En il Grischun survegnan las utilisadras ed ils utilisaders professiunals, sco per exempel las bancas, in access direct al register funsil. Arosa ed ils circuls da register funsil Glion e Claustra han mess sco emprims lur datas dal register funsil en il sistem electronic d'infurmaziuns funsilas (eGRIS). Sur in portal da retschertga che sa cloma Terravis vegnan ils posts administrativs e tschertas firmas a pudair dumandar en il futur infurmaziuns funsilas directamain sin via electronica. La responsabladad per il project è vegnida surdada a la SIX Group, ina societad anonima, controllada da las bancas.
Nus dumandain la regenza il suandant:
1. Pertge n'èn las proprietarias ed ils proprietaris da chasas betg vegnids infurmads (p.ex. tras lur federaziuns) davart l'introducziun previsa dal portal da retschertga Terravis en il chantun Grischun?
2. Co vegn garantida la protecziun da datas en il eGRIS, particularmain en connex cun las remartgas protegidas dal register funsil, las qualas dastgan vegnir communitgadas – tenor la lescha – mo en cas d'in "interess motivà"?
3. Co vegni evità ch'i vegnia fatg abus da datas dal register funsil per intents da reclama u che talas datas vegnian dadas vinavant a persunas nunautorisadas?
4. Tge pussaivladad da controllar l'access a las datas da ses bain immobigliar ha la singula proprietaria u il singul proprietari? Al vegni communitgà – sin sia dumonda – tgi che ha consultà infurmaziuns davart ses bain immobigliar e cura ch'el ha fatg quai?
5. Han er uffizis esters access a questas datas?
Cuira, ils 7 da december 2010
Nick, Tscholl, Kleis-Kümin, Bezzola (Samedan), Bezzola (Zernez), Bondolfi, Brandenburger, Burkhardt, Campell, Casanova-Maron, Casutt, Casutt-Derungs, Claus, Clavadetscher, Davaz, Engler, Fontana, Furrer-Cabalzar, Gartmann-Albin, Gasser, Giacomelli, Grass, Gunzinger, Hardegger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jeker, Jenny, Joos, Kappeler, Kasper, Koch (Tumein), Koch (Landquart), Krättli-Lori, Kunz (Fläsch), Kunz (Cuira), Märchy-Caduff, Marti, Meyer-Grass, Michael (Castasegna), Michel, Müller (Tavau Plaz), Niggli (Samedan), Papa, Parolini, Pedrini, Perl, Pfäffli, Rathgeb, Rosa, Steck-Rauch, Stiffler (Cuira), Tenchio, Tomaschett-Berther (Trun), Troncana-Sauer, Valär, Vetsch (Claustra Vitg), Waidacher, Wieland, Zweifel-Disch, Müller (Haldenstein), Nicolay, Patt
Resposta da la regenza
En il rom da la strategia dad e-government Svizra duai vegnir simplifitgà il barat d'infurmaziuns en ils fatgs dal register funsil cun introducir in sistem d'infurmaziun electronic naziunal per bains immobigliars (eGRIS). Il project federal ha las suandantas cumponentas:
• sistem d'infurmaziun central, electronic ed interchantunal per datas dal register funsil;
• retratga da datas dal register funsil sin via electronica per las autoritads e per l'economia;
• correspundenza electronica cun il register funsil;
• segirada unitara da lunga durada da las datas dal register funsil.
Cun excepziun da la segirada da lunga durada ha la confederaziun incumbensà l'onn 2008 la SIX Group da realisar il project en collavuraziun cun ils chantuns. La SIX Group ha la direcziun dal project. Ils chantuns e l'economia èn represchentads en moda paritetica en la giunta dal project. La represchentanza dals chantuns è vegnida tschernida da la conferenza svizra da las directuras e dals directurs da construcziun, da planisaziun e da protecziun da l'ambient (CCPA). En il Grischun sco unic chantun, en il qual vegnan duvrads plirs sistems d'informatica per ils registers funsils, è el stà in champ ideal per realisar in project da pilot per il portal d'infurmaziun "Terravis". Or da vista da la protecziun da datas furma l'art. 17a al. 1 lit. c ed al. 2 da la lescha federala davart la protecziun da datas (LPD; CS 235.1) la basa legala ch'è necessaria per il project da pilot.
