Rempars da lavinas sa chattan per ordinari en conturns alpins ed èn correspundentamain exponids savens a crudadas da crappa, al vent, a scuflads ed ad auters privels da la natira. Tras la furmaziun da scuflads locals, tras naiv glischnanta, tras quai che la cuverta da naiv schela, ma er tras moviments dal terren e tras sbuvadas pon resultar forzas considerablas che pon – tenor las experientschas da blers onns – schizunt donnegiar las pitgas d'atschal dals rempars. Durant envierns extrems èn parts dals rempars navidas en dal tuttafatg; squatschs u lavinas pli pitschnas pon vegnir giu entaifer il rempar u sur singulas ovras. Sut talas cundiziuns stuessi vegnir fatg quint cun donns pli gronds vi dals implants fotovoltaics (FV) ch'èn montads sin ils rempars. Ils panels solars pon er chaschunar accumulaziuns localas da naiv che pon reducir l'efficacitad ed uschia er la funcziun da protecziun dals rempars da lavinas. Analogamain als rempars da lavinas, ch'èn vegnids sviluppads e meglierads durant decennis, stuessan bain er vegnir rimnadas a pli lunga vista experientschas cun implants FV sin rempars da lavinas. Igl èn anc avant maun malsegirezzas e ristgas considerablas. In implant da pilot, sco quel ch'è vegnì planisà e permess a St. Antönien, sto perquai vegnir beneventà, avant ch'i vegnan fatgas grondas investiziuns.

Tar las dumondas tschentadas:

1. Il potenzial chantunal per ovras electricas solaras sin rempars da lavinas ch'èn adattads per quest intent vegn stimà ad ina prestaziun totala da circa 10 MW. La producziun d'electricitad importass circa 15 GWh per onn. Per cumparegliar produciss l'implant d'energia dal vent planisà a Haldenstein – cun ina prestaziun da circa 3 MW – circa 4 GWh electricitad. Il potenzial chantunal correspunda pia a circa quatter tals implants d'energia dal vent.

2. Pervia da la situaziun periferica stuess l'electricitad d'implants FV sin rempars da lavinas per regla vegnir inducida en la rait da tensiun media. Perquai ston las cundiziuns generalas vegnir scleridas individualmain en detagl. La distanza dal rempar da lavinas tar la staziun da transfurmaziun vegn ad esser in criteri impurtant per la rentabilitad d'ina investiziun (inducziun en la rait). Pitschens territoris da rempars cun distanzas da colliaziun memia grondas vegnan perquai a crudar davent. Ina stimaziun approximativa mussa che circa 40 km dals 60 km rempars, che vegnan da princip en consideraziun, sa laschassan trair a niz economicamain per implants FV.

3. Igl è fitg difficila da quantifitgar la valurisaziun regiunala. Sche l'entir potenzial vegniss tratg a niz, stuessan segiramain vegnir fatgas investiziuns da passa 100 milliuns francs. Singuls implants pli gronds, sco p.ex. a St. Antönien, pudessan previsiblamain er vegnir tratgs a niz per intents turistics (visitas guidadas en il parc solar, lavuratoris solars e.u.v.).

4. Sche disposiziuns legalas s'opponan ad in project da construcziun e sch'in tal project survegn las permissiuns necessarias, sto vegnir examinà en il cas singul. Quest princip vala er per implants FV sin rempars da lavinas. Per l'examinaziun è en spezial relevanta la legislaziun davart la planisaziun dal territori, davart la protecziun da l'ambient, davart la protecziun da la natira e da la patria sco er davart il guaud. Necessaria è ina disposiziun d'approvaziun dal plan da l'inspecturat federal d'installaziuns a current ferm. En quest connex sto dentant la funcziunalitad irreproschabla da l'ovra da protecziun predominar en mintga cas. Per l'ovra electrica solara planisada a St. Antönien vegnan dal rest er fatgas examinaziuns concernent la reflexiun da la glisch. Sco quai che la procedura d'examinaziun preliminara realisada ha mussà, pari da princip dad esser pussaivel d'observar las disposiziuns legalas.

8 da fanadur 2011