L'aura è bella - las temperaturas bunas! Numerusas motociclistas e numerus motociclists han gia cumenzà la stagiun da motos. La Polizia chantunala dal Grischun s'engascha era quest onn activamain per prevegnir ad accidents.

Era sche betg tut ils pass grischuns èn gia averts, carmalan la bell'aura e las temperaturas miaivlas las motociclistas ed ils motociclists sin via. Sco mintg'onn organisescha la polizia chantunala ensemen cun l'Uffizi da construcziun bassa dal Grischun in'acziun da placats per lung da rutas attractivas che duai render attent tut las utilisadras e tut ils utilisaders da la via da charrar cun precauziun.

Bain sa preparar per a moda segira charrar

• Controllar avant che charrar che la moto n'haja nagins defects tecnics. Elementar è er in bun stadi corporal e mental da la motociclista e dal motociclist.

• Charrar er il di adina cun glisch sbassada u glisch da circulaziun. Quai n'è betg mo obligatoric, mabain augmenta era la vesaivladad – cunzunt en cumbinaziun cun vestgadira clera u marcanta – ed il medem mument la segirezza en il traffic.

• Sa proteger da blessuras en cas da cupitgadas u da collisiuns cun ina chapellina, guants, stivals sco era cun ina giacca e chautschas cun protecturs.

• Charrar a moda prospectiva, colleghiala e defensiva sa paja e gida ad evitar accidents da traffic. Quai na vala sa chapescha betg mo per motociclistas e motociclists.

• Moderar il tempo na signifitga betg mo observar las prescripziuns legalas, mabain er adattar la sveltezza al traject, a las cundiziuns sin via ed a las atgnas abilitads da charrar.

Planisà differentas acziuns da prevenziun

Sut il patrunadi da la Polizia chantunala dal Grischun organisescha Driving Grischun, il center per la segirezza da charrar a Cazas, la primavaira durant sis dis dus curs da moto tematicamain differents. Ultra da quai realisescha la polizia chantunala durant ils mais da stad sin pass grischuns bain frequentads acziuns da prevenziun che duain evitar accidents da moto. Las policistas ed ils policists pledentan activamain las motociclistas ed ils motociclists per als render attents ad ina moda da charrar correcta. Da bun'aura ha lieu sonda, ils 25 da zercladur 2022 in tal di da prevenziun sin il Son Gottard en furma d'ina collavuraziun interchantunala dals corps da polizia da l'Uri, Tessin e Grischun.

La Polizia chantunala dal Grischun giavischa a tut las participantas ed a tut ils participants dal traffic ina stagiun segira senza accidents.