La midada da la lescha federala davart l'assicuranza da malsauns dals 21 da december 2007 (finanziaziun dals ospitals) prevesa ch'il tractament staziunar sto vegnir indemnisà a partir dal 1. da schaner 2012 tras pauschalas pro cas. Sco sistem da las pauschalas pro cas è previsa la SwissDRG.
Ils effects d'ina pauschala pro cas unitara per tractaments en ospitals èn intscherts. Las dumondas avertas en connex cun l'effect da la DRG duain vegnir respundidas avant l'introducziun da tala. Las experientschas ch'èn vegnidas fatgas en Germania ed en singuls chantuns mussan che la DRG n'ha betg pudì ademplir las finamiras giavischadas sco p.ex. respargn da custs, prestaziuns cumparegliablas e transparenza.
Ils effects da la DRG per la segirezza dal provediment, per la scolaziun e per la furmaziun supplementara da tut il persunal en il sectur da la sanadad inclusiv da las medias e dals medis, per las cundiziuns da lavur dal persunal, per ils secturs che precedan e che suondan il sectur da la sanadad, per ils secturs da la pediatria, per ils servetschs psichiatrics e per il tractament da las pazientas e dals pazients polimorbids sco er per la chargia finanziala da las persunas assicuradas, ston vegnir sclerids ordavant. Avant che questas dumondas n'èn betg respundidas, è in moratori urgentamain necessari. Ultra da quai sto vegnir inizià stringentamain – 1 onn avant l'introducziun da la DRG – in studi accumpagnant davart l'effect dal sistem da la DRG.
Per in moratori pleda plinavant il spazi da temp fitg stretg che la revisiun parziala dat als chantuns per introducir in sistem per finanziar ils ospitals che sa basa sin la DRG.
Sco ils auters chantuns prepara il chantun Grischun cun tutta forza la realisaziun da la revisiun parziala da la lescha federala davart l'assicuranza da malsauns (LAMal). En quest connex ha el tractandà il project per la lescha davart la planisaziun e la finanziaziun dals ospitals per la sessiun da zercladur 2011. Il process per relaschar prescripziuns sto esser terminà la fin da l'onn 2011 e la lescha sto esser en vigur per il 1. da schaner 2012. Per legitimar l'introducziun sto il studi accumpagnant cumenzar 1 onn avant.
Las sutsegnadras ed ils sutsegnaders supplitgeschan la regenza da s'engaschar tar il cussegl federal per in moratori areguard l'introducziun da la pauschala pro cas che sa referescha a la diagnosa (Diagnosis Related Groups, DRG) fin che differentas dumondas e divers problems che stattan en connex cun l'introducziun da la DRG èn sclerids e fin ch'il studi accumpagnant, il qual sto cumenzar 1 onn avant l'introducziun, è s'etablì.
Cuira, ils 16 da favrer 2011
Trepp, Geisseler, Meyer-Grass, Baselgia-Brunner, Blumenthal, Bucher-Brini, Caluori, Darms-Landolt, Dermont, Frigg-Walt, Furrer-Cabalzar, Gartmann-Albin, Gasser, Jaag, Jenny, Kleis-Kümin, Locher Benguerel, Müller, Niederer, Noi-Togni, Peyer, Pfenninger, Pult, Thöny, Tomaschett-Berther (Trun), Vetsch (Pragg-Jenaz), Monigatti
Resposta da la regenza
1. Ils 21 da december 2007 han las chombras federalas concludì en il rom da la revisiun parziala da la lescha federala davart l'assicuranza da malsauns (LAMal, CS 832.10) ch'ils tractaments staziunars inclusiv la dimora en in ospital stoppian vegnir indemnisads il pli tard a partir dal 1. da schaner 2012 cun agid da pauschalas che sa refereschan a las prestaziuns e che sa basan sin structuras unitaras en tut la Svizra. Per elavurar, per sviluppar vinavant, per adattar e per tgirar las structuras da tariffas unitaras en tut la Svizra han ils partenaris da tariffa ed ils chantuns fundà ils 18 da schaner 2008 la SwissDRG SA d'utilitad publica. Il sistem tariffar ch'è vegnì elavurà da la SwissDRG SA per prestaziuns d'ospital staziunaras somaticas acutas sa basa sin il sistem DRG tudestg, ch'è vegnì introducì en moda lianta l'onn 2004 en Germania, sco er sin experientschas ch'èn vegnidas fatgas cun quel. Tenor quest sistem vegnan cas medicinals sumegliants unids a gruppas omogenas en quai che reguarda ils custs ed indemnisads cun ina pauschala. Suenter l'introducziun per il 1. da schaner 2012 vegn la SwissDRG SA er a garantir l'ulteriur svilup e l'adattaziun dal sistem al svilup medicinal sco er a las novas enconuschientschas e procurar per la tgira da structuras da tariffa unitaras per tut la Svizra.
