En l'incumbensa vegni explitgà ch'i na saja betg previs ni en la lescha per promover la protecziun da la natira e da la patria ni en l'ordinaziun davart las meglieraziuns da structura da garantir cunvegnas da cultivaziun cun agid da servituts. I vegn pretendì ch'i na dastgan vegnir fatgas naginas cunvegnas da cultivaziun durant proceduras da meglieraziun (1) e che cunvegnas tranter l'uffizi per la natira e l'ambient (UNA) e las furnituras ed ils furniturs da prestaziuns duain vegnir fatgas mo en furma da contracts limitads da dretg public (2).

Tar mesira 1
Ils concepts d'entretschament en il rom da mesiras cuminaivlas cumplessivas (meglieraziuns generalas) sa basan sin l'art. 88 lit. b da la lescha federala davart l'agricultura (LAgr; CS 910.1) e tranter auter sin cartaziuns da prads. Questas cartaziuns furman la basa per contracts da cultivaziun tranter las cultivaturas ed ils cultivaturs ed il chantun Grischun. Las cultivaturas ed ils cultivaturs han il dretg da survegnir contribuziuns ecologicas da qualitad che vegnan deliberadas da quests contracts. En cas da novas repartiziuns vegnan quests contracts substituids dals contracts cun las novas cultivaturas e cun ils novs cultivaturs. En proceduras da meglieraziun dura la perioda tranter ils scleriments ecologics e la surdada da las parcellas a las novas proprietarias ed als novs proprietaris plirs onns (en cas da Ra-mosch almain diesch onns). Pervia da quai na fissi ni raschunaivel ni en l'interess da las puras e dals purs pertutgads, sch'i na pudessan vegnir fatgas naginas cunvegnas durant quest temp e sche las puras ed ils purs na survegnissan pervia da quai naginas contribuziuns ecologicas da qualitad.

Tar mesira 2
La confederaziun na prescriva betg detagliadamain als chantuns cun tge meds ch'els ston ademplir lur incumbensas en il sectur da la protecziun da la natira e da la cuntrada. Differents instruments (p.ex. mesiras da la planisaziun dal territori, relaschs, disposiziuns, contracts da dretg public e da dretg privat) als stattan a disposiziun.

Tenor l'art. 18a da la lescha federala davart la protecziun da la natira e da la patria (LNP; CS 451) reglan ils chantuns la protecziun ed il mantegniment dals biotops d'impurtanza naziunala. Cun mesiras d'urgenza adequatas ston els procurar ch'il stadi dals objects na sa pegiurescha betg, uschè ditg ch'i n'èn betg vegnidas prendidas mesiras da protecziun e da mantegniment (cf. art. 7 da l'ordinaziun davart las palids planivas ed art. 10 da l'ordinaziun davart ils prads sitgs). Tenor l'art. 18b LNP procuran ils chantuns per la protecziun e per il mantegniment dals biotops d'impurtanza regiunala e locala. Sa basond sin il plan directiv chantunal (p. 59) sco er tenor la pratica vegn la protecziun fatga cun cunvegnas da dretg privat, uschè ditg ch'ils objects na vegnan betg protegids en il rom da la planisaziun d'utilisaziun. Ils contracts da servituts persunalas ch'il chantun fa cun las novas proprietarias e cun ils novs proprietaris da bains immobigliars en cas da meglieraziuns, cur che la nova repartiziun è terminada, cuntegnan in scumond da ruinar activamain las surfatschas da la protecziun da la natira (p.ex. scumonds generals da construir e differents scumonds d'utilisaziun) e renvieschan en cas da la cultivaziun als contracts tranter il chantun e la cultivatura u il cultivatur. Pia na vegnan betg segiradas las cunvegnas da cultivaziun cun servituts, mabain l'ulteriura existenza da las surfatschas da la protecziun da la natira. Quest proceder è sa cumprovà, perquai ch'i vegn communitgà uschia a las proprietarias ed als proprietaris da bains immobigliars ch'i saja avant maun ina surfatscha da la protecziun da la natira e perquai ch'i po vegnir evità uschia che quella – sco ch'i capita savens senza intenziun – vegnia ruinada u destruida. Servituts persunalas servan er a segirar giu-ridicamain las mesiras da cumpensaziun ecologica per las intervenziuns tecnicas ch'èn colliadas cun meglieraziuns e che pertutgan spazis da viver ch'èn degns da vegnir protegids. Tenor l'art. 18 al. 1ter LNP ston talas mesiras da cumpensaziun – sco quai ch'igl è er il cas tar cumpensaziuns da la runcada – vegnir segiradas a lunga vista en lur existenza. Entant che surfatschas da plantaziuns cun bostgs valan da bel principi sco guaud, ston lieus che èn l'object da mesiras da cumpensaziun tenor la LNP e che han tut tenor pir en in pèr onns la qualitad d'in biotop vegnir segirads en in'autra moda, p.ex. tras servituts.

Cun far contracts da dretg public per in temp limità na sa lascha betg cuntanscher ina protecziun a lunga vista da surfatschas da la protecziun da la natira. Per cuntanscher quai stuessan ils contracts da dretg public vegnir cumbinads cun disposiziuns. Las restricziuns da la proprietad tenor il dretg public che vegnan ordinadas cun la disposiziun pudessan daventar liantas per las proprietarias e per ils proprietaris da bains immobigliars, sch'ellas vegnissan remartgadas en il register funsil. La regenza è da l'opiniun che la conclusiun da contracts da servitut saja ina via pli simpla per cuntanscher ina protecziun a lunga vista da surfatschas da la protecziun da la natira.

Per garantir la protecziun lianta per las autoritads sco er per las proprietarias e per ils proprietaris da bains immobigliars datti ultra da quai la pussaivladad da segirar biotops fixond quels en il plan da zonas u en il plan general da furmaziun. La consequenza da quai fiss che las vischnancas stuessan reveder lur planisaziuns localas anc durant che las meglieraziuns èn en curs. Quai fiss – gia per motivs da l'economica da la procedura – la varianta la pli nauscha da las trais variantas.

Sin basa dals motivs preschentads propona la regenza al cussegl grond da betg acceptar l'incumbensa.

24 da zercladur 2010