Glindesdi avantmezdi ha la polizia chantunala dal Grischun preschentà en ina conferenza da medias a Cuira la statistica criminala da la polizia 2017. La statistica mussa in pitschen dumber total dals delicts ed ina gronda quota da scleriment. Quai correspunda al trend en Svizra. En il Grischun datti però differenzas tranter las regiuns ch'èn pertutgadas da delicts. Quest fatg resta dentant stabil.
En il chantun Grischun èn vegnids registrads l'onn passà 8541 delicts. Quai èn 379 damain che l'onn 2016. La part la pli gronda èn acts chastiabels cunter il cudesch penal svizzer, numnadamain 6287 (onn precedent 6870). Per cumparegliar: L'onn 2009, cura che la statistica criminala da la polizia è vegnida fatga per l'emprima giada tenor criteris da registraziun unifitgads en Svizra, èn vegnids registrads 8156 acts chastiabels cunter il cudesch penal svizzer. La distgargia ch'è vegnida constatada dapi lura pertutga oravant tut la regiun da Cuira, l'Engiadina ed il Mesauc. Tar ils delicts da violenza grevs è vegnì registrà in augment da 6 cas envers l'onn precedent (da 36 sin 42). Quai èn dus mazzaments, 27 blessuras corporalas grevas e 13 violaziuns. Els èn vegnids sclerids 100 %. 92 % da tut ils delicts da violenza (onn precedent 91 %) èn vegnids sclerids.
Augment da baruffas e da violenza/smanatscha cunter funcziunaris
La gronda part dals delicts da violenza èn blessuras corporalas levas, acts violents, baruffas, constricziuns, smanatschas e violenza/smanatscha cunter funcziunaris. Tar las baruffas po vegnir registrà in augment da 27 sin 48 cas, tar ils cas da violenza/smanatscha cunter funcziunaris in augment da 24 sin 41 cas. En il rom da relaziuns sumegliantas ad ina famiglia èn vegnids commess 238 delicts da violenza, 57,5 % (onn precedent 40,5 %) da quels pertutgan relaziuns actualas da pèrs resp. da partenaris.
Delinquenza da massa enguladitsch è l'indicatur
L'enguladitsch sco delict da massa stat sco indicatur per in grad da criminalitad d'intensitad leva, entant che l'enguladitsch cun infracziun è in indicatur per in grad da criminalitad augmentà. Entant ch'igl èn vegnids registrads l'onn 2017 1861 enguladitschs (-9 %) – 415 da quels èn stads enguladitschs cun infracziun – èn vegnids commess l'onn 2009, il cumenzament da la statistica criminala da la polizia, anc 2995 enguladitschs (592 da quels enguladitschs cun infracziun). La quota da scleriment en quest sectur importa buns 23,8 % (onn precedent 24,0 %). Da tut ils acts chastiabels cunter il cudesch penal svizzer ha la polizia chantunala dal Grischun sclerì 40,7 % (onn precedent 41,1 %). Tar ils delicts cunter il corp e cunter la vita sa chatta la quota da scleriment tar 92,5 % (onn precedent 94,2 %). Tranter las persunas inculpadas en il sectur dal cudesch penal svizzer dattan ils umens tranter 15 e 35 onns spezialmain savens en egl a la polizia.