Construcziun innovativa da moduls da lain or dal Grischun
A Cuira vegnan actualmain montads ils emprims moduls da lain per l'alloschi provisoric dal convict. Quests moduls vegnan producids en il Grischun.
Pervia dal grond basegn da sanaziun e pervia dal standard antiquà dal convict da la scola chantunala grischuna a Cuira, ch'era vegnì construì l'onn 1968, dovri urgentamain ina renovaziun cumplessiva. Las lavurs da construcziun cumenzan l'avust 2018, la terminaziun e l'avertura èn planisadas per l'october 2020. Per la fasa da la sanaziun architectonica vegn construì in alloschi provisoric per circa 100 scolaras e scolars sin l'areal al vest da la chasa da scola Cleric, en in lieu central.
In dachasa provisoric amez il campus da scola
L'alloschi provisoric è collià directamain cun la mensa provisorica existenta. Suenter l'avertura da l'edifizi cumplementar da la mensa e da la mediateca al Münzweg la fin da l'onn 2017 n'è la mensa provisorica betg pli vegnida duvrada. Senza midadas da construcziun pli grondas po il pavigliun da lain d'in plaun vegnir transfurmà en moda ideala en in sectur da dimora. Ensemen cun l'alloschi provisoric vegn stgaffì in nov dachasa temporar amez il campus da scola.
Construcziun moderna da moduls da lain per il Grischun or dal Grischun
L'alloschi provisoric che vegn planisà e construì d'ina interpresa grischuna da construcziun en lain, vegn prendì en locaziun per 27 mais. L'edifizi modern da lain ha trais plauns ed è caracterisà tras sia clera divisiun en dus tracts d'abitar ed en in stabiliment da colliaziun. La moda da construcziun è innovativa e persistenta. En tut vegnan ordinads 102 moduls da lain sco chombras singulas e dublas e repartids sin trais plauns. Il plaunterren dispona ultra da quai d'in sectur d'administraziun e da trategniment. Tut ils moduls sa basan sin il medem raster e servan ubain sco chombras ubain sco locals sanitars. Els vegnan producids en ina gronda halla da fabricaziun cun agid d'ina procedura che dispona da la tecnica da computer la pli moderna. Tut ils interiurs, las installaziuns da la tecnica da chasa, las fanestras e las portas sco er la protecziun cunter il sulegl èn premontads. Ils moduls vegnan mo pli mess sin ils fundaments da betun preparà al lieu. Uschia sa laschan il temp ed ils custs da construcziun optimar considerablamain. L'alloschi provisoric vegn collià cun la rait da chalur a distanza da la citad da Cuira. En cumbinaziun cun la construcziun tschernida da moduls da lain resulta in edifizi fitg ecologic e persistent. In motiv per quai è er il fatg ch'ils moduls dals locals, che pon vegnir utilisads en moda multifara, èn reutilisabels. Ina gronda valurisaziun entaifer il chantun sco er la promoziun d'interpresas mesaunas stattan qua en il focus.
Ils custs per l'alloschi provisoric importan 2,9 milliuns francs ed èn cuntegnids en il credit d'impegn dal cussegl grond per la renovaziun dal convict. Il mobigliar per 100 abitantas ed abitants, ch'è previs per la renovaziun dal convict, vegn cumprà gia per l'alloschi provisoric, quai che gida medemamain ad optimar ils custs.
Suenter che la renovaziun dal convict è finida, vegn demontà l'alloschi provisoric. Il locatur dals moduls da lain planisescha d'utilisar quels per in nov intent, principalmain en il sectur turistic, e vul uschia metter in impuls prospectiv.
L'alloschi provisoric vegn inaugurà e surdà a l'utilisader ils 12 d'avust 2018.