Sin las vias grischunas hai dà tut en tut 2327 accidents da traffic l'onn 2022. En quests accidents èn mortas 17 persunas e 568 persunas èn vegnidas blessadas.
L'onn 2022 ha la polizia registrà totalmain 2327 accidents da traffic en il chantun Grischun. Quai è ina reducziun da 2 accidents en cumparegliaziun cun l'onn precedent. Tuttina è il dumber levamain pli aut che la media dals onns 2018–2022. Resguardond il fatg ch'il dumber da vehichels a motor en il chantun Grischun è creschì er l'onn passà per circa 1220, dastgan las cifras vegnir consideradas sco positivas.
Damain accidents cun donn da persunas e dapli accidents cun donn material
Ils accidents cun donn da persunas èn sa sminuids per 9 accidents e quels cun donn material per 7 accidents. Envers l'onn precedent èn mortas 2 persunas dapli pervia da las consequenzas d'accidents da traffic. En cumparegliaziun cun ils ultims 5 onns sa mussa puspè in augment considerabel dal dumber d'accidents da traffic cun manischunzas e manischunzs da vehichels sut l'influenza d'alcohol. Envers l'onn precedent èn quests accidents s'augmentads per 26,8 % sin totalmain 118 accidents da traffic. Sin las autostradas e sin las autovias sto medemamain vegnir registrà in augment da 28 accidents (+16 %).
Dapli accidents mortals cun motos e dumbers d'accidents constants tar ils velos
Il dumber dals accidents cun motos è s'augmentà cleramain en cumparegliaziun cun l'onn precedent. Uschia è quel s'augmentà da 153 sin 189 accidents da traffic, quai che correspunda ad in augment da 36 accidents (+23,5 %). Pauc allegraivel è il fatg ch'il dumber da persunas disgraziadas mortalmain (+4) è s'augmentà ed er ch'il dumber da persunas grevamain blessadas (+16) è medemamain creschì. Percunter sa mussa tar ils accidents cun velos senza assistenza dal pedal ina reducziun. Er il dumber da donns da persunas tar quests velos è regressiv. Il dumber dals accidents cun e-bike è restà cun 38 accidents tuttina grond sco l'onn precedent. Deplorablamain è morta ina manischunza dad e-bike en in accident individual. Tar ils accidents da peduns dastga vegnir registrà ina reducziun da 5 accidents.
Sveltezza memia auta e distracziun sco ristgas
260 accidents da traffic èn d'attribuir ad ina sveltezza memia auta. La sveltezza maximala legala n'è dentant betg vegnida surpassada en scadin cas, mabain la sveltezza n'è er betg vegnida adattada a las cundiziuns sin via u a las relaziuns da visibilitad. Tar ils accidents pervia d'inattenziun u pervia da distracziun han ins stuì constatar in cler augment da 61 sin 95 (+55 %). Quest grond augment d'accidents mussa ch'ina activitad da controlla pli intensiva è necessaria en quest sectur er en l'avegnir.
La statistica detagliada dals accidents da traffic dal chantun Grischun po vegnir consultada en l'internet sut Statistica - Statistica (gr.ch).
maletg simbolic