Ils eveniments actuals en il Giapun pretendan ina nova orientaziun da la politica d'energia tar la confederaziun, tar ils chantuns e tar las vischnancas. En quest connex stattan en il center l'effizienza energetica e las energias regenerablas. La topografia (bellezza da las muntognas) ed ils var 10 fin 20% dapli irradiaziun dal sulegl che croda sin la cuntrada dal chantun Grischun cumpareglià cun ils chantuns da la Bassa privilegeschan il chantun Grischun er en quai che concerna la producziun d'energias regenerablas. Da quest potenzial enorm profita il Grischun tar la forza idraulica. Cun l'augment accelerà da la purschida d'energia solara presta il chantun ina contribuziun supplementara impurtanta a las stentas naziunalas da desister da l'energia atomara.
Il viertgel ch'exista (anc) da l'indemnisaziun federala per cuvrir ils custs da la furniziun d'electricitad (ICF) chaschuna lungas glistas da spetga d'investiders ch'èn tranter auter pronts d'investir en l'energia solara. Actualmain èn quai circa 8'000 implants cun ina producziun projectada da circa 231 uras da gigawat (231'000'000 kWh). Da quels sa chattan ca. 200 implants dal chantun Grischun en la colonna da spetga. Quest potenzial vali da trair a niz svelt en il chantun Grischun. En media ston ins actualmain far quint cun in temp da spetga per ina ICF federala da 3 onns. Ina finanziaziun intermediara chantunala duai far remedura.
Ultra da fatschadas, d'edifizis industrials, da rempars da vias, d'edifizis d'infrastructura sco rempars da lavinas, da mirs da serra e.u.v. vegnan da princip en dumonda tut ils tetgs-chasa cun excepziun d'edifizis istorics che stattan sut la protecziun da monuments e da maletgs dal lieu protegids sco lieus per implants solars. Quai correspunda confurm al senn a las disposiziuns en la lescha federala davart la planisaziun dal territori.
L'energia solara è a 100% ina funtauna d'energia indigena. La construcziun e la gestiun da quests implants promova la valurisaziun regiunala per la mastergnanza, per l'agricultura e per il turissem er en regiuns periferas. Ultra da quai sa porschan en spezial per il turissem pussaivladads da communitgar quai cun ina connotaziun positiva.
En quest senn vegn il cussegl guvernativ incumbensà d'elavurar la basa legala per introducir en moda svelta ina indemnisaziun chantunala per cuvrir ils custs da la furniziun d'electricitad (ICCF) per electricitad solara e da la suttametter al cussegl grond per la decisiun. En quest connex duain vegnir examinads ed introducids ils suandants parameters:
- Il chantun conceda a tut las persunas che installeschan in implant solar sin ina surfatscha u sin ina infrastructura surbajegiada ina indemnisaziun chantunala per cuvrir ils custs da la furniziun d'electricitad (ICCF) sco finanziaziun intermediara tar la ICF federala.
- La premissa per survegnir ina ICCF è quella ch'ina conferma legalmain valaivla da Swissgrid è avant maun, tenor la quala l'implant è vegnì annunzià per la ICF tenor dretg federal ed ha survegnì ina plazza sin la glista da spetga.
- La ICCF vegn fixada da bel principi per 20 fin 25 pertschient pli bassa per kWh che la ICF federala. Il mument che la ICF federala vegn pajada, daventa la ICCF obsoleta.
- Il chantun procura per ina procedura simpla e nunbirocratica. En quest connex sto vegnir examinada ina soluziun, tenor la quala in unic uffizi (in uschenumnà One-Stop-Shop) duai esser cumpetent sco post da contact per tut las dumondas en connex cun l'electricitad solara.
- Per implants pitschens sut 10 kWp pon er vegnir pajadas – empè da la ICCF – contribuziuns d'investiziun da p.ex. fr. 4'000.–/kWp (model BS) che na retiran alura nagina ICF resp. che na dastgan p.ex. betg vender la plivalur ecologica durant 10 onns.
- La ICCF vegn finanziada sur in supplement sin la taxa per utilisar las raits da maximalmain 0,2 rp./kWh.
- En il senn d'ina finanziaziun intermediara e d'ina finanziaziun da partenza vegn la ICCF limitada a 5 onns e po vegnir prolungada en cas da basegn.
Cuira, ils 17 da zercladur 2011
Gasser, Joos, Kollegger (Cuira), Engler, Frigg-Walt, Gartmann-Albin, Jaag, Jenny, Kappeler, Kasper, Locher Benguerel, Lorez-Meuli, Michael (Donat), Müller, Noi-Togni, Pfenninger, Pult, Thöny, Trepp, Waidacher
Resposta da la regenza
L'incumbensa pretenda principalmain l'introducziun d'ina taxa limitada da maximalmain 0,2 raps/kWh sin la tariffa per utilisar las raits. Cun quests meds duai – en il senn d'ina finanziaziun intermediara resp. da partenza – vegnir introducida ina indemnisaziun chantunala per cuvrir ils custs da la furniziun d'electricitad (ICCF). Per implants pitschens sut 10 kWp prevesa l'incumbensa contribuziuns da promoziun en furma da contribuziuns d'investiziun. Motivà vegn quai cun il fatg ch'i dettia ina lunga glista da spetga sin plaun naziunal per l'indemnisaziun per cuvrir ils custs da la furniziun d'electricitad (ICF). Quella cuntegnia er blers implants ch'èn planisads en il chantun Grischun.
Da la ICF profiteschan – ultra d'indrizs da fotovoltaica – er implants idraulics che han ina prestaziun installada fin 10 MW, implants che tiran a niz la forza dal vent, implants geotermics ed implants da biomassa. Per motivs dal tractament egual dals differents purtaders d'energia stuessan tenor l'avis da la regenza pia er quests implants pudair profitar d'ina ICCF. Ina tala extensiun dal champ d'applicaziun per ina ICCF chaschunass senza dubi ina glista da spetga chantunala, e quai na schliass betg il problem.
In punct central dal problem è la procuraziun dals meds finanzials cun introducir ina tariffa per utilisar las raits da maximalmain 0,2 raps/kWh. Ina tala tariffa generass ina summa da circa 4 milliuns francs. L'incassament d'ina tala tariffa per utilisar las raits premetta ina basa legala.
Ils 18 da zercladur 2010 ha il parlament naziunal decidi cun la midada da la lescha d'energia ch'il cussegl federal possia augmentar il supplement dad ICF, che importa actualmain 0,45 raps/kWh, a partir da l'onn 2013 confurm al basegn sin maximalmain 0,9 raps/kWh. Uschia stattan a disposiziun per onn maximalmain circa 500 milliuns francs empè da circa 265 milliuns francs sco enfin ussa.
Ils 10 da december 2010 ha il cussegl federal alura decidì da reducir las tariffas d'indemnisaziun per electricitad solara per en media 18 %. Quai, perquai ch'il pretsch da martgà per implants da fotovoltaica è sa sbassà correspundentamain. Pervia da questa reducziun concludida èn ils custs betg cuvrids per electricitad solara – quai èn ils custs supplementars che sa chattan sur il pretsch general d'electricitