Tenor la communicaziun da la regenza dal 1. da fanadur 2010 ha la regenza pretendì cun ina brev al cussegl federal ch'i stoppian vegnir prendidas a temp mesiras adattadas per limitar il traffic da transferiment che vegn spetgà pervia da la sanaziun planisada dal tunnel da via tras il Gottard. La ruta dal San Bernardin tranter Tusaun e Mesauc haja grondas muntadas, numerus tunnels, per part stortas stretgas e paucas pussaivladads da surpassar. La capacitad da prestaziun da quest traject saja limitada ed il potenzial da privel saja grond. La regenza fetschia gronds quitads davart la segirezza dal traffic, particularmain en cas d'in augment dal traffic pesant. Per quest motiv dettia la regenza – tenor la communicaziun – paisa ad in'analisa ed ad ina valitaziun conscienziusa e cunzunt er objectiva e realistica da tut ils trajects alternativs e da lur consequenzas.
Il sutsegnader dumonda la regenza da communitgar al parlament, sch'ella ha survegnì en il fratemp ina resposta da la confederaziun ed eventualmain tge ch'ella cuntegna.
La regenza vegn er dumandada d'infurmar il cussegl grond davart las consequenzas ch'il traffic da transferiment pudess avair concretamain per il chantun Grischun e co ch'ella vul s'engaschar per mitigiar la problematica correspundenta.
Cuira, ils 19 d'october 2010
Bondolfi, Kleis-Kümin, Rosa, Albertin, Augustin, Barandun, Blumenthal, Caduff, Caluori, Candinas, Casanova-Maron, Casutt-Derungs, Cavegn, Clavadetscher, Della Vedova, Dermont, Dosch, Engler, Fasani, Fontana, Furrer-Cabalzar, Geisseler, Giacomelli, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jenny, Joos, Kasper, Krättli-Lori, Märchy-Caduff, Meyer-Grass, Michel, Nick, Rathgeb, Righetti, Stiffler (Cuira), Tenchio, Tomaschett (Breil), Troncana-Sauer, Vetsch (Pragg-Jenaz), Wieland, Candrian, Patt
Resposta da la regenza
Ils 20 da fanadur 2010 ha la regenza survegnì ina resposta sin la brev dal 1. da fanadur 2010 adressada al schef dal departament federal per ambient, traffic, energia e communicaziun (DATEC) e menziunada en la dumonda. En quella vegn communitgà che l'uffizi federal da vias laschia actualmain elavurar in concept cumplessiv da mantegniment per il tunnel da via tras il Gottard. En il rom da quest concept sajan ultra da las dumondas da la tecnica da construcziun en spezial dumondas davart il traffic durant las lavurs da renovaziun decisivas per tscherner la varianta. Il parlament federal vegnia previsiblamain a decider l'emprima mesadad da l'onn 2011 davart l'ulteriur proceder. Plinavant garantescha il schef dal DATEC ch'ils interess dal chantun Grischun vegnian resguardads adequatamain.
Independentamain da questa garanzia vegn la regenza a persequitar vinavant cun attenziun las lavurs da projectaziun per la sanaziun dal tunnel tras il Gottard ed eventualmain intervegnir a Berna. Uschia vul la regenza impedir d'ina vart che las grevezzas per l'ambient per lung da la A13 s'augmentian anc pli fitg tras in traffic da transferiment excessiv e da l'autra vart che la segirezza dal traffic sin las duas rampas da la ruta dal San Bernardin tranter Tusaun e Soazza na saja betg pli garantida en cas d'in ferm augment dal traffic pesant.
09 da december 2010