Dumonda Pedrini concernent la participaziun dal chantun Grischuna la conferenza da la Svizra taliana per la furmaziun supplementara da persunas creschidas
Sessiun: 08.12.2009
La conferenza da la Svizra taliana per la furmaziun supplementara da persunas creschidas è l'uniun da tetg per la furmaziun supplementara da persunas creschidas en la Svizra taliana.
Fin il zercladur 1998 n'existiva nagina uniun da tetg en il sectur da la furmaziun supplementara da persunas creschidas en la Svizra taliana. L'interess per ina tala uniun è naschì cunzunt tras il 1. festival naziunal da la furmaziun supplementara l'onn 1996. Questa occurrenza ha mussà l'interess e la necessitad d'instituir formalmain ina plattafurma che permetta a las instituziuns publicas e privatas che porschan furmaziuns supplementaras en la Svizra taliana, d'emprender ad enconuscher ina l'autra e da sa barattar.
En il senn dals art. 60 ss. dal cudesch civil svizzer è alura vegnida fundada il zercladur 1998 in'uniun cun il num "conferenza da la Svizra taliana per la furmaziun supplementara da persunas creschidas (CFC)". Ella è independenta da partidas e da confessiuns ed ha la finamira da construir ina rait tranter las organisaturas ed ils organisaturs da furmaziuns supplementaras per formular propostas cuminaivlas a favur da la politica da furmaziun supplementara da persunas creschidas e per als represchentar davant las autoritads e davant la publicitad.
Dapi l'onn 1999 ha l'uniun in secretariat che garantescha la promoziun, l'organisaziun e la coordinaziun da las activitads. Sias activitads vegnan sustegnidas da l'uffizi per la furmaziun professiunala dal chantun Tessin sin basa da la lescha davart la cussegliaziun da scola e da professiun e davart la furmaziun professiunala e supplementara (dals 4 da favrer 1998, midada ils 16 d'october 2006) sco er sin basa da l'ordinaziun executiva respectiva (dals 20 d'october 1998, actualmain en revisiun).
La radunanza da la CFC reunescha expertas ed experts, instituziuns publicas e privatas, centers da scolaziun, uniuns e manaschis ch'èn activs en il sectur da la furmaziun supplementara da persunas creschidas en la Svizra taliana.
La CFC è in post da coordinaziun e da barat d'infurmaziuns per tut las expertas e per tut ils experts sco er per tut las persunas ch'èn responsablas per la furmaziun supplementara da persunas creschidas.
Las sutsegnadras ed ils sutsegnaders, che represchentan il Grischun dal sid en il cussegl grond, dumondan la regenza:
1. È il chantun Grischun commember da la conferenza da la Svizra taliana per la furmaziun supplementara da persunas creschidas?
2. Sustegna il chantun Grischun ils sforzs da la conferenza cun ideas e cun daners?
3. En cas ch'igl èn avant maun impediments legislativs: È la regenza pronta da suttametter al cussegl grond ina proposta per eliminar tals?
Cuira, ils 8 da december 2009
Pedrini, Bondolfi, Mengotti, Cahannes Renggli, Fasani, Plozza, Righetti, Toschini, Zanetti, Cattaneo
Resposta da la regenza
En la "federaziun svizra per la furmaziun da creschids (FSFC)" èn unidas las instituziuns e las organisaziuns da furmaziun supplementara publicas e privatas ch'èn activas en Svizra sco er persunas singulas. La FSFC è activa en tut la Svizra e maina in secretariat naziunal a Turitg sco er mintgamai in secretariat regiunal en la part franzosa ed en la part taliana da la Svizra. Quests secretariats garanteschan in bun entretschament linguistic cun las regiuns. La "conferenza della Svizzera italiana per la formazione continua degli adulti (CFC)" è commembra da la FSFC.
Tranter la FSFC e la conferenza svizra da las directuras e dals directurs chantunals da l'educaziun publica CDEP datti ina cunvegna da prestaziun che regla las prestaziuns da la FSFC per la furmaziun supplementara en il senn da la CDEP respectivamain en il senn da tut ils chantuns. Per la perioda da contract 2010 fin 2013 survegn la FSFC da la CDEP ina contribuziun da gestiun annuala da 175'000 francs. Entaifer la CDEP è la conferenza interchantunala per la furmaziun supplementara (CIFS) responsabla per dumondas da la furmaziun supplementara. En la CIFS èn represchentads tant il chantun Grischun sco er il chantun Tessin. Per incumbensa da la CDEP sa participescha ina commembra u in commember da la CIFS sco giast a las sesidas da la suprastanza da la FSFC sco er a las radunanzas annualas da las delegadas e dals delegads. Sin basa da l'incarica da prestaziun tranter la CDEP e la FSFC vegnan planisadas e coordinadas en tut la Svizra ils sforzs che vegnan fatgs concernent la furmaziun supplementara per persunas creschidas. Ils chantuns Tessin e Grischun èn integrads en quest sistem grazia a lur commembranza en la CIFS.
En Il Grischun promova la cuminanza da lavur per la furmaziun da persunas creschidas dal Grischun (FPCGR) la collavuraziun tranter las instituziuns ed ils purschiders da furmaziun supplementara, sveglia la chapientscha publica per la furmaziun supplementara e sustegna las commembras ed ils commembers en lur activitads. La FPCGR cuntanscha sias finamiras cun promover la collavuraziun sin plaun chantunal, cun barattar vicendaivlamain infurmaziuns ed experientschas sco er cun realisar singulas acziuns ed occurrenzas che naschan da la situaziun e che sa chattan en l'interess da las commembras e dals commembers. Commembras e commembers da la FPCGR èn persunas singulas che s'interessan per la furmaziun da persunas creschidas, instituziuns che porschan u che promovan activitads da la furmaziun da persunas creschidas en il Grischun sco er firmas u instituts da furmaziun supplementara entaifer il manaschi.
Dapi onns exista in barat d'infurmaziuns regular tranter la FPCGR e l'uffizi per la furmaziun media-superiura (UMS) che sustegna la FPCGR tar lavurs da secretariat e per projects singuls. Uschia per exempel tar la realisaziun dal festival d'emprender che ha puspè lieu ils 10 ed ils 11 da settember 2010. En quest connex vegn concedida sin dumonda ina contribuziun a la FPCGR. Ina tala survegn la FPCGR er da la confederaziun, numnadamain da l'uffizi federal da furmaziun professiunala e da tecnologia (UFFT). En la gasetta da la furmaziun supplementara che cumpara la primavaira vegn regularmain fatg attent a las activitads da la FPCGR. Davart il festival d'emprender 2008 ha il UMS producì in purtret per la televisiun e per l'internet.
Davart las dumondas concretas prenda la regenza posiziun sco suonda:
1. Il chantun Grischun n'è betg commember da la conferenza da la Svizra taliana per la furmaziun da persunas creschidas.
2. La regenza beneventa ils sforzs da la conferenza ed als resguarda sco ina contribuziun preziusa en il sectur da la furmaziun da persunas creschidas. Sur sia commembranza en la CDEP paja il chantun Grischun er ina contribuziun finanziala per quests sforzs. En il Grischun datti la cuminanza da lavur FPCGR, cun la quala l'uffizi per la furmaziun media-superiura ha regularmain contact per tractar dumondas da la furmaziun da persunas creschidas. Ina collavuraziun tranter la conferenza da la Svizra taliana per la furmaziun da persunas creschidas e la cuminanza da lavur FPCGR po vegnir examinada da tut temp da questas duas instituziuns.
3. La lescha davart la furmaziun professiunala e davart purschidas da furmaziun cuntinuanta (LFurm; DG 430.000) ha cun l'art. 28 ina basa legala suffizienta per il sectur da la furmaziun supplementara.
17 da mars 2010