Sin las vias dal Grischun hai dà tut en tut 2445 accidents da traffic l'onn 2024. En quests accidents èn mortas 10 persunas e vegnidas blessadas 582 persunas. Il dumber d'accidents cun motos è danovamain sa reducì. Ils accidents da traffic sut l'influenza d'alcohol èn dentant s'augmentads.

L'onn 2024 ha la polizia registrà totalmain 2445 accidents da traffic en il chantun Grischun. Quai correspunda ad in augment marginal cumpareglià cun l'onn precedent. Da resguardar èsi, ch'il volumen da traffic total è s'augmentà en il chantun Grischun.

Diminuziun dals accidents cun donns da persunas
Legraivel èsi, ch'ins dastga registrar ina clera diminuziun dals accidents cun persunas mortas en cumparegliaziun cun l'onn precedent. Quai è la valur la pli bassa, sch'ins cumpareglia ils ultims 10 onns.

Medemamain han ins pudì constatar ina reducziun dals accidents cun donns da persunas. Percunter è s'augmentà levamain il dumber da persunas grevamain blessadas. Ina tendenza creschenta ston ins er constatar tar ils accidents da traffic entaifer ils vitgs. Da l'autra vart hai dà ina leva reducziun dal dumber d'accidents da traffic ordaifer ils vitgs.

Augment dals accidents da traffic sut l'influenza d'alcohol

Cumbain ch'ins ha intensivà las controllas da traffic, han ins stuì registrar in augment dals accidents da traffic sut l'influenza d'alcohol. Percunter stoi vegnir valità sco fatg positiv, ch'ils accidents da traffic sut l'influenza da narcotics èn sa diminuids.

Main accidents cun motos, velos e peduns
Il dumber d'accidents cun motos è danovamain sa reducì en cumparegliaziun cun l'onn precedent. Cumbain che questas cifras èn sa reducidas, han ins stuì registrar in augment considerabel da persunas grevamain blessadas tras accidents cun motos.

L'onn passà èn sa reducids ils dumbers d'accidents cun velos sco er cun e-bikes. Er tar ils accidents cun peduns han ins pudì constatar ina leva diminuziun. Legraivel èsi er, ch'il chantun Grischun è plazzà lunsch sut la tendenza svizra tar ils accidents da traffic cun vehichels da trend. Actualmain n'èn quests accidents pia betg in problem.

Sveltezza memia gronda e distracziun sco ristgas
Anc adina èn sveltezzas memia grondas in tema en connex cun ils accidents da traffic en il chantun Grischun. Betg en tut ils cas n'è la sveltezza maximala legala dentant vegnida surpassada. Mintgatant n'è la sveltezza er betg vegnida adattada a las cundiziuns sin via u a la visibilitad. Er il dumber d'accidents da traffic pervia da distracziun u d'inattenziun è anc adina memia aut, malgrà la diminuziun en cumparegliaziun cun l'onn precedent. In'activitad da controlla pli intensiva en quests secturs vegn ad esser necessaria er en l'avegnir.

La statistica detagliada dals accidents da traffic dal chantun Grischun po vegnir consultada en l'internet sut www.kapo.gr.ch > Servetschs > Statistica.