Glindesdi, ils 14 d'avust 2023, cumenza puspè in nov onn da scola en il Grischun. Millis d'uffants fan per l'emprima giada la via da scola u da scolina. La Polizia chantunala dal Grischun vegn a rinforzar sia preschientscha en la vischinanza da las scolinas e da las chasas da scola.

Per ils uffants è la via da scola l'emprim pass vers l'independenza. Per dumagnar ils privels dovran els cundiziuns d'emprender segiras. Ils uffants duain pudair far lur via a scolina u a scola en moda autonoma e segira. Perquai ch'els ston anc emprender, co sa cuntegnair en il traffic sin via, dovran els il sustegn da tut las participantas ed ils participants dal traffic sco er dals geniturs. Er quest onn sustegna la Polizia chantunala dal Grischun la campagna per la via da scola «sa fermar per ils uffants da scola». Questa acziun da l'Associaziun Traffic ed Ambient e da Mobilitad da peduns Svizra vegn realisada per incumbensa dal Fond svizzer per la segirezza stradala.

Trais reglas per la segirezza sin las vias da scola

• Charrai plaun e cun previsiun, sch'ins sto quintar cun uffants en il spazi stradal.
• Na reduci betg mo Vossa sveltezza, mabain fermai adina dal tuttafatg Voss vehichel, cura ch'in uffant vul traversar la via. Da la polizia emprendan ils uffants numnadamain da traversar la via pir, cura che las rodas na sa movan betg pli.
• Desisti da far segns cun ils mauns, per che l'uffant possia sa concentrar sin l'ulteriur traffic.

Pli gronda preschientscha da la polizia il cumenzament da scola
Per segirar las vias da scola e per proteger las pli giuvnas participantas ed ils pli giuvens participants dal traffic, vegn la Polizia chantunala dal Grischun a far dapli controllas da sveltezza e da las vias da scola en las vischnancas. Parallelamain visitan ils instructurs da traffic da la Polizia chantunala dal Grischun tut las scolinas e mussan als uffants, co ch'els ston sa cuntegnair per traversar la via.