Sin las vias grischunas hai dà tut en tut 2400 accidents da traffic l'onn 2023. En quests accidents èn mortas 17 persunas e 610 persunas èn vegnidas blessadas. Il dumber dals accidents cun motos e dals accident sut l'influenza d'alcohol è sa reducì.

L'onn 2023 ha la polizia registrà totalmain 2400 accidents da traffic en il chantun Grischun. Quai è in augment da 73 accidents en cumparegliaziun cun l'onn precedent. Il dumber d'accidents è levamain pli aut che la media dals onns 2018–2022. Igl è da resguardar ch'il dumber da vehichels en il chantun Grischun è creschì l'onn passà per var 2961 vehichels a motor.

Dapli accidents cun donn da persunas e cun donn material
Ils accidents cun donn da persunas èn creschids per 25 a 478 e quels cun donn material per 48 a 1922. Envers l'onn precedent èn mortas tuttina bleras persunas (17) pervia da las consequenzas d'accidents da traffic. Il dumber da las persunas grevamain blessadas tras accidents da traffic è sa reducì da 99 ad 85. Sin las autostradas e sin las autovias han ins pudì registrar ina reducziun per 10 accidents (-5 %) a 190.

Reducziun dals accidents sut l'influenza d'alcohol
En cumparegliaziun cun ils ultims 5 onns sa mussa puspè ina reducziun dal dumber d'accidents da traffic cun manischunzas e manischunzs da vehichels sut l'influenza d'alcohol. Envers l'onn precedent èn quests accidents sa reducids per 16,1 % a totalmain 99.

Main accidents cun motos ed accidents cun velos cun donns da persunas
Il dumber dals accidents cun motos è sa reducì marcantamain en cumparegliaziun cun l'onn precedent. Uschia è quel sa reducì da 189 a 165 accidents da traffic, quai che correspunda ad ina reducziun da 24 accidents (-12,7 %). Allegraivel è il fatg ch'igl ha dà ina reducziun tar il dumber da motociclists disgraziads mortalmain (-5) ed er tar il dumber da persunas grevamain blessadas (-21). Percunter hai dà in pitschen augment dals accidents cun velos senza assistenza dal pedal da 69 a 71. Il dumber da las persunas blessadas tar quests accidents cun velos è sa reducì per 8 accidents a 47. Il dumber dals accidents cun e-bikes è s'augmentà per 5 a 43. In manischunz d'in e-bike è mort a chaschun d'in accident. Tar ils accidents cun peduns sto vegnir registrà in augment da 12 accidents. Quai signifitga ch'ins ha registrà 49 accidents cun peduns l'onn 2023.

Sveltezza memia auta e distracziun sco ristgas
266 accidents da traffic èn d'attribuir ad ina sveltezza memia auta. La sveltezza maximala legala n'è dentant betg vegnida surpassada en scadin cas, dentant n'è la sveltezza er betg vegnida adattada a las cundiziuns sin via u a las relaziuns da visibilitad. Tar ils accidents pervia d'inattenziun u pervia da distracziun è da constatar in lev augment da 104 a 106. Quests dumbers d'accidents mussan, ch'i vegn er en l'avegnir ad esser necessari da far controllas en quests secturs.

La statistica detagliada dals accidents da traffic dal chantun Grischun po vegnir consultada en l'internet sut www.kapo.gr.ch/service/statistik.