La segirezza dal provediment è in factur dal lieu impurtant. Nus faschain bain dad er producir en noss pajais l'energia electrica che nus duvrain en noss pajais. Novas ovras atomaras na paran or dal puntg da vista actual betg pli da vegnir sustegnidas d'ina maioritad. Pervia da quai ston ussa vegnir tratgas a niz tut las pussaivladads per realisar ovras electricas che lavuran cun purtaders d'energia regenerabels.
Per che la sortida da l'energia nucleara haja propi success ston l'emprim vegnir analisads ils motivs che han chaschunà, che projects d'ovras electricas èn vegnids impedids. Ils impediments ils pli gronds ston vegnir allontanads per che la capacitad d'ovras electricas necessaria en Svizra possia vegnir realisada.
La regenza vegn incumbensada da far in rapport davart ils projects per producir electricitad cun purtaders d'energia regenerabels (novas construcziuns, engrondiments, sanaziuns u parts pli grondas da projects d'ovras electricas, per exempel ina da pliras turbinas) ch'èn vegnids impedids en il Grischun ils ultims 20 onns. Tar mintga project impedì ston en quest connex vegnir preschentads ils suandants puncts:
• gener dal project (ovra idraulica, implant d'energia dal vent, implant d'energia solara e.u.v.);
• prestaziun nominala dal project;
• motivs da l'impediment (disposiziuns legalas precisas, protestas, sistida tras il patrun da construcziun pervia da gronds retardaments);
• categorias da las partidas che han fatg protesta (federaziuns ecologicas, persunas privatas, vischinas e vischins, autoritads sco la protecziun da la patria);
• stadi dal project cur ch'el è vegnì sistì (p.ex. project preliminar, procedura dal plan directiv, procedura per la permissiun da construcziun).
En il rapport sto vegnir mussà en furma d'ina resumaziun, tge prestaziun installada ch'è vegnida impedida da tge motivs principals.
Ultra da quai stoi vegnir mussà tge disposiziuns legalas che stuessan vegnir midadas per pudair tuttina realisar almain ina part da quests projects.
Cuira, ils 19 d'avrigl 2011
Kollegger (Cuira), Jeker, Aebli, Buchli-Mannhart, Campell, Casty, Clalüna, Felix, Grass, Heinz, Koch (Tumein), Komminoth-Elmer, Lorez-Meuli, Mani-Heldstab, Michael (Donat), Montalta, Niggli-Mathis (Grüsch), Papa, Parolini, Pedrini (Roveredo), Stiffler (Tavau Plaz), Tscholl, Fausch, Gugelmann, Haltiner, Müller (Haldenstein)
Resposta da la regenza
Las sutsegnadras ed ils sutsegnaders pretendan da la regenza ina glista detagliada e cumplessiva dals projects d'ovras electricas ch'èn vegnids "impedids" ils ultims 20 onns en il Grischun. Ultra da quai pretendan ellas ed els che las disposiziuns legalas che ston vegnir midadas, vegnian numnadas per pudair realisar almain ina part da projects da quest gener.
Il chantun Grischun ha mo enconuschientscha da projects da forza idraulica, per ils quals è vegnida inoltrada ina dumonda da concessiun, e d'implants da fotovoltaica e d'energia dal vent ch'èn stads planisads ordaifer las zonas da construcziun. Per implants e per tecnologias entaifer ils territoris da construcziun èn percunter las vischnancas las instanzas resp. las autoritads da permissiun responsablas. Pervia da quai n'ha il chantun betg enconuschientschas definitivas da tut ils projects d'ovras electricas betg realisads u "impedids". Ins sto er partir dal fatg che questas indicaziuns n'èn betg accessiblas publicamain e stattan per part sut la protecziun da datas.
Projects vegnan retratgs u sistids per ils motivs ils pli differents ed en differents stadis da project. Ultra da resalvas da vart da l'ecologia u da vart da la cuntrada sforzan savens ponderaziuns economicas ils investiders ed ils petents potenzials da renunziar a la realisaziun da tals projects.
Sco consequenza da l'exauriziun dals meds finanzials tar l'indemnisaziun per cuvrir ils custs da la furniziun d'electricitad (ICF) che vegnan mess a disposiziun per l'electricitad producida cun energias regenerablas èn tut las dumondas d'indemnisaziun per implants che produceschan electricitad cun forza idraulica (fin 10 megawatt), cun fotovoltaica, cun forza dal vent, cun geotermia, or da biomassa sco er or da ruments da biomassa vegnidas messas sin ina glista da spetga. Quai cun la consequenza che la realisaziun da blers da quests projects è vegnida impedida u suspendida.
Sin la glista da spetga da la societad da rait naziunala swissgrid stattan sulettamain en il Grischun tut en tut 415 projects cun ina prestaziun da totalmain 24 megawatt (MW) e cun ina producziun d'electricitad spetgada da 288 uras da gigawatt (GWh). Quai èn 39 projects dal sectur da la forza idraulica, 293 implants fotovoltaics, 82 implants d'energia dal vent ed 1 implant da biomassa. Cun avrir u cun augmentar ils meds finanzials da la ICF pudessan probablamain blers da quests implants vegnir realisads ils proxims onns.
En vista a la quantitad da directivas legalas sin plaun federal e chantunal fissi ina lavur senza speranza da vulair numnar tut las disposiziuns che stuessan vegnir midadas per pussibilitar la realisaziun da projects en il sectur da las energias regenerablas. Abstrahà dal fatg ch'i n'è betg pussaivel da numnar las singulas disposiziuns vali ultra da quai da resguardar che la cumpetenza legislativa è chaussa da differents plauns (confederaziun, chantun).
Pervia da quai resguarda la regenza la cumpilaziun d'in inventari en il senn pretendì sco er d'ina glista da tut las disposiziuns che stuessan vegnir revedidas sco nunpussaivla e betg adattada per promover pli fitg la producziun d'electricitad sin basa da funtaunas d'energia regenerabla. Empè da quai vegn il chantun a giuditgar – en il rom da l'elavuraziun da sia strategia davart la politica d'electricitad dal Grischun (cf. incumbensa Heiz, CR dals 29 da mars 2011, prot. nr. 275) – er ils potenzials da las energias regenerablas per producir electricitad ed ad elavurar directivas per la projectaziun e per la realisaziun d'implants correspundents. Uschia duai vegnir stgaffida ina basa uschè segirada sco pussaivel per ils projectants e per ils investiders per planisar e per realisar implants electrics.
Per ils motivs menziunads refusa la regenza l'incumbensa.
7 da fanadur 2011