En mintga communitad moderna fa la promoziun da la sanadad e la prevenziun part da las incumbensas centralas dal stadi. Il Post spezialisà per la promoziun da la sanadad infurmescha, sensibilisescha e motivescha la populaziun grischuna da tgirar en atgna responsabladad ina moda da viver che promova la sanadad. En collavuraziun cun las vischnancas, cun las scolas e cun ulteriurs acturs vegnan stgaffidas il medem mument cundiziuns da viver e da lavurar che promovan la sanadad.

La promoziun da la sanadad e la prevenziun mettan il focus sin esser saun, restar saun e daventar saun. Cun sanadad è manegià en quest connex tant il bainesser corporal sco er il bainesser psichic e social. En la pratica vai per rinforzar las resursas da sanadad da las persunas e per minimar ils facturs da ristga. Impurtant en quest connex n'è betg mo il cumportament da la singula persuna. I va er per stgaffir structuras e cundiziuns da viver che promovan la sanadad.