Ina prognosa da l'aura precisa e segira è da fitg gronda impurtanza per nossa economia turistica, en spezial per l'entira industria da sport d'enviern. Entaifer las 2 minutas e 15 secundas che stattan a disposiziun a MeteoSvizra resp. ad SF Meteo n'èsi betg pussaivel per els da tractar atgnadads regiunalas da l'aura. Perquai vegn tranter auter noss chantun preschentà per part en moda cumplettamain faussa. Il Grischun è la regiun da vacanzas la pli gronda da la Svizra e cuvra in sisavel da noss pajais.
Ina prolungaziun dal temp d'emissiun per 90 secundas gidass a reducir considerablamain questa situaziun nuncunvegnenta e tegness quint da l'impurtanza economica dal rapport da l'aura.
Nus dumandain la regenza, sch'ella è pronta da s'engaschar tar SF DRS per ina prolungaziun dal rapport da l'aura.
Cuira, ils 8 da december 2010
Giacomelli, Geisseler, Jeker, Albertin, Augustin, Berther (Camischolas), Bezzola (Samedan), Bezzola (Zernez), Blumenthal, Brandenburger, Buchli-Mannhart, Burkhardt, Caduff, Caluori, Campell, Candinas, Casanova-Maron, Casty, Casutt, Casutt-Derungs, Cavegn, Clalüna, Claus, Clavadetscher, Conrad, Darms-Landolt, Davaz, Dermont, Dosch, Dudli, Engler, Florin-Caluori, Foffa, Fontana, Furrer-Cabalzar, Gasser, Gunzinger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jaag, Jenny, Joos, Kappeler, Kasper, Kleis-Kümin, Koch (Tumein), Koch (Landquart), Kollegger (Cuira), Krättli-Lori, Kunz (Fläsch), Kunz (Cuira), Locher Benguerel, Mani-Heldstab, Märchy-Caduff, Marti, Meyer-Grass, Michael (Donat), Michael (Castasegna), Michel, Montalta, Müller (Tavau Plaz), Nick, Nigg, Niggli (Samedan), Papa, Parolini, Parpan, Pedrini, Perl, Peyer, Pfäffli, Pult, Rathgeb, Righetti, Rosa, Steck-Rauch, Stiffler (Tavau Plaz), Stiffler (Cuira), Tenchio, Tomaschett (Breil), Trepp, Troncana-Sauer, Tscholl, Valär, Waidacher, Wieland, Cortesi, Loi, Monigatti, Müller (Haldenstein), Nicolay, Patt
Resposta da la regenza
En il turissem èn facturs climatics, sco precipitaziuns e temperaturas bassas durant l'enviern, periodas da bell'aura u er il dumber d'uras suleglivas per di, elements impurtants che han ina influenza directa sin il svilup da la svieuta. Per il turissem dal di e per la fatschenta da la fin d'emna giogan prognosas da l'aura in gronda rolla. Las emissiuns quotidianas da l'aura da la televisiun svizra (SF Meteo) appartegnan als formats d'emissiun che han il pli grond dumber d'aspectaturas e d'aspectaturs.
Il november 2010 è vegnì preschentà il "studi da l'aura grischuna". Quest studi mussa che las prognosas dad SF Meteo correspundan per gronda part a l'aura effectiva en il Grischun dal sid. La qualitad da las prognosas per il Grischun dal nord e per il Grischun central è main buna. I sto vegnir resguardà che betg ils models da prognosa n'èn il motiv per quai, mabain plitost il fatg che las pussaivladads graficas da preschentaziun èn limitadas (simbols da l'aura) e che las emissiuns duran mo curt. Plinavant è avant maun ina clera differenza tranter ils resultats da la prognosa da 2 fin 3 dis ed ils resultats da la tendenza da 4 fin 5 dis. La tendenza furnescha infurmaziuns main precisas. En circa 30 pertschient da tut las emissiuns da l'aura dal program principal da la televisiun svizra vegnan mussadas particularitads da l'aura specificas per il Grischun.
Gia dapi in temp pli lung stat il chantun en contact direct cun las persunas responsablas dad SF Meteo ed examinescha pussaivladads per meglierar la situaziun. Betg mo il Grischun, mabain er autras regiuns da vacanzas en Svizra han grondas aspectativas concernent il resguard da giavischs individuals. Perquai n'è ina prolungaziun da la durada da l'emissiun quotidiana da l'aura strusch realisabla, sch'ella concerna mo il Grischun. Plinavant n'è quai betg la mesira la pli cunvegnenta.
La regenza è pronta da s'engaschar er vinavant, per ch'i vegnian stgaffidas cundiziuns generalas optimalas per il turissem grischun. Latiers tutgan er activitads en connex cun las prognosas da l'aura. Ensemen cun SF Meteo è uschia per exempel planisà in project che sa referescha a las pussaivladads tecnicas las pli novas per la prognosa. Per pudair sa basar sin fatgs e betg mo sin supposiziuns en la discussiun, dovri er calculaziuns da la valurisaziun tar las interpresas da telefericas e tar auters furniturs da servetschs. Er il cumportament effectiv dals giasts duai vegnir analisà meglier en quai che reguarda l'influenza da prognosas da l'aura. En mira vegnan pia prendidas mesiras che duain d'ina vart purtar ina plivalur concreta per las acturas e per ils acturs dal turissem grischun e che na sa restrenschan da l'autra vart betg mo a la prolungaziun da la durada da l'emissiun SF Meteo.
03 da mars 2011