Cun l'ultim di da chatscha speziala è ida a fin ils 17 da december 2023 la chatscha sin selvaschina d'ungla. En il Grischun èn vegnids sajettads l'onn ch'è gist ì a fin tut en tut 4909 tschiervs, 2982 chavriels, 3067 chamutschs e 71 portgs selvadis. Ultra d'exequir lur passiun han las chatschadras ed ils chatschaders grischuns ademplì ina incumbensa impurtanta a favur dal bainstar communabel. La reducziun da las populaziuns da selvaschina d'ungla presta ina contribuziun impurtanta per in guaud da protecziun saun.
Pervia da la bell'aura e da las temperaturas chaudas è cunzunt la preda da tschiervs stada pli bassa durant la chatscha auta dal 2023 che l'onn avant. Per cuntanscher ils plans da prelevaziun ambizius e per cuntinuar cun la reducziun da la populaziun da tschiervs, è il plan da chatscha speziala stà er l'onn ch'è gist ì a fin fitg aut, quai cun 2205 tschiervs e 297 chavriels.
Il resultat total è cuntentaivel
Il mez november avevi gia en las regiuns mesaunas ed autas ina cuverta da naiv serrada. En blers territoris èn las cundiziuns uschia stadas optimalas per la chatscha speziala. Pervia da las navaglias da l'emprima fin d'emna da december ha la chatscha dentant stuì vegnir interrutta en l'entir chantun. Suenter ha la chatscha mo anc pudì vegnir cuntinuada en regiuns pli bassas dal chantun. Perquai ch'ils tschiervs sa trategnevan en ils quartiers d'enviern bass, ha la chatscha speziala cunzunt pudì vegnir cuntinuada en moda effizienta en il Partenz, en la Val dal Rain, en parts da la Surselva ed en la regiun Mantogna fin en la Val d'Alvra Dafora. En las regiuns pli autas da la Surselva, da l'Engiadina e dal Grischun Central n'è a partir dals 3 da december ina chatscha speziala betg pli stada giustifitgabla ord vista da la protecziun dals animals, quai pervia da l'autezza da naiv.
Tut en tut han las chatschadras ed ils chatschaders sajettà durant la chatscha speziala 1298 tschiervs, 162 chavriels, 3 chamutschs ed 11 portgs selvadis. Cun in resultat total da 4909 tschiervs e 2982 chavriels èn ils plans da prelevaziun 2023 da tschiervs vegnids ademplids per 93 pertschient e quels da chavriels per 98 pertschient. Tar il tschierv è la cifra da prelevaziun dals animals feminins decisiva per la regulaziun. Cun 2450 animals feminins è il plan qualitativ vegnì ademplì per bundant 80 pertschient. En territoris, nua ch'i era necessari e raschunaivel, ha la surveglianza da chatscha anc sajettà singuls animals.
La reducziun da las populaziuns da selvaschina d'ungla è pretensiusa
La primavaira 2023 dumbrava la populaziun 15 110 tschiervs. Quest dumber era bain pli bass ch'ils onns precedents, dentant anc adina sin in nivel memia aut. Tenor la strategia da la Regenza «Spazi da viver guaud-selvaschina 2021» sto la populaziun da tschiervs vegnir reducida vinavant en l'entir chantun. Cun in grond sforz han las chatschadras ed ils chatschaders empruvà d'ademplir il fitg ambizius plan da prelevaziun. Igl è dentant er sa mussà l'onn passà, ch'il success da la chatscha e l'adempliment dals plans da prelevaziun èn dependents da facturs che n'èn betg influenzabels, sco per exempel da l'aura u da la preschientscha d'animals da rapina gronds. Las dumbraziuns da las populaziuns da proxima primavaira vegnan a mussar, sche las populaziuns da selvaschina d'ungla han pudì vegnir reducidas en las regiuns, nua che la selvaschina chaschuna gronds donns vi dal guaud.