Grazia a la bell'aura ed a la buna vegetaziun sco er grazia al grond engaschament da las chatschadras e dals chatschaders è la preda da la chatscha auta stada buna ed en la media dals ultims 10 onns. Per ademplir ils auts plans da prelevaziun chantunals, ston dentant vegnir sajettads il november ed il december en bleras regiuns anc chavriels e tschiervs feminins.

Cun 5430 tschiervs è il plan da prelevaziun da tschiervs puspè stà fitg aut, quai pervia da la gronda populaziun da selvaschina d'ungla, pervia da l'influenza fitg ferma da la selvaschina sin il guaud en tschertas regiuns sco er pervia da las determinaziuns da la Regenza en sia strategia «Spazi da viver guaud-selvaschina 2021». Il plan da prelevaziun da tschiervs 2022 vala sco ademplì, sch'i èn sajettads 3145 animals feminins. En il rom dals rapports regiunals davart il guaud e davart la selvaschina han ins er rinforzà il squitsch da chatscha sin chavriels e localmain er sin chamutschs en il guaud en quellas regiuns, nua ch'i dat conflicts tranter il guaud e la selvaschina. Cun 3770 tschiervs han ins cuntanschì la preda da chatscha la quart auta dapi l'onn 1991. Er il dumber da chavriels sajettads è stà pli grond che l'onn precedent. Chamutschs e portgs selvadis han ins sajettà quasi tuttina blers sco l'onn 2021. En cas dals portgs selvadis ston ins dentant resguardar ch'i èn vegnids sajettads 34 animals gia la stad, quai en il rom da las mesiras da prevenziun cunter donns da selvaschina en l'agricultura e ch'ins ha pia sajettà in dumber maximal quest onn.

La lavur resta pretensiusa
Per che l'incarica da la chatscha possia vegnir ademplida, ston vegnir sajettads anc 2158 tschiervs durant la chatscha dal november e dal december 2022. Il plan da prelevaziun per ils tschiervs è pia per circa 300 animals pli bass che l'onn precedent. La chatscha speziala da tschiervs vegn organisada en tut las 21 regiuns da tschiervs dal Grischun. Per regular definitivamain la populaziun regiunala da chavriels vegn la chatscha da chavriels permessa anc ina giada en 14 regiuns. Guardà sur tut il chantun ston vegnir sajettads anc 367 chauras-chavriel ed ansiels. Pervia dals gronds conflicts tranter il guaud e la selvaschina en la Val dal Rain Grischuna ed en la Tumleastga davant vegnan permess per l'emprima giada er chamutschs dad 1 onn per la chatscha speziala. La chatscha da chamutschs dad 1 onn vegn restrenschida sin quatter surfatschas localas problematicas. La reducziun dals chamutschs sin questas surfatschas problematicas ch'èn er pertutgadas da conflicts tranter il guaud e la selvaschina duai vegnir realisada uschè bain sco pussaivel tras las chatschadras ed ils chatschaders e betg tras la surveglianza da chatscha. La populaziun da portgs selvadis en la part sut da la Mesolcina s'augmenta fermamain. Ils portgs selvadis pon chaschunar gronds donns en l'agricultura, uschia ch'els vegnan sajettads senza contingent durant la chatscha dal november e dal december.

Perquai ch'il decurs da la chatscha dal november e dal december dependa fitg da la purschida existenta da tschiervs e da chavriels e da las relaziuns da l'aura, èsi ina incumbensa pretensiusa d'ademplir ils plans da prelevaziun da quest onn.

Collavuraziun decisiva
In guaud da protecziun saun e bain structurà garantescha ina segirezza duraivla a la populaziun grischuna. In factur decisiv en quest connex è er la regiuvinaziun natirala dal guaud. La reducziun da las populaziuns da selvaschina d'ungla ed uschia er da l'influenza da la selvaschina sin la regiuvinaziun dal guaud è ina contribuziun impurtanta en chaussa. Per cuntanscher las finamiras cuminaivlas èsi indispensabel che tut las parts participadas collavurian en moda constructiva e cun respect. Mo sche las proprietarias da guaud sustegnan la lavur da las chatschadras e dals chatschaders, pon ils plans da prelevaziun vegnir cuntanschids er sut cundiziuns difficilas.

Agiuntas:

Plan da la chatscha d'atun sin tschiervs 2022
Plan da la chatscha d'atun sin chavriels 2022