Per il 1. da schaner 2010 èn entradas en vigur l'uschenumnada amnestia d'ierta e la pussaivladad da la denunzia da sasez nunchastiabla (art. 153a e 175 al. 3 ss. LTFD sco er art. 147a e 174 al. 3 ss. LT).

Sche las ertavlas e sch'ils ertavels constateschan che l'ierta cuntegna valurs da facultad betg decleradas, q.v.d. omessas, pon ellas ed els annunziar questa omissiun fiscala a las autoritads da taglia. Ellas ed els profiteschan alura d'ina taglia supplementara reducida che vegn incassada mo per ils ultims trais onns; ina taglia penala na sto betg vegnir pajada, quella è gia vegnida abolida en il dretg vertent. Questa regulaziun vala per ils cas, nua che la testadra u il testader è mort suenter ils 31 da december 2009.

Mintga persuna ch'è obligada da pajar taglia ha la pussaivladad da denunziar ina giada en la vita in'omissiun fiscala tar las autoritads da taglia. En quest cas è debitada mo la taglia supplementara ed i vegn renunzià d'incassar ina taglia penala. La pussaivladad da far ina denunzia da sasez han er persunas giuridicas. Questa regulaziun vala per tut ils cas ch'èn anc stads pendents il 1. da schaner 2010.

Tuttas duas proceduras èn colliadas cun la premissa che las autoritads da taglia n'avevan anc nagina enconuschientscha da l'omissiun fiscala, che las persunas pertutgadas n'han betg cooperà activamain tar l'omissiun, ch'ellas sustegnan senza resalvas la retschertga da las valurs omessas e ch'ellas sa stentan da pajar las taglias supplementaras. La denunzia da sasez sto esser cumpletta e sto cumpigliar tut las valurs da facultad omessas. Sche l'omissiun fiscala è vegnida commessa da pliras persunas sco conculpablas u sco participantas (instigader, cumplizi e.u.v.), stuess la denunzia vegnir fatga ensemen ubain il medem mument. La denunzia da sasez vegn fatga il meglier cun ina charta recumandada a l'administraziun chantunala da taglia, Steinbruchstrasse 18, 7001 Cuira.