La Regenza ha deliberà il sboz per ina nova Lescha davart la promoziun d'abitaziuns. Cun quel duai per l'ina vegnir extendì l'instrument da promoziun cumprovà da l'uschenumnada meglieraziun da las relaziuns d'abitar en il territori da muntogna. Per l'autra vegni staffì in nov instrument da promoziun: il sustegn da purtaders d'abitaziuns d'utilitad publica per construir abitaziuns da locaziun favuraivlas.
La legislaziun davart la construcziun d'abitaziuns socialas e la meglieraziun da las relaziuns d'abitar en il territori da muntogna (MRA) datescha dals onns 1980. Cun ina nova lescha duai vegnir tegnì quint dals svilups e da las discussiuns areguard la stgarsezza d'abitaziuns ed areguard l'augment dals pretschs d'abitaziuns, che han cumenzà avant in pèr onns ed èn s'accentuads suenter la pandemia da corona. La stad 2023 ha il Departament d'economia publica e fatgs socials (DES) organisà in barat d'infurmaziuns e d'experientschas cun las represchentantas ed ils represchentants interessads da las vischnancas grischunas davart il tema «stgarsezza d'abitaziuns». Suenter quest barat ha il chantun publitgà in'analisa da las basas davart il tema abitaziuns en il chantun.
Ultra da quai sa tracti d'ademplir duas incumbensas ch'il Cussegl grond ha acceptà en la sessiun da zercladur 2023. L'incumbensa Derungs concernent l'adattaziun da la promoziun da la construcziun d'abitaziuns ha la finamira d'extender la MRA da fin ussa, entant che l'incumbensa da la fracziun da la PS concernent la promoziun d'abitaziuns pretenda en emprima lingia ina promoziun dals purtaders d'abitaziuns d'utilitad publica, quai per cumplettar la promoziun federala.
Extensiun da la pratica da promoziun da fin ussa
La mesira da l'uschenumnada MRA, pia la meglieraziun da las relaziuns d'abitar en il territori da muntogna, na duai betg mo vegnir cuntinuada, mabain er extendida. En il rom da la MRA vegnan pajadas contribuziuns a fonds perdu a famiglias u a persunas en relaziuns finanzialas modestas per acquistar, construir u renovar in edifizi d'abitar. Per onn stattan tut en tut a disposiziun meds finanzials chantunals da var 1,3 milliuns francs per quest intent. Cun questa summa vegnan promovids circa 20 projects.
Da nov duain vegnir previs almain 2 e maximalmain 5 milliuns francs per quest intent. Ultra da quai vegnan abolidas las limitas d'entradas e da facultad, quai per engrondir il circul da las persunas che po profitar d'ina promoziun.
Nova promoziun da purtaders d'abitaziuns d'utilitad publica
La Confederaziun promova la construcziun, l'acquisiziun e la renovaziun d'abitaziuns da locaziun favuraivlas tras purtaders d'abitaziuns d'utilitad publica. Ils meds finanzials per quest intent metta ella a disposiziun en dus uschenumnads fonds da rotaziun, che vegnan administrads da las duas organisaziuns da tetg «Alloschament Svizra» ed «Associaziun da las societads cooperativas per la construcziun d'abitaziuns Svizra». Ils purtaders d'abitaziuns d'utilitad publica ch'èn commembers d'ina da questas duas organisaziuns pon survegnir per abitaziun emprests da 15 000 fin 60 000 francs a tschains moderads.
Ussa planisescha il chantun ina promoziun cumplementara a quai. Supplementarmain a la promoziun federala conceda el medemamain in emprest da la medema autezza ad in tschains moderà e sut las medemas cundiziuns. Il tschains minimal fixescha el sin 0,5 pertschient. Tar la Confederaziun importa tal 1 pertschient. Supplementarmain a l'emprest conceda el plinavant ina contribuziun à fonds perdu da 2 pertschient dals custs d'investiziun, quai per rinforzar la basa da l'agen chapital dals purtaders, che sto importar almain 10 pertschient dals custs d'investiziun.
Per finanziar ils emprests duai vegnir constituì in fond da rotaziun. Per quest intent è planisà in credit d'impegn da 15 milliuns francs ad interim per 10 onns. Per finanziar las contribuziuns duai star a disposiziun in credit d'impegn da 4 milliuns francs a temp limità.
Ils documents da consultaziun èn ussa disponibels
La consultaziun tar la Lescha davart la promoziun d'abitaziuns (LPA) dura dals 13 da zercladur fin ils 15 da settember 2024. Ils documents correspundents pon vegnir consultads sin la pagina d'internet dal chantun Grischun.
Infurmaziuns
Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 10.00 fin las 11.00), e‑mail Marcus.Caduff@dvs.gr.ch