Soluziun generala persvadenta

Per chattar ina soluziun per questa incumbensa architectonica è vegnida publitgada la fin da l'onn 2006 ina concurrenza d'architectura libra, la quala è vegnida gudagnada da la proposta da Pablo Horvàth, architect, Cuira, ch'è ussa vegnida realisada.

Realisà è vegnì in project d'auta qualitad per l'engrondiment sco er per ils stabiliments da sport al liber che persvada tant areguard sia concepziun sco er areguard sia funcziunalitad ed areguard sia economia. Il project resguarda las structuras architectonicas existentas ed extenda il stabiliment existent moderadamain per 1100 meters quadrat. Tras la fatschada en betun natiral fa la materialisaziun in connex cun il stabiliment existent, mussa dentant cleramain in'atgna identitad ed in agen caracter. Il tract nov a dus plauns cun ils auditoris e cun la mediateca è accessibel sur ina via curta ed optimala or dal puntg da vista dal manaschi. Quella maina davent dal foyer existent per lung da l'aula. Las localitads cleras procuran per in'atmosfera frestga per emprender en moda concentrada.

Suenter in temp da construcziun da circa in onn e mez ha l'engrondiment ch'è certifitgà tenor Minergie pudì vegnir surdà tenor plan a la SAPGR il zercladur 2010. Ils custs maximals previs da 5.8 milliuns francs han pudì vegnir observads.

Cun questas mesiras architectonicas po la SAPGR optimar cleramain la furmaziun da basa da sias studentas e da ses students, ed a medem temp po ella realisar las furmaziuns supplementaras da las persunas d'instrucziun en ina dimensiun pli gronda. L'engrondiment dat a la scola auta la pussaivladad da realisar en moda effizienta sia incarica legala da prestaziun.