La Polizia chantunala dal Grischun ha 8 novas polizistas ed 8 novs polizists. Suenter ina scolaziun intensiva da dus onns èn els vegnids integrads la gievgia en il corp a chaschun d'ina ceremonia festiva. La festa è vegnida enramada musicalmain da la Musica da polizia dal Grischun.

En preschientscha da lur confamigliaras e da lur confamigliars sco er da giasts da la politica e d'organisaziuns partenarias han las novas polizistas ed ils novs polizists dà lur empermischun d'uffizi al cumandant Walter Schlegel. «La professiun da polizia pretenda da Vus integritad maximala, curaschi e senn per giustia. Jau sun losch da pudair beneventar Vus en il corp», ha Schlegel ditg. En ses pled ha il cumandant dà in sguard vers il futur ed ha explitgà las pussaivladads da l'intelligenza artifiziala (IA) en la lavur da la polizia. «Polizistas e polizists ston vegnir scolads per pudair utilisar e chapir la IA e per restar al puls dal temp, perquai che er persunas criminalas nizzegian la IA», ha el punctuà. Il cusseglier guvernativ Peter Peyer ha accentuà la rolla impurtanta da la polizia per il funcziunament da la societad: «Ella cumbatta la criminalitad e fa valair il dretg. Che Vus avais tschernì la professiun en il servetsch da la cuminanza merita noss pli grond respect.»

Scolaziun taliana e tudestga
En in discurs al podium han mintgamai ina absolventa ed in absolvent da la Scuola Cantonale di Polizia a Giubiasco e da la Scola da polizia dad Amriswil descrit, co ch'els han passentà lur scolaziun. Malgrà differents concepts da scolaziun da las duas scolas absolvan els il medem examen professiunal. Per la Polizia chantunala dal Grischun èsi ina sfida da metter las absolventas ed ils absolvents da las scolas da polizia da lingua taliana e tudestga sin il medem stan durant il praticum entaifer il corp.

Carriera entaifer il corp
A chaschun da la festa en l'auditori da la Banca chantunala grischuna èn er 21 polizistas e polizists ch'èn sa fatgs meritaivels e che han surpiglià novas funcziuns vegnids promovids en grads pli auts. Ultra da quai han ins engaschà 11 collavuraturas e collavuraturs e beneventà 13 collavuraturas e collavuraturs civils ch'èn tuts vegnids en il decurs da l'onn tar la Polizia chantunala dal Grischun. In polizist ch'è vegnì saramentà avant 10 onns e ch'è ussa vegnì promovì sco manader da gruppa ha raquintà da sias experientschas e scolaziuns ch'el ha pudì far entaifer il corp.