Il chantun Grischun è il patrun il pli grond dal chantun. En il chantun da las 150 vals cun la surfatscha la pli gronda da la Svizra èsi impurtant che l'administraziun chantunala porschia sias plazzas da lavur en moda uschè decentrala sco pussaivel.
Per mai sa tschentan las suandantas dumondas:
1. Quantas plazzas da lavur porschan ils singuls uffizis da l'administraziun chantunala en tge regiuns (quintadas sco plazzas a temp cumplain)?
2. È la regenza da l'avis che la dimensiun da la decentralisaziun saja gia exaurida? Sche na, en tge secturs datti in potenzial?
Cuira, ils 19 d'october 2010
Candinas, Parolini, Michel, Aebli, Albertin, Augustin, Berther (Camischolas), Blumenthal, Brandenburger, Buchli-Mannhart, Caduff, Caluori, Campell, Casutt, Casutt-Derungs, Cavegn, Clalüna, Clavadetscher, Conrad, Darms-Landolt, Della Vedova, Dermont, Dosch, Engler, Fallet, Fasani, Florin-Caluori, Fontana, Frigg-Walt, Furrer-Cabalzar, Gartmann-Albin, Giacomelli, Grass, Hardegger, Heiz, Hitz-Rusch, Jeker, Jenny, Joos, Kasper, Kleis-Kümin, Koch (Tamins), Koch (Landquart), Kollegger (Cuira), Kollegger (Malix), Krättli-Lori, Kunz (Fläsch), Lorez-Meuli, Mani-Heldstab, Märchy-Caduff, Meyer-Grass, Michael (Donat), Michael (Castasegna), Montalta, Müller, Niederer, Niggli-Mathis (Grüsch), Noi-Togni, Papa, Parpan, Pedrini, Pult, Rathgeb, Righetti, Rosa, Sax, Stiffler (Tavau Plaz), Stiffler (Cuira), Tenchio, Tomaschett (Breil), Tomaschett-Berther (Trun), Troncana-Sauer, Vetsch (Pragg-Jenaz), Waidacher, Wieland, Zanetti, Zweifel-Disch, Monigatti
Resposta da la regenza
1. Quantas plazzas da lavur porschan ils singuls uffizis da l'administraziun chantunala en tge regiuns (quintadas sco plazzas a temp cumplain)?
Actualmain èn 4 437 persunas engaschadas tar il chantun Grischun. Questa cifra cumpiglia – ultra da las collavuraturas e dals collavuraturs dals posts da servetsch da l'administraziun centrala – er las collavuraturas ed ils collavuraturs dad 8 instituts chantunals autonoms (senza la banca chantunala grischuna) sco er las collavuraturas ed ils collavuraturs da las dretgiras dal chantun. Las 4 437 persunas sa dividan var 3 758 pensums da lavur cumplains.
Areguard la repartiziun geografica èsi da dir, ch'il lieu da servetsch da circa 64% da las emploiadas e dals emploiads en ils posts da servetsch da l'administraziun centrala e da las dretgiras dal chantun è a Cuira; arrundà correspunda quai a 1 853 plazzas a temp cumplain. Cuira è er il lieu da servetsch da var 66 % da las plazzas a temp cumplain dals 8 instituts chantunals autonoms; arrundà correspunda quai a 575 plazzas a temp cumplain. Da quai resulta che circa in terz da las collavuraturas e dals collavuraturs è activ en lieus decentrals, q.v.d. ordaifer Cuira, en var 116 vischnancas. La part da las plazzas chantunalas decentralisadas è restada pli u main constanta ils ultims onns. La fin dals onns 1990 sco er l'onn 2003 importava ella circa 37 %; ina cifra che divergescha mo lev da la situaziun actuala. In maletg cumparegliabel resulta er tar la banca chantunala grischuna. Entant che circa 66 % da las plazzas a temp cumplain da la banca chantunala grischuna sa concentreschan sin la sedia principala a Cuira, sa repartan quasi 34 % da las plazzas a temp cumplain sin 9 regiuns resp. martgads ordaifer Cuira. Plinavant stoi vegnir renvià al fatg ch'il chantun finanziescha u sustegna numerusas plazzas da lavur decentralas, per exempel en connex cun las allianzas da taglia (ca. 44 plazzas a temp cumplain), cun las corporaziuns regiunalas, en il sectur da la sanadad e da la furmaziun. Per giuditgar la decentralisaziun na sto betg vegnir resguardà – tenor l'avis da la regenza – mo il lieu da lavur, mabain er il lieu da domicil (domicil fiscal). Qua datti ina decentralisaziun pli intensiva, perquai che las collavuraturas ed ils collavuraturs dal chantun (collavuraturas e collavuraturs dals posts da servetsch da l'administraziun centrala e da las dretgiras dal chantun) sa repartan sin 197 differents domicils fiscals. 975 (u circa 30 %) da las collavuraturas e dals collavuraturs abitan a Cuira, 2 055 (u circa 65 %) en autras vischnancas, las ulteriuras collavuraturas ed ils ulteriurs collavuraturs ordaifer il chantun.
2. È la regenza da l'avis che la dimensiun da la decentralisaziun saja gia exaurida? Sche na, en tge secturs datti in potenzial?
La regenza sa stenta da mantegnair e sche pussaivel d'augmentar il – sco ch'ella pensa – bun stadi da plazzas decentralas. Plazzas da lavur vegnan decentralisadas là, nua che quai para raschunaivel per motivs da manaschi. Cun realisar la strategia d'immobiglias ch'è vegnida preschentada al cussegl grond (carnet nr. 6/2009-2010) èn vegnids resp. vegnan installads 9 centers regiunals ch'èn repartids en l'entir chantun. Quests centers regiunals èn gia oz centers administrativs dals posts da servetsch da l'administraziun centrala. En detagl sa tracti qua, ultra da Cuira, dad Igis/Landquart (actualmain 139 persunas/124 plazzas a temp cumplain), da Glion (82 persunas/71 plazzas a temp cumplain), da Roveredo (41 persunas/37 plazzas a temp cumplain), da Tavau (84 persunas/74 plazzas a temp cumplain), da Tusaun (139 persunas/132 plazzas a temp cumplain), da Samedan (70 persunas/65 plazzas a temp cumplain), da Puschlav (23 persunas/20 plazzas a temp cumplain) e da Scuol (47 persunas/44 plazzas a temp cumplain). Grazia a la concentraziun d'unitads administrativas en centers administrativs regiunals duain ins obtegnair in meglier niz per la clientella ("tut sut in tetg"). In'ulteriura organisaziun pli filigrana ed in'ulteriura decentralisaziun locala da l'administraziun chantunala n'è betg raschunaivla dal puntg da vista organisatoric e dal puntg da vista da l'economia da manaschi (custs, process directivs, svilup organisatoric, communicaziun, martgà da lavur).
11 da schaner 2011