Ils ultims trais onns è il pass dal Bernina vegnì serrà pliras giadas pervia dals envierns fitg severs. Il problem n'è betg quel che la via na pudess betg vegnir rumida, mabain quel dal privel da lavinas che periclitescha la via sin autezza dal culm dal pass a trais lieus enconuschents.
Per eliminar quest problem èn vegnids installads stabiliments che protegian cunter il vent e che impedeschan che mantuns privlus da naiv sa furman. Ultra da quai èn vegnidas installadas pitgas per siglientar lavinas per telecumond.
Ils 23 da mars 2010 è il pass vegnì serrà temporarmain per che differentas chargias explosivas han pudì vegnir envidadas per segirar uschia il pass, suenter ch'igl aveva navì fermamain e suenter che las temperaturas eran s'augmentadas considerablamain.
A las 15.30 dal proxim di è – cunter tuttas aspectativas – ida giu ina lavina ad in dals trais lieus enconuschents ed ha sepulì sut sai la via ch'è puspè stada averta per il traffic. Avant che la via ha pudì vegnir rumida, ha l'unitad speziala da la Rega stuì vegnir clamada per excluder che umans sajan vegnids sepulids da la lavina. Las persunas al lieu n'han betg pudì dir cun segirezza che la lavina n'haja betg stratg cun sia insatgi. Per fortuna è l'unica consequenza da questa lavina stada quella che la via è stada serrada per duas uras.
L'utilisaziun da chargias explosivas è a curta vista la soluziun la pli economica, dentant segir betg la pli segira. Questa soluziun metta las persunas responsablas che ston decider, cur ch'il pass sto vegnir serrà e cur ch'el po puspè vegnir avert, sut in squitsch fitg grond e chargia si ad ellas ina responsabladad enorma. En cas da dubi decidan ellas per precauziun da serrar il pass.
Schebain che jau ma sun conscient ch'i na dat betg ina segirezza totala sin las vias e che las autoritads superiuras èn dentant obligadas da dar l'emprima prioritad a la minimisaziun da las ristgas fatsch jau las suandantas dumondas a la regenza:
1. Tgi avess purtà la responsabladad, sche quest eveniment fiss ì a fin cun ina disgrazia?
2. È la regenza da l'avis ch'ina soluziun cun trais galarias als trajects da la via ch'èn periclitads da lavinas saja ina soluziun segira ed er economica a lunga vista, sch'ins tegna quint da las entradas che l'economia regiunala ha pers pervia da las serradas dal pass permanentas ed intschertas?
3. Èsi pussaivel – en il rom da l'augment da las investiziuns chantunalas per cumbatter la crisa economica – da realisar questas trais galarias en etappas ils proxims trais onns?
Cuira, ils 21 d'avrigl 2010
Mengotti, Plozza, Arquint, Bezzola (Samedan), Bezzola (Zernez), Bondolfi, Brantschen, Butzerin, Campell, Casparis-Nigg, Casty, Casutt, Caviezel (Pitasch), Christoffel-Casty, Conrad, Fasani, Giovanoli, Hartmann (Champfèr), Jenny, Keller, Kessler, Koch, Noi-Togni, Parolini, Pedrini, Peer, Perl, Ratti, Righetti, Stoffel, Tenchio, Toschini, Clalüna, Cortesi, Furrer-Cabalzar, Largiadèr
Resposta da la regenza
La segirezza dal pass dal Bernina durant l'enviern è in tema che vegn discutà intensivamain dapi onns. Igl ha er dà differentas examinaziuns, divers studis da project e differentas discussiuns, inspecziuns e correspundenzas en chaussa.
Il mars 2007 ha la regenza approvà in project da mesiras che ha la finamira da reducir las ristgas da segirezza sin il pass dal Bernina. Quellas mesiras vegnan realisadas en etappas dapi la stad 2007. Ils emprims dus onns èn oravant tut vegnids construids rempars da lavinas e cruschs da vent. A partir da la stad 2009 è il terren vegnì allontanà en il territori da Camin e las pendicularas da siglientar che existivan en il territori da Baracon èn vegnidas remplazzadas tras trais pitgas da siglientar.
Sin basa da las experientschas ch'èn vegnidas fatgas en auters lieus resguardan ils spezialists da lavinas il territori da Baracon sco lieu ideal per pitgas da siglientar, perquai che la precisiun da siglientar ha pudì vegnir augmentada fermamain remplazzond las pendicularas da siglientar, e las ristgas per il persunal da manaschi han pudì vegnir reducidas praticamain a nulla grazia a la pussaivladad da laschar detunar il material explosiv per telecumond. Ultra da quai pon er vegnir fatgas siglientadas la notg, pia cur ch'igl ha pauc traffic. Uschia pon ils impediments dal traffic vegnir reducids.
Quasi tut las mesiras ch'èn vegnidas concludidas per augmentar la segirezza durant l'enviern èn realisadas oz. Il temp da manaschi vertent è però memia curt per avair rimnà gia avunda experientschas e per pudair far in giudicament definitiv. Emprimas enconuschientschas dal persunal da manaschi e da las persunas ch'èn responsablas per la segirezza mussan però che las mesiras èn sa cumprovadas durant l'ultim mez onn d'enviern. L'uffizi da construcziun bassa e l'uffizi forestal vegnan ad observar vinavant l'effect da las mesiras ch'èn gia vegnidas prendidas per pudair realisar – en cas da basegn – ulteriurs meglieraments necessaris.
Davart las dumondas concretas s'exprima la regenza sco suonda:
1. Durant l'enviern resta adina ina tscherta ristga sin las vias da pass. Eveniments sco quel ch'è vegnì menziunà en la dumonda na sa laschan betg evitar dal tuttafatg. Sin basa d'in giudicament da la situaziun respectiva vegni ordinà che la via vegn serrada per in tschert temp. Sco tar blers auters trajects da nossa gronda rait da vias da muntogna ch'èn er periclitads en medema moda e maniera decida er en cas da la via dal Bernina ina squadra da spezialists, cur che la via sto vegnir serrada, e surpiglia la responsabladad per quai.
2. Perquai che l'effect da las mesiras ch'èn vegnidas realisadas ils ultims trais onns na po anc betg vegnir giuditgà definitivamain, resguarda la regenza quai sco memia baud da lantschar gia oz ulteriurs projects per reducir vinavant quels pèr paucs dis che la via dal pass dal Bernina sto vegnir serrada. Sche las mesiras ch'èn vegnidas realisadas dapi l'onn 2007 sa mussan sco memia pauc effectivas, sch'il manaschi da la via dal pass po vegnir meglierà cun ulteriuras mesiras architectonicas da protecziun e sche la segirezza per las participantas e per ils participants da traffic po vegnir augmentada uschia, datti la pussaivladad da metter a disposiziun en il proxim program da construcziun da vias ils meds finanzialas ch'èn necessaris per lur planisaziun e per lur realisaziun.
3. Sin basa da l'explicaziun ch'è vegnida fatga sut la cifra 2 na sa tschenta per entant betg la dumonda davart la realisaziun resp. davart la finanziaziun da las trais galarias che vegnan menziunadas en la dumonda.
7 da fanadur 2010