Dumonda da la fracziun da la PS concernent l'introducziun d'in "rap grischun per l'energia"
Sessiun: 18.04.2011
Las energias regenerablas han in avegnir, er sch'ellas na pon per part betg anc concurrenzar oz cun l'energia constanta favuraivla. A medem temp porschan er sanaziuns energeticas d'immobiglias perspectivas economicas interessantas, perquai ch'ellas portan – ultra da las incumbensas per il mastergn – er effects ecologics ed economics persistents.
Per promover pli fitg tant ils purtaders d'energia regenerabla sco er las sanaziuns energeticas pari dad esser raschunaivel per las sutsegnadras e per ils sutsegnaders ch'il chantun mainia in fond correspundent e ch'el alimenteschia er permanentamain quel. Ina pussaivladad en chaussa fiss quella d'incassar in "rap grischun per l'energia" sin il consum d'electricitad en il chantun Grischun. L'incassament po avair lieu en moda nuncumplitgada, ed a medem temp n'è la taxa dad 1 rap per ura da kilowatt electricitad consumada ina grevezza sproporziunada ni per las chasadas ni per l'economia.
Per quest motiv dumondan las sutsegnadras ed ils sutsegnaders la regenza il suandant:
1. Tge potenzial e tge intents d'utilisaziun vesa la regenza en l'incassament d'in "rap grischun per l'energia"?
2. Tge grevezzas finanzialas resultassan en media per ina chasada privata grischuna?
3. Tge grevezzas finanzialas resultassan per l'economia grischuna resp. tge interpresas artisanalas e tge interpresas grondas vegnissan (per exempel) engrevgiadas en tge autezza?
4. Tge tenuta ha la regenza envers in'eventuala introducziun d'ina tala taxa sin il consum d'electricitad?
Cuira, ils 18 d'avrigl 2011
Baselgia-Brunner, Peyer, Bucher-Brini, Frigg-Walt, Gartmann-Albin, Jaag, Locher Benguerel, Müller (Tavau Plaz), Noi-Togni, Pult, Thöny, Trepp, Michel (Igis), Monigatti, Pedrini (Soazza)
Resposta da la regenza
Dapi il cumenzament da l'onn 2010 vegnan sanaziuns d'edifizis promovidas en il rom dal program da promoziun "Il program d'edifizis" da la confederaziun e dals chantuns. Cun l'entrada en vigur da la nova lescha d'energia dal chantun Grischun (LEG; DG 820.200) il 1. da schaner 2011 è er la promoziun chantunala vegnida adattada e coordinada cun il program da promoziun naziunal. En il preventiv 2011 metta il chantun a disposiziun agens meds finanzials en l'autezza da 9 milliuns francs per la promoziun directa. Tras questa promoziun augmentada duain vegnir cuntanschidas las finamiras definidas en l'art. 3 al. 2 LEG concernent il consum d'energias fossilas e regenerablas en il sectur d'edifizis. La confederaziun incassescha da sia vart ina taxa sin il consum d'electricitad en l'autezza d'actualmain 0.45 raps per ura da kilowatt (kWh) per promover energias regenerablas. Tras l'indemnisaziun per cuvrir ils custs da la furniziun d'electricitad (ICF) vegnan promovidas las suandantas tecnologias: forza idraulica pitschna, fotovoltaica, energia dal vent, geotermia, biomassa e ruments or da biomassa. Sin basa da la ICF pon ils implants vegnir fatgs ir uschia, ch'els cuvran ils custs e ch'els portan per gronda part in gudogn.
Tar las dumondas tschentadas:
1. Tras la ICF, tras il program da promoziun "Il program d'edifizis" e tras la promoziun chantunala supplementara vegnan gia sustegnidas considerablamain la producziun d'energia regenerabla e sanaziuns energeticas. Grazia a quest sustegn da la confederaziun e dal chantun pon las finamiras da la LEG en il sectur d'edifizis vegnir cuntanschidas – tenor il giudicament actual – sco planisà, uschia ch'i na s'impona betg d'augmentar ils daners da promoziun. Per ulteriurs meds finanzials en furma d'in rap per l'energia n'exista perquai nagin basegn ord vista da la regenza.
2. La grevezza finanziala supplementara dependa mintgamai dal consum d'electricitad da la chasada privata. Tut tenor la grondezza da la chasada, il stgaudar e l'equipament cun apparats electrics stuessi vegnir fatg quint cun custs supplementars da 30 fin 150 francs per onn. En ina chasa d'ina famiglia dovra ina chasada da duas persunas cun in boiler electric 6'000 kWh per onn en media. Tras l'introducziun d'ina taxa dad 1 rap/kWh sin il consum d'electricitad stuessan talas chasadas quintar cun ina grevezza supplementara da 60 francs per onn en media.
3. Tut tenor il manaschi artisanal u industrial fiss l'extensiun da las grevezzas supplementaras annualas fitg gronda. Manaschis fitg pitschens cun in consum d'electricitad da circa 10'000 kWh en media stuessan quintar cun custs supplementars da circa 100 francs per onn en cas d'ina taxa dad 1 rap/kWh sin il consum d'electricitad. Manaschis artisanals mesauns vegnissan engrevgiads supplementarmain cun circa 1'500 francs, manaschis pli gronds che han in consum da bundant 5'000'000 kWh cun circa 50'000 francs, entant ch'ils consuments d'electricitad ils pli gronds en il chantun, che dovran fitg blera energia, stuessan surpigliar custs supplementars annuals da plirs milliuns francs.
4. En il rom da la debatta davart la nova LEG durant la sessiun d'avrigl 2010 hai er dà grondas discussiuns davart ina taxa sin il consum d'electricitad. Gist uschia sco la regenza ha la gronda maioritad dal cussegl grond refusà quella giada in fond d'energia correspundent. Empè da quai ha il cussegl grond approvà las finamiras definidas en l'art. 3 al. 2 LEG concernent l'energia en il sectur d'edifizis. Er tenor l'opiniun da la regenza èn quellas – ord vista tecnica – raschunaivlas, realisablas ed economicamain supportablas e pon vegnir cuntanschidas cun agid dals programs da promoziun existents. I fa pia pauc senn da puspè suttametter quest giavisch. Mintga augment dal pretsch d'electricitad mida la situaziun da concurrenza ed uschia er la qualitad da noss chantun per l'economia, ma er per las chasadas privatas. Sch'il Grischun giess in'atgna via areguard la concepziun dal pretsch d'electricitad, avess quai grondas consequenzas en spezial per interpresas che dovran fitg blera energia. Plinavant vegn l'incassament d'in rap per l'electricitad gia discutà en il fratemp sin plaun federal.
Per quests motivs refusa la regenza ina taxa chantunala supplementara sin il consum d'electricitad.
8 da fanadur 2011