1. Las vischnancas ed ils circuls da register funsil ch'èn participads al project da pilot Terravis èn infurmads en moda cumplessiva. Ina infurmaziun generala per tut las vischnancas è vegnida fatga en la Ginfo 2/2010. Ultra da quai ha gì lieu ils 2 da november 2010 a Turitg in'orientaziun a las medias ch'era vegnida avisada dapertut. Igl è vegnì desistì da dar ina infurmaziun speziala supplementara a las proprietarias ed als proprietaris da bains immobigliars, perquai che l'introducziun da Terravis na signifitga betg ina midada materiala, cunzunt betg in'extensiun dal dretg da prender invista da las datas dals bains immobigliars e pia er betg ina intervenziun en il dretg da proprietad, mabain sulettamain in nov gener da prender invista en il rom prescrit da la lescha. Questa procedura è cumparegliabla cun la midada dal register funsil en furma da palpiri a quel en furma electronica. L'associaziun svizra da las proprietarias e dals proprietaris da chasas è infurmada davart il project dapi il cumenzament da l'onn 2010.
2. Terravis n'è betg in portal public, accessibel a tuttas ed a tuts. Igl è previs da laschar acceder a las datas dal register funsil mo utilisadras ed utilisaders professiunals. Cun mintga utilisadra e cun mintga utilisader vegn fatg in contract d'utilisaziun, en il qual i vegn renvià a las consequenzas d'in diever abusiv da las datas tenor l'art. 111m al. 3 da l'ordinaziun concernent il register funsil (ORF; CS 211.432.1). L'invista da las datas che n'èn betg publicas vegn concedida mo, sch'i dat in interess cumprovà tenor l'art. 970 al. 1 CCS. Publics èn la designaziun e la descripziun dal bain immobigliar, il num e l'identificaziun da la proprietaria u dal proprietari, la furma da proprietad e la data da l'acquisiziun, las servituts e las grevezzas funsilas sco er da princip las remartgas. Betg publics (pia invista mo, sch'i dat in interess cumprovà) èn ina part da las remartgas (en la revisiun parziala currenta da l'ordinaziun davart il register funsil vegni discutà d'abolir questa restricziun) sco er tut las prenotaziuns e tut ils dretgs da pegn funsil. Problems cun la protecziun da datas na resultan nagins ni pervia da las restricziuns d'access ni pervia dals mecanissems da controlla immanents al sistem. Ils aspects ch'èn relevants per la protecziun da datas èn dal rest vegnids reglads gia l'onn 2005 – areguard l'invista electronica da las datas dal register funsil – tras l'uffizi federal da giustia e la protecziun da datas federala.
3. Las retschertgas vegnan protocolladas cuntinuadamain ed il sistem cuntegna ina surveglianza da plirs stgalims. La transmissiun nunautorisada ed il diever da las datas per intents da publicitad vegnan sancziunads cun la retratga dal dretg d'access. La candidatura da proprietarias e da proprietaris che sa basa sin datas retratgas illegalmain, per exempel tras ina banca, pudess vegnir cumprovada vaira levamain cun agid dals protocols.
4. Terravis generescha in logfile (datoteca da protocol), en il qual vegnan registradas tut las activitads. Quest logfile permetta a las proprietarias ed als proprietaris da survegnir infurmaziuns davart las activitads da retschertga. Il niz d'in tal sistem da retschertga è dentant problematic, perquai che access nunautorisads vegnan exclus e perquai che i n'èn betg previsas infurmaziuns da la proprietaria u dal proprietari en connex cun las retschertgas giustifitgadas che vegnan fatgas en moda tradiziunala p.ex. tras in uffizi da scussiun u da concurs, e quai er betg tenor il dretg vertent. La retschertga electronica na duai insumma betg introducir ina nova obligaziun d'infurmaziun supplementara.
5. Il sistem sa basa sin la rait, da princip pon ins s'imaginar ina retschertga mundiala. Ina tala n'è dentant betg previsa e tenor il dretg vertent er betg admissibla. Per survegliar la segirezza dal sistem è vegnida incumbensada ina firma spezialisada da far in uschenumnà test da penetraziun. Ils resultats vegnan preschentads a temp util als posts chantunals per l'invista.
03 da mars 2011