En edifizis novs ed a chaschun dal remplazzament da vegls stgaudaments dad ieli vegnan installadas per buns motivs adina pli savens pumpas a chalur. Ellas sustegnan cunzunt las finamiras svizras dal clima (reducziun da la svapur da CO2), sminueschan dentant er la dependenza da l'exteriur da la Svizra ed èn la soluziun finanziala la pli favuraivla per patruns da construcziun che pensan a lunga vista. Il diever pli e pli frequent da pumpas a chalur chaschuna però a medem temp in consum supplementar d'energia electrica. Perquai hai num da reducir uschè ferm sco pussaivel quest consum d'electricitad.
Collecturs solars termics moderns cuntanschan in grad d'efficacitad da passa 50%, er cun ina irradiaziun dal sulegl diffusa. Il grad d'efficacitad d'implants fotovoltaics importa ca. 12%. Da quests fatgs resulta evidentamain ch'igl è bler pli effectiv e pli favuraivel da sbassar il consum d'electricitad da pumpas a chalur tras in'utilisaziun termica da l'irradiaziun dal sulegl che da producir l'electricitad cun la fotovoltaica, d'alimentar l'electricitad en la rait e da l'attribuir la finala a las pumpas a chalur. L'unica mesira raschunaivla, spert realisabla ed ultra da quai zunt economica è pia quella da promover l'utilisaziun termica da l'energia solara per sminuir il consum d'electricitad tras las pumpas a chalur. Quai vegn fatg cun accumular il surpli da l'irradiaziun dal sulegl (chalur) durant la stagiun da stad, uschia ch'il consum d'electricitad da las pumpas a chalur po vegnir sminuì fermamain l'enviern. Pumpas a chalur cun sondas geotermicas stuessan pia en il futur vegnir colliadas cun implants solars termics.
En vista a quests fatgs vegn la regenza incumbensada da cumplettar la lescha chantunala d'energia areguard la summa da las contribuziuns da promoziun per il diever da pumpas a chalur da sondas geotermicas e da las colliar a medem temp cun l'utilisaziun da l'energia solara.
Cuira, ils 16 da zercladur 2011
Pfäffli, Parolini, Tenchio, Aebli, Albertin, Augustin, Barandun, Bezzola (Samedan), Bezzola (Zernez), Blumenthal, Buchli-Mannhart (Stussavgia-Plaz), Burkhardt, Campell, Casanova-Maron, Casty, Casutt, Cavegn, Clalüna, Claus, Clavadetscher, Conrad, Della Vedova, Dosch, Engler, Fallet, Fasani, Fontana, Furrer-Cabalzar, Giacomelli, Gunzinger, Hardegger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jenny, Kasper, Kollegger (Malix), Krättli-Lori, Kunz (Fläsch), Kunz (Cuira), Lorez-Meuli, Märchy-Caduff, Marti, Meyer-Grass, Michael (Castasegna), Michel, Nick, Niggli-Mathis (Grüsch), Pedrini, Perl, Rathgeb, Righetti, Rosa, Steck-Rauch, Stiffler (Cuira), Tomaschett (Breil), Tomaschett-Berther (Trun), Troncana-Sauer, Valär, Vetsch (Claustra Vitg), Vetsch (Pragg-Jenaz), Waidacher, Wieland, Zweifel-Disch, Buchli (Favugn), Degonda, Kindschi, Paterlini, Pfister
Resposta da la regenza
Sa basond sin l'art. 20 da la lescha d'energia dal chantun Grischun (LEG) conceda il chantun contribuziuns da promoziun per duvrar l'energia solara termica e pumpas a chalur. En l'art. 40 ed en l'art. 43 da l'ordinaziun d'energia dal chantun Grischun (OEG) èn fixadas las premissas da promoziun. Las contribuziuns da promoziun per implants solars termics e per pumpas a chalur vegnan pajadas oz en moda aditiva.
L'incumbensa pretenda che la summa da las contribuziuns da promoziun per il diever da pumpas a chalur geotermicas stoppia vegnir cumbinada cun l'utilisaziun parallela da l'energia solara. Cun questa mesira duai vegnir augmentà il grad d'efficacitad da las pumpas a chalur e pia sbassà il consum da l'energia electrica. Mesiras che promovan il diever da pumpas a chalur u d'implants solars termics en moda aditiva – q.v.d. individuala – duain, tenor las explicaziuns a bucca da l'incumbensader, restar vinavant pussaivlas.
L'effect d'ina pumpa a chalur dependa essenzialmain da la temperatura da la funtauna, en il cas d'ina sonda geotermica da la temperatura utilisabla dal terren e da la temperatura precursura dal sistem da stgaudament. En Svizra datti gia implants che accumuleschan l'energia solara surabundanta da la stad en il terren, per ch'els hajan a disposiziun l'enviern temperaturas pli autas per las pumpas a chalur. Differentas cundiziuns generalas èn decisivas, per che tals implants funcziunian. Sco premissa principala basegnan ils implants edifizis gronds che dovran, per stgaudar, in champ da sondas geotermicas d'ina grondezza correspundenta cun pliras sondas geotermicas en ina distanza da 6 fin 10 meters. Las sondas geotermicas ston ultra da quai vegnir plazzadas pli bass che sondas usitadas e na dastgan betg vegnir en contact cun l'aua da funs; aua currenta purtass davent cuntinuadamain la chalur accumulada. La part superiura da las sondas sto plinavant esser munida cun ina isolaziun, perquai che uschiglio daventan las perditas a la surfatscha dominantas. Edifizis pitschens (chasas d'ina famiglia fin chasas pitschnas da pliras famiglias) dovran mo paucas sondas geotermicas per stgaudar. Perquai che la chalur mitscha en emprima lingia sur las perditas als urs da las sondas geotermicas, è l'alimentaziun d'energia solara per edifizis pitschens pia fitg inefficazia.
Il sistem che vegn proponì per producir energia è pia mo adattà per edifizis gronds che na sa chattan betg en il sectur da currents d'aua da funs. Igl è er cumbinà cun custs d'investiziun considerabels, perquai che d'ina vart èn necessarias sondas pli bassas, isoladas en lur part superiura e perquai che da l'autra vart l'implant solar sto vegnir cleramain surdimensiunà per ch'i resulta en las sondas – ultra da la chalur duvrada regularmain – chalur supplementara che po vegnir accumulada. Per edifizis cun in basegn da sfradentar è il sistem d'energia proponì però nunadattà, perquai che l'energia da sfradentar po vegnir prelevada tras sondas geotermicas en ina moda zunt effizienta. Per resumar sa mussa la proposta d'esser adattada mo per in pèr paucs edifizis.
In'ulteriura pussaivladad per reducir respectivamain per cumpensar il consum d'electricitad d'ina pumpa a chalur è il manaschi parallel d'in implant da fotovoltaica per producir electricitad. In tal implant po da princip esser en funcziun tar tut ils edifizis, il surpli d'energia vegn pia transferì senza perditas en la rait. Uschia vegn il grad d'efficacitad pli pitschen da l'implant da fotovoltaica puspè cumpensà envers ils collecturs da sulegl termics. In sustegn finanzial supplementar al program da promoziun da pumpas a chalur, dependent da l'utilisaziun parallela d'energia solara, stuess pia vegnir prendì en consideraziun er per il manaschi d'implants da fotovoltaica.
La regenza è pronta d'examinar – en il senn d'in bonus – ina promoziun pli intensiva dals implants da pumpas a chalur ch'èn cumbinads cun in'utilisaziun parallela da l'energia solara.
02 da november 2011