Mez avust 2013 han cumenzà las lavurs da construcziun per l'access a la via da la Lumnezia. Tras quest project vegn il center da la citad da Glion distgargià efficaziamain dal traffic da transit en direcziun da Sursaissa, da la Lumnezia e da la Val S. Pieder sco er dal territori industrial. Ins quinta cun in temp da construcziun da 4 fin 5 onns.

L'entir traffic che vegn da la citad da Glion e da las vals lateralas da la vart dretga dal Rain e che vul ir vers la via sursilvana vegn manà oz sur la punt dal Rain e sur il passadi da la Viafier retica. Cur che la barriera è serrada, resultan regularmain colonnas pli lungas pervia dals numerus trens che passan. Tras il nov access a la via da la Lumnezia en il vest da Glion duai il center da la citad vegnir distgargià dal traffic da transit.

Suenter che l'emprim material d'emplenida è vegnì deponì l'onn passà tar il nov access a la via sursilvana, han cumenzà mez avust 2013 las lavurs da construcziun cun las mantunadas per il nov trassé da la via en il territori da Runcaleida.

A partir da la primavaira 2014 vegn construida la nova punt dal Rain "Glion vest" che ha ina lunghezza da ca. 270 m. Ella duai esser terminada la fin da l'atun 2015. Er a partir da l'onn 2014 vegn la Via Crappa Grossa transfurmada en la nova via d'access a la rundella "Glion vest". Durant la restructuraziun da la via sursilvana e durant la construcziun da la rundella "Glion vest" vegn questa via duvrada sco deviaziun provisorica.

A medem temp sco la construcziun da la punt dal Rain "Glion vest" vegn realisada l'onn 2015 – sin la mantunada ch'è avant maun fin lura – la rundella "Via da la Lumnezia" cun ils access a la via da la Lumnezia ed a la via da Val S. Pieder resp. a la Via Sogn Martin.

La restructuraziun da la via sursilvana cun la rundella "Glion vest" e cun ils roms da colliaziun è previsa l'onn 2016. La finala po il nov sviament vegnir surdà previsiblamain al traffic la fin da l'atun 2016.

Ils custs da l'entir project importan circa 26 milliuns francs. Il patrun da construcziun e las interpresas incumbensadas sa stentan da limitar uschenavant sco pussaivel l'impediment per il traffic sco er las emissiuns da construcziun. Tuttina vegnan tscherts disturbis ad esser inevitabels. La patruna da construcziun supplitgescha per la chapientscha necessaria.