardads pli fitg, ed il codex è vegnì adattà cun senn als codexs da SvizraMobila. Il codex vegn a remplazzar a partir d'immediat il vegl codex.
Il download chattais Vus sin la nova plattafurma da datas. Qua vegnan cumplettads permanentamain ulteriurs documents concernent la campagna 2025. Infurmaziuns davart il diever dals assets e da las eventualas restricziuns èn mintgamai inditgadas en connex cun las materialias.
Duvrais Vus translaziuns u auters formats per il codex? Contact: info@fairtrail.ch |
|
|
| graubünden Bike: Ensemen en viadi |
L'onn 2025 ans mainan ils lavuratoris davart objectives and key results (OKR) da graubünden Bike a travers il Grischun. Da Mustér sur Lai e Müstair fin a Laax per la finiziun da l'onn – nus stgaffin spazis per concepir cuminaivlamain perspectivas per dar dapli spazi al velo en noss chantun.
Tut las infurmaziuns davart il proxim lavuratori sco er la survista cumpletta dals termins chattais Vus sin la pagina d'internet dal project da graubünden Bike – As annunziai e concepi cun nus! |
|
|
| Curs online gratuit: Planisaziun dal territori e velo da muntogna |
Er en il project graubünden Bike resultan adina puspè dumondas davart la planisaziun dal territori. In access fundà a las basas da la planisaziun dal territori en il Grischun porscha il curs online gratuit «Planisaziun dal territori» da la Allegra Academy.
Suenter ina curta registraziun pudais Vus absolver il curs en Voss agen tempo ed As infurmar en moda cumplessiva. Cumenzai gist qua. |
|
|
Il bikesharing «Mooinz» vegn extendì. Cun la decisiun dal cussegl municipal da Cuira da sa participar al project vegn la rait da parter velos a Cuira ed a Haldenstein extendida anc pli fitg durant quest onn. Cun Mooinz pon vegnir emprestads via l'app da tut temp velos, e-bikes ed e-cargovelos. La citad va en la dretga direcziun e promova il velo sco part effizienta da nossa mobilitad. Mooinz ha cumenzà sco emprova da pilot il fanadur 2024 e vegn extendì cuntinuadamain dapi lura. La chaussa speziala da Mooinz è, ch'el vegn finanzià da blers differents partenaris e coordinà da la Pro Velo Grischun. La finamira è quella da purtar il bikesharing en ulteriuras vischnancas dal chantun: En regiuns ruralas porschan e-bikes las meglras soluziuns da cuntinuaziun cun il traffic public. Nus ans legrain da tut las vischnancas motivadas. Ans contactai senza obligaziun.
Infurmaziuns: provelogr.ch/mooinz/
Contact: simon.wahl@provelogr.ch |
|
|
| Uniun graubünden Trailrun |
L'emprim onn da gestiun è stà sut l'ensaina da concepir la structura sco er la direcziun strategica. In onn dal tuttafatg captivant cun blers eveniments enritgints e cun blers puncts culminants:
Inscunter da colliaziun a Vargistagn: In'occurrenza reussida e multifara cun bler spazi per in barat activ sco er per referats d'impuls inspirants e per discussiuns al podium.
Community Run a Tusaun: Var 50 curridras e curriders da tut ils stgalims da prestaziun èn sa rendids ensemen da glina plaina sin il Crap Carschenna. Silsuenter han las participantas ed ils participants pudì sa rinforzar a chaschun d'in apero patgific en la Story.
Ina cuminanza creschenta: L'uniun sa cumpona actualmain da circa 100 commembras e commembers (9 organisaturas ed organisaturs d'events, 8 destinaziuns turisticas, 6 guids, 1 fatschenta da sport, 1 uniun da sport, 81 persunas privatas).
Save the date: La proxima radunanza da commembers vegn ad avair lieu il suentermezdi dals 14 da mars 2025. Il program exact sco er il lieu vegnan anc communitgads. Ulteriuras infurmaziuns davart l'uniun graubuendentrailrun.ch. |
|
|
| Nov guid turistic dals parcs grischuns |
Mintga 2 onns publitgescha l'Uniun dals parcs grischuns en collavuraziun cun Transhelvetica in nov guid turistic. L'ediziun actuala ch'è cumparida mez schaner 2025, stat sut il tema inspirant NATIRA ed envida d'explorar ils set parcs grischuns (Parc Naziunal Svizzer, Parc Ela, Parc Natiral Beverin, Biosfera Val Müstair, Parc Val Calanca, patrimoni mundial da la UNESCO Arena tectonica Sardona, UNESCO Biosfera Engiadina Val Müstair) cun tut lur fassettas. Viagiaturas e viagiaturs pon sa legrar d'accents tematics captivants che als laschan sfunsar profundamain en la natira, sco er da tips pratics per viagiar e d'infurmaziuns utilas per sin viadi.
Il guid turistic (da survegnir en tudestg ed en talian) è ideal per ils giasts e po vegnir empustà gratuitamain tar il secretariat dals parcs grischuns. Empustaziuns prenda gugent encunter il secretariat da l'Uniun Parcs grischuns (info@graubuendenparcs.ch u telefon +41 81 330 22 00). |
|
|
| Mantegniment da las sendas che funcziuna! |
Per che las lavurs da mantegniment da las vias da velo da muntogna e da las sendas da viandar – che dovran bler temp – possian vegnir exequidas a lunga vista, porscha il project graubünden Bike scolaziuns per gruppas che fan lavurs manualas, per manaschis forestals, per telefericas, per trailcrews e per autras persunas incumbensadas da mantegnair las vias. Ils resuns dal tuttafatg positivs dals curs ch'èn vegnids realisads per l'emprima giada l'onn passà, suttastritgan la plivalur per ils mantegniders da vias – independentamain dal fatg, sch'els lavuran sin sendas da viandar u sin vias da velo da muntogna!
Ultra da praticas da mantegniment persistentas sa concentrescha il curs da basa da 3 dis sin in management correct da l'aua e sin la promoziun da la coexistenza cun mesiras architectonicas. Il program da curs cumplet, ils termins, ils lieus e l'annunzia chattais Vus sin la pagina d'internet dal project. Daventai activa u activ: Scolai Vossas collavuraturas e Voss collavuraturs a spezialistas e spezialists da vias certifitgads ed As engaschai cuminaivlamain a favur da la qualitad e da la segirezza da la rait da vias e da sendas dal Grischun!
Per in curs en Vossa regiun contactai per plaschair Colin Thalmann da Tu'risch. |
|
|
| © 2025 Uffizi da construcziun bassa, Traffic betg motorisà. Tut ils dretgs resalvads. |
|
|