Ils secturs dal tractament staziunar psichiatric e da la reabilitaziun staziunara n'èn betg pertutgads da la midada a la SwissDRG per il 1. da schaner 2012. Lur prestaziuns vegnan finanziadas er vinavant cun pauschalas per di. Pli tard duain dentant vegnir applitgadas pauschalas che sa refereschan a las prestaziuns er per quests secturs. Ils sistems tariffars orientads a las prestaziuns per ils secturs da la psichiatria staziunara e da la reabilitaziun èn anc en la fasa d'elavuraziun.
L'indemnisaziun da las prestaziuns d'ospital staziunaras cun la pauschala pro cas che sa referescha a la diagnosa (Diagnosis Related Groups, DRG) è vegnida introducida fin oz en blers pajais. Quest sistem tariffar, che vegn meglierà ed adattà currentamain a las relaziuns specificas dal pajais, serva tranter auter en Germania, en Scandinavia, en l'Australia, en Canada, en il Giapun, en la Gronda Britannia, en Frantscha ed en Spagna sco basa per finanziar las prestaziuns dals ospitals.
2. En ils ospitals acuts cun dretg da survegnir contribuziuns en il chantun Grischun vegn il sistem APDRG duvrà gia dapi l'onn 2005 sco basa per calcular las contribuziuns dal chantun per prestaziuns medicinalas. APDRG è in model antecessur in pau main detaglià dal sistem da classificaziun da la SwissDRG che vegn applitgà a partir dal 2012. Dapi plirs onns vegnan er las prestaziuns staziunaras a quint da l'assicuranza cunter accidents, da l'assicuranza militara e da l'assicuranza d'invaliditad indemnisadas tenor il sistem APDRG. Cuntrari a quai finanzieschan las assicuranzas da malsauns lur part vi da l'indemnisaziun da las prestaziuns dals ospitals acuts fin oz cun pauschalas pro di e pro cas specificas per ospital (sistem TPP). La midada a la SwissDRG vegn perquai a chaschunar ina midada da la finanziaziun cunzunt tar las assicuranzas da malsauns. Per il chantun è l'introducziun da la SwissDRG percunter in ulteriur svilup organic da la finanziaziun actuala da las prestaziuns che sa referescha a la diagnosa.
3. Areguard las mesiras accumpagnantas ed areguard il studi accumpagnant èn vegnidas realisadas u planisadas sin plaun naziunal tranter auter las suandantas activitads:
L'uffizi federal da sanadad publica prevesa d'evaluar las finamiras ch'ins ha vulì cuntanscher cun la revisiun da la lescha federala davart l'assicuranza da malsauns dals 21 da december 2007 (latiers tutga tranter auter la garanzia da la qualitad). Ensemen cun ils partenaris ha la SwissDRG SA elavurà regulaziuns concretas per far frunt ad impuls che pudessan limitar la qualitad optimala da tractaments. Ina retschertga scientifica ch'è vegnida incumbensada da la federaziun da las medias e dals medis svizzers e dals "ospitals da la Svizra H+" duai preschentar la dimensiun dal spustament dals scleriments e dals tractaments dal sectur staziunar acut al sectur ambulant da l'ospital u da la pratica sco er examinar ils motivs per quai.
4. La finanziaziun tenor la DRG è – sco ch'igl è vegnì preschentà qua survart – ina furma da finanziaziun internaziunala cun grond sustegn ch'è sa cumprovada e che vegn applitgada dapi stgars 7 onns en il chantun Grischun. L'introducziun da questa furma da finanziaziun en tut la Svizra a partir da l'onn 2012 vegn evaluada ed accumpagnada da differentas varts. La regenza è da l'avis ch'i na dettia perquai nagina raschun da s'engaschar tar la confederaziun per in moratori areguard l'introducziun da la finanziaziun orientada a las prestaziuns dals tractaments staziunars en ospitals per tut la Svizra. Anzi ha la regenza l'interess ch'ils custs en connex cun la DRG vegnian finalmain rendids transparents en la cumparegliaziun interchantunala. Tenor il mainagestiun da la SwissDRG SA na sto il studi accumpagnant betg esser etablì stringentamain avant l'introducziun da la SwissDRG. Decisiv è ch'el vegnia lantschà ensemen cun l'introducziun da la SwissDRG. I na dat nagins indizis che quai na vegnia betg ad esser il cas. La regenza propona correspundentamain da refusar l'incumbensa.
04 da matg 2011