En il rom da differentas revisiuns parzialas da la lescha da taglia ils ultims onns ha il cussegl grond abolì la taglia sin l'ierta tranter conjugals e descendentas e descendents directs en cas da mortoris ed en cas da donaziuns. Per il transferiment da la facultad tranter fragliuns en cas da mortoris u en cas da donaziuns vegn dentant vinavant incassada ina taglia chantunala sin l'ierta. A chaschun da la deliberaziun da las descendentas e dals descendents directs da la taglia sin l'ierta è quella schizunt vegnida augmentada per las ulteriuras retschavidras e per ils ulteriurs retschaviders da 4% a 10%. Ultra da quai pon las vischnancas en quests cas er anc incassar ina taglia sin la part d'ierta. La grevezza fiscala importa en la furma actuala fin a 15% (chantun e vischnancas).
En la pratica datti cas tranter fragliuns, nua che l'incassament da la taglia sin l'ierta e da la taglia sin la part d'ierta vegn considerada sco nuncunvegnenta. Quai po esser, sche facultads vegnan transferidas pliras giadas perquai ch'i resultan plirs mortoris entaifer curt temp ed ha per consequenza ch'il medem substrat da taglia vegn suttamess pliras giadas a la taglia. En quest connex sa tschenta la dumonda, sche la taglia sin l'ierta per fragliuns resp. sia autezza è anc adequata ord vista actuala.
Perquai dumondan las sutsegnadras ed ils sutsegnaders la regenza il suandant:
1. Co giuditgescha la regenza l'autezza da la grevezza fiscala en cas d'ierta tranter fragliuns?
2. Tge pussaivladads legalas vesa la regenza per distgargiar fiscalmain fragliuns en talas constellaziuns?
3. È la regenza pronta d'examinar tar la proxima revisiun parziala da la lescha da taglia detagliadamain, sch'il chantun duai armonisar la taglia sin la part d'ierta e sin donaziuns cun las vischnancas?
Cuira, ils 8 da december 2010
Stiffler (Tavau Plaz), Bezzola (Zernez), Brandenburger, Buchli-Mannhart, Burkhardt, Caduff, Campell, Casanova-Maron, Casty, Casutt, Clalüna, Claus, Conrad, Dosch, Engler, Felix, Fontana, Geisseler, Giacomelli, Gunzinger, Hartmann (Cuira), Heiz, Hitz-Rusch, Holzinger-Loretz, Jeker, Joos, Kasper, Koch (Tumein), Kollegger (Cuira), Komminoth-Elmer, Krättli-Lori, Kunz (Fläsch), Kunz (Cuira), Mani-Heldstab, Märchy-Caduff, Marti, Michael (Donat), Nick, Niggli (Samedan), Niggli-Mathis (Grüsch), Papa, Parpan, Pedrini, Rathgeb, Rosa, Sax, Steck-Rauch, Stiffler (Cuira), Tomaschett (Breil), Tscholl, Valär, Waidacher, Wieland, Cortesi, Largiadèr, Müller (Haldenstein), Patt
Resposta da la regenza
Cun la dumonda Stiffler vegn messa en discussiun l'autezza da las taglias sin l'ierta tranter fragliuns. En il dretg vertent importa la taglia sin l'ierta per tut l'ierta ch'è suttamessa a la taglia en il chantun 10 %. Las vischnancas pon incassar ina taglia sin la part d'ierta da maximalmain 5 % sin las assegnaziuns al tschep dals geniturs. Entaifer il dretg constituziunal èn ils chantuns libers da concepir las taglias sin l'ierta. I dat dentant singulas stentas d'eventualmain incassar en l'avegnir ina taglia federala sin l'ierta.
Il dretg fiscal è caracterisà dal princip fundamental da l'imposiziun tenor la capacitad economica. Ina capacitad economica pli gronda resulta tant d'in augment da la facultad pervia d'ina ierta u pervia d'ina donaziun sco er d'in augment da la facultad che deriva da l'entrada da gudogn u dal retgav da facultad. Da quest puntg da vista sa lascha l'incassament d'ina taglia sin l'ierta tranter fragliuns senz'auter giustifitgar e da quest puntg da vista na po er strusch vegnir crititgada l'autezza da las tariffas da taglia chantunalas e communalas. Sch'ins considerescha la famiglia sco unitad e sch'ins resguarda che las valurs da facultad existentas èn gia ina giada vegnidas suttamessas a la taglia sco entradas e dapi alura adina vegnidas engrevgiadas cun la taglia sin la facultad, po dentant senz'auter er vegnida refusada la taglia sin l'ierta e sin donaziuns tranter fragliuns. En quest cas stuess dentant l'entir tschep dals geniturs vegnir tractà en moda eguala. Ina grevezza fiscala pli gronda per ils geniturs cumpareglià cun ils fragliuns na po numnadamain betg vegnir motivada cun arguments objectivs.
Tar las dumondas concretas fatgas prenda la regenza posiziun sco suonda:
1. La grevezza fiscala actuala en connex cun la taglia sin l'ierta tranter fragliuns po parair gronda u nuncunvegnenta en cas, nua ch'i dat entaifer curt temp pliras successiuns d'ierta. En general ed en vista a l'imposiziun tenor la capacitad economica na pon dentant vegnir fatgas paucas objecziuns cunter ina grevezza fiscala da maximalmain 15 %. Ultra da quai pon en blers cas vegnir evitadas grevezzas fiscalas memia autas, constituind dretgs testamentars.
2. Ina taglia sin l'ierta pli bassa per ils fragliuns resp. per il tschep dals geniturs stuess vegnir cuntanschida tras ina reducziun da la grevezza fiscala en il chantun. Quai fiss dentant mo pussaivel, sch'il chantun midass da la taglia sin l'ierta actuala ad ina taglia sin la part d'ierta. Tenor l'avis da la regenza stuess questa midada vegnir realisada sin basa da la regulaziun che vala actualmain per la taglia sin il gudogn tras la vendita da bains immobigliars. Las taglias sin la part d'ierta fissan identicas en la lescha da taglia chantunala ed en la lescha davart las taglias communalas e davart las taglias da baselgia e stuessan alura vegnir regladas uschia, che las vischnancas pudessan er vinavant fixar las tariffas da taglia. Per incassar las taglias chantunalas e communalas sin la part d'ierta fiss responsabel il chantun, e las vischnancas sa participassan als custs che resultassan.
Unifitgar las taglias sin l'ierta en il chantun ed en las vischnancas correspundess a la via instradada cun la lescha davart las taglias communalas e davart las taglias da baselgia e simplifitgass la procedura en general. Ella chaschunass dentant er ina perdita minimala da l'autonomia communala ed ina pitschna reducziun da plazzas da lavur en las regiuns.
3. La regenza è pronta d'examinar tar la proxima revisiun parziala da la lescha da taglia, sch'il chantun duai midar ad ina taglia armonisada sin la part d'ierta e sin donaziuns.
20 da schaner 2011