A partir dals 20 d'avust 2018 sa rendan puspè plirs millis uffants e giuvenils sin via da scolina u da scola. Per intgins dad els è quai l'emprima giada. Sco gia durant ils onns passads vegn la polizia chantunala dal Grischun a rinforzar sia preschientscha en vischinanza da chasas da scola e da scolinas.

Il cumenzament dal nov onn da scola vegnan puspè ad esser en gir dapertut scolaras e scolars cun pauca experientscha sin las vias dal Grischun. La polizia chantunala vegn a dar in'attenziun speziala al cumportament da las manischunzas e dals manischunzs en vischinanza da chasas da scola e da scolinas. Controllads vegnan en emprima lingia la sveltezza ed il dretg da precedenza sin las strivlas melnas.

Cumportament en il traffic sin via
Tut las participantas ed ils participants dal traffic han ina funcziun d'exempel. As cumportai en moda exemplarica a pe, sin il velo ed er al guvernagl d'in vehichel a motor. Uffants imiteschan. Sche uffants spetgan a l'ur da la via, fermai Voss vehichel adina cumplettamain. En l'instrucziun da traffic emprendan ils uffants da traversar las strivlas melnas u la via pir cur ch'in vehichel stat airi. Pervia da lur stadi da svilup na pon cunzunt uffants pitschens anc betg valitar sveltezzas e distanzas. Na faschai nagins segns (cun il maun u cun las glischs), l'uffant pudess uschiglio cumenzar a currer senza far attenziun d'ulteriurs privels, sco p.ex. dal traffic en direcziun cuntraria. Sche Vus accumpagnais Voss uffant a scola u a scolina, al mussai il cumportament correct ed ils lieus privlus. Uffants duain purtar vestgadira bain visibla. Er il bindel oransch ch'els han survegnì augmenta la vesaivladad.

Taxi da geniturs
Pervia da la mancanza da plazzas da parcar (parcar sin il passape u a l'ur da la via e.u.v.) na vegni betg cusseglià da charrar uffants a scolina u a scola. Ultra da quai è il dumber creschent da vehichels en vischinanza da las scolas in ulteriur privel per ils auters uffants che van a pe. Plinavant sa disan ils uffants da taxis da geniturs memia pauc a las relaziuns stradalas. Els percorschan main bain ils privels ed acceptan ina ristga d'accidents pli gronda che cur ch'els van a pe. Cui a Voss uffants il svilup ed ils contacts socials ch'els chattan sin via da scola.