La via da Malögia tranter Segl‑Föglias e Plaun da Lej è situada en il sectur da privel da numerus laviners. Actualmain existan mo singulas mesiras da protecziun. Perquai sto la via chantunala vegnir serrada regularmain per motivs da segirezza per tut il traffic. Ina soluziun da tunnel che vegn sclerida actualmain, duai schliar il problem en moda duraivla. En il fratemp duain vegnir prendidas mesiras per augmentar la segirezza.

Il territori dal project sa chatta sin il territori communal da Segl (en Engiadina) e cumpiglia la vart sanestra da la val sur la via chantunala Silvaplauna – Castasegna. Il traject pertutgà è var 3,5 kilometers lung e vegn periclità da 14 laviners principals che tanschan da 2876 meters sur mar fin giu sin la via chantunala ch'è sin var 1800 meters sur mar. L'entira spunda è drizzada vers sidost ed ha per gronda part ina pendenza da passa 35 grads.

Situaziun da partenza

Per motivs da segirezza sto il traject da la via da Malögia tranter Segl‑Föglias e Plaun da Lej vegnir serrà regularmain. Durant ils semesters d'enviern dals ultims decennis è il traject en media vegnì serrà per dus dis, quai cun in dumber maximal dad indesch dis serrads. Las serradas permanentas da questa axa da traffic impurtanta tranter l'Engiadina, la Bregaglia e la Valchiavenna taliana chaschunan perditas economicas da tuttas duas varts dal cunfin. Vitiers vegn la periclitaziun dal traject da via durant la stad tras bovas sco er tras crudada da crappa e da blocca.

Concept da mesiras

Perquai ch'i vegn a durar anc onns, fin ch'in eventual tunnel da sviament po vegnir mess en funcziun, ha il WSL Institut per la perscrutaziun da la naiv e da las lavinas SLF elavurà in concept da mesiras per incumbensa da l'Uffizi da construcziun bassa. Quest concept prevesa da construir pitgas per siglientar lavinas en ina part dals laviners. Suenter che la soluziun da tunnel – che vegn actualmain anc sclerida – è vegnida messa en funcziun, pudessan las pitgas per siglientar lavinas ch'èn lura daventadas obsoletas, vegnir duvradas en auters lieus. Supplementarmain duai vegnir installà in radar a distanza lunga che registrescha automaticamain las lavinas, independentamain da l'aura.

Tut questas mesiras augmentan signifitgantamain la segirezza da las participantas e dals participants dal traffic. Ultra da quai duai l'hotel Chesa Grischa ch'è spezialmain periclità da siglientadas secundaras da lavinas, vegnir segirà tras ina protecziun da l'object. Ils custs stimads dal pachet da mesiras muntan a var 1,57 milliuns francs e vegnan surpigliads da la Confederaziun e dal chantun.

Il project d'exposiziun «Siglientada da lavinas Segl – Plaun da Lej» è exponì publicamain dals 23 da favrer 2022 fin ils 24 da mars 2022. Suenter l'approvaziun tras la Regenza duai il project vegnir realisà l'atun 2022. La finiziun dals stabiliments è planisada per l'enviern 2022/23.

Plan agiuntà: