Il nov post da polizia a Puschlav vegn inaugurà uffizialmain ils 16  d'avust 2019. Dapi il 1. da fanadur sa chatta el en il nov lieu che vegn duvrà cuminaivlamain cun l'administraziun federala da duana (AFD).

Cun sa chasar en las novas localitads engrondidas a la via da Spultri 42 accentueschan la polizia chantunala dal Grischun e la AFD lur stretga collavuraziun sco partenarias, che duai anc vegnir rinforzada en il futur. La collavuraziun sa basa sin ina cunvegna da dretg administrativ. Praticamain han lieu in viv barat d'infurmaziuns, in sustegn vicendaivel, in plan da lavur cuminaivel ed ina scolaziun cuminaivla sco er controllas e patruglias maschadadas. Grazia a las localitads cuminaivlas na vegnan betg pli duvrads ils biros da la polizia chantunala dal Grischun a Campocologno.

Collavuraziun transcunfinala

A partir da l'onn 2020 vegnan a circular patruglias maschadadas dals carabinieris, da la polizia di stato, da l'administraziun federala da duana e da la polizia chantunala dal Grischun en las provinzas da Bulsaun e da Sondrio sco er en il Grischun. La collavuraziun internaziunala duai vegnir rinforzada ed amplifitgada ulteriuramain per cumbatter cunter la criminalitad transcunfinala. L'entir territori da cunfin vegn considerà sco territori da criminalitad e vegn surveglià da tut las organisaziuns da segirezza.

Infurmaziuns

colonel Walter Schlegel, cumandant da la polizia chantunala dal Grischun
colonel Markus Kobler, administraziun federala da duana, cumandant da la regiun da guardias da cunfin III

Las collavuraturas e collavuraturs da las medias pon fixar termins per intervistas cun ils infurmaturs sur il numer da telefon 081 257 79 50.