Incumbensa da la fracziun da la PS concernent l'elavuraziun d'in rapport davart la povradad e davart il cumbat cunter quella
Sessiun: 15.02.2010
L'onn 2010 è vegnì designà sco "Onn europeic dal cumbat cunter la povradad e cunter l'exclusiun sociala". En quest connex ha l'organisaziun d'agid Caritas proclamà la finamira da reducir la povradad en Svizra ils proxims 10 onns sin la mesadad.
Avant 4 onns aveva la Caritas gia renvià al fatg ch'i vivian en Svizra 1 milliun umans en povradad. Tenor las indicaziuns las pli novas da questa organisaziun d'agid renconuschida è il dumber sa reducì levamain en il fratemp. La fin da l'onn 2009 sajan 896'000 umans stads pertutgads da povradad en Svizra. Quai vul dir che quests umans pudessan far diever d'agid dal stadi. Autras stimaziuns partan da l'ipotesa che var 700'000 persunas sajan pertutgadas da povradad. Questas differenzas tar la calculaziun da la quota da povradad resultan, sch'i vegnan consideradas las persunas che retiran prestaziuns socialas. Tenor indicaziuns da la Caritas han dentant mo 26 pertschient da las persunas povras fatg diever l'onn 2007 da lur dretg sin agid social.
Surprendentamain n'è la situaziun da povradad da blers umans en noss pajais resp. en ils singuls chantuns strusch registrada exactamain. Tenor sias stimaziuns quinta la Caritas dentant che almain 260'000 uffants stoppian crescher si en povradad en noss pajais. Perquai spetga il directur da la Caritas da la politica ch'i vegnian elavuradas permanentamain las datas necessarias davart la povradad.
In rapport social cumplessiv – sco quel ch'il chantun Berna ha per exempel publitgà l'onn 2008 – na datti betg en noss chantun fin ussa. In rapport davart la povradad cumbinescha tranter auter analisas statisticas da la situaziun cun recumandaziuns d'agir per ina politica moderna davart la povradad che investescha en ils umans ed en lur pussaivladads. Sin plaun federal è il cussegl federal actualmain londervi da formular ina strategia per cumbatter la povradad. Tenor in rapport en la NZZ dals 16 da schaner 2010 saja quest rapport, ch'è vegnì fatg per incumbensa dal parlament federal, dentant vegnì en retard. En l'elavuraziun dal rapport da la confederaziun sajan tranter auter er vegnids involvids ils chantuns. Damai che la povradad sa preschenta en furmas differenziadas en las diversas parts dal pajais, èsi necessari che er ils chantuns elavureschian – ultra da la confederaziun – lur strategia specifica per reducir la povradad.
La regenza vegn perquai envidada d'elavurar in rapport davart la povradad (rapport social), ch'è orientà a la situaziun speziala dal chantun Grischun, e da suttametter quel al cussegl grond ensemen cun eventualas propostas per cumbatter la povradad en moda efficazia.
Cuira, ils 15 da favrer 2010
Jäger, Arquint, Baselgia-Brunner, Bucher-Brini, Frigg-Walt, Gartmann-Albin, Jaag, Menge, Meyer Persili (Cuira), Peyer, Pfenninger, Pfiffner-Bearth, Thöny, Trepp, Locher Benguerel
Resposta da la regenza
La regenza sa fatschenta dapi daditg cun il tema povradad e cun il cumbat cunter quella. Numerusas meglieraziuns èn vegnidas fatgas per mitigiar en etappas la problematica da la povradad. Infurmaziuns davart la situaziun da povradad en il Grischun sa resultan or da la statistica d'agid social che l'uffizi federal da statistica (UST) fa dapi l'onn 2002. Il dumber da las persunas basegnusas dependa considerablamain da la definiziun da la povradad. I na dat nagina definiziun da la povradad che vegn renconuschida en general. Ils dumbers da cas dals servetschs socials dattan infurmaziuns alternativas davart la problematica da la povradad.
En il rapport da famiglia, ch'il cussegl grond ha tractà en la sessiun da favrer 2007, è vegnida preschentada la problematica da la povradad da famiglias e da chasadas d'ina persuna ed èn vegnidas formuladas singulas mesiras. Las mesiras èn vegnidas realisadas per gronda part e pertutgan la legislaziun da taglia, la reducziun da las premias, la legislaziun da stipendis, ils supplements per uffants e la calculaziun da l'agid social (cf. latiers la missiva da la regenza per mauns dal cussegl grond, carnet nr. 15/2006-2007 p. 1713 ss.). En il rom da la discussiun parlamentara èn er vegnidas formuladas mesiras en ils secturs da la purschida da cussegliaziun per famiglias e da la tgira d'uffants cumplementara a la famiglia.
Entaifer l'administraziun vegnan actualmain analisads – sin basa da datas actualas – ils effects marginals da las prestaziuns da transfer socialas per meglierar la coordinaziun sco er per mitigiar ils impuls negativs. Questa analisa vegn fatga en vista ad ina revisiun futura da la legislaziun davart l'agid social e davart il sustegn. Sin fundament da la constataziun che persunas giuvnas creschidas en la vegliadetgna da 18 fin 25 onns èn pli e pli dependentas da l'agid social, examinescha la gruppa directiva CII actualmain mesiras en connex cun l'integraziun da persunas giuvnas creschidas.
En connex cun il "onn europeic dal cumbat cunter la povradad e cunter l'exclusiun sociala 2010" han differentas ovras d'agid e federaziuns spezialisadas (Caritas, COSAS) fatg e publitgà rapports davart la povradad e davart la discrimi-naziun sociala. Las directuras ed ils directurs chantunals dals affars socials vulan preschentar lur agen program per cumbatter la povradad il zercladur en il rom da la radunanza annuala da la CDAS.
Il cusseglier federal Didier Burkhalter ha preschentà ils 31 da mars 2010 il rapport cun il titel "Strategia naziunala per cumbatter la povradad" ch'è vegnì deliberà dacurt dal cussegl federal. Quel cuntegna la descripziun dals problems e dals champs d'acziun impurtants. Tenor quest rapport sa preschenta la problematica da povradad en Svizra il pli cler en ils sis secturs tematics suandants: 1. Uffants en famiglias basegnusas, 2. Transiziun en la furmaziun ed en la vita professiunala, 3. Povradad da famiglia, 4. Dischoccupaziun da lunga durada, 5. Povradad en la vegliadetgna, 6. Prestaziuns necessarias senza effects marginals e meglra coordinaziun.
En vista als programs ed als rapports ch'èn vegnids elavurads en conferenzas sin plaun naziunal ed europeic e che vegnan declerads sco exemplarics sco er en vista a las strategias ed a las mesiras preschentadas en quels, è la regenza da l'avis ch'i na saja betg cunvegnent da laschar far in rapport davart la povradad u davart l'agid social ch'è orientà expressivamain a la situaziun speziala dal Grischun. Plitost duain sco fin ussa singulas mesiras en ils secturs identifitgads vegnir examinadas concernent lur efficacitad per il Grischun e realisadas senza ulteriur retard. Tar questas mesiras s'orientescha la regenza als champs d'acziun ch'il cussegl federal ha definì en ses rapport.
La regenza propona perquai da refusar l'incumbensa da la fracziun da la PS.
6 da matg 2010