In incap relevant è in eveniment extraordinari en in lieu da producziun, en in lieu da deposit u sin ina via da traffic, che ha influenzas negativas considerablas per l'ambient circumdant e per la populaziun pertutgada. La prevenziun d'incaps relevants ha l'intent d'evitar accidents sco quel da l'onn 2009 en la staziun da Viareggio (I), nua ch'in tren da martganzia cun gas da butan liquid è ì sur ils binaris ora, cun la consequenza che explosiuns han chaschunà circa 30 mortoris. Perquai prevesa la legislaziun federala ch'ils chantuns resguardian la prevenziun d'incaps relevants en la planisaziun directiva ed en la planisaziun d'utilisaziun sco er en lur ulteriuras activitads che han in effect sin il territori (art. 11 al. 1 da l'Ordinaziun davart ils incaps relevants [OPIR; CS 814.012]). Cun cumplettar il plan directiv en il sectur da la prevenziun d'incaps relevants ademplescha il chantun Grischun las pretensiuns legalas respectivas.