La fin d'october è la campagna da prevenziun surregiunala "Nagina distracziun, main accidents" ida a fin. La campagna ha sensibilisà las participantas ed ils participants dal traffic per il fatg che distracziun en il traffic sin via po chaschunar grevs accidents. Ch'igl è necessari da sensibilisar per quai, mussan las controllas prioritaras ch'èn vegnidas fatgas en il Grischun. La polizia chantunala dal Grischun ha dà multas u ha denunzià entaifer 15 dis stgars 200 manischunzas e manischunzs.

Tut las activitads al guvernagl che pon influenzar l'attenziun da las participantas e dals participants dal traffic èn privlusas. Da quai fan part tranter auter telefonar u manipular apparats da navigaziun u players dad MP3. Da quest fatg èsi vegnì tegnì quint cun ils motivs da la campagna. Chavazzins sco "snack", "make-up", "handy", "navi", "player dad MP3" cumbinads cun in signal da privel duain mussar che tschertas activitads pon distrair. La campagna n'ha betg mo appellà a las manischunzas ed als manischunzs da vehichels a motor, mabain er a participantas e participants dal traffic sco ciclistas e ciclists u pedunas e peduns. La campagna è vegnida lantschada la fin da settember en 19 chantuns. A la campagna èn sa participads la polizia chantunala da Turitg, las polizias municipalas da Turitg e da Winterthur, las polizias communalas dal chantun Turitg sco er ils corps da polizia dals concordats da la Svizra orientala, centrala e nord-occidentala. Schebain che la campagna è ussa finida uffizialmain, vegn la polizia chantunala dal Grischun a far vinavant controllas areguard la distracziun.