La campagna da prevenziun d'accidents cun motos "stayin-alive.ch" vegn manada tras gia il terz onn en il Grischun. L'element central da quest onn èn puspè ils curs d'ir cun moto che vegnan accumpagnads da la polizia.

Per render attent als privels en connex cun l'ir cun moto vegnan montads placats da prevenziun per lung da las vias principalas en il Grischun. L'acziun da placats che vegn realisada dapi onns ensemen cun l'uffizi da construcziun bassa dal Grischun sa drizza a tut las participantas ed ils participants dal traffic.

In tema serius vegn tractà per part cun umor
Strategias pregnantas e simplas per surviver sco "Tritt lieber die Bremse, statt auf den Asphalt zu schlagen", "Sei eine Spassbremse, wenn's drauf ankommt" u "Liebe dein Leben, statt mit dem Tod zu flirten" rendan attent al tema serius dals accidents da moto. Che l'ir cun moto en il chantun Grischun è ina sfida per manischunzas e manischunzs, mussa il lev augment dals accidents da moto da l'onn passà. Sis motociclistas e motociclists èn morts sin las vias dal Grischun.

Frequentar curs per la segirezza stradala
Ils curs d'ir cun moto che vegnan puspè purschids dal center per la segirezza stradala DrivingGraubünden èn fitg dumandads. Quests curs che vegnan sustegnids sut il patrunadi da la polizia chantunala dal Grischun èn gia occupads fin a l'ultima plazza. A las motociclistas ed als motociclists vegni recumandà d'extender lur abilitads per amur da l'atgna segirezza e da frequentar curs per la segirezza stradala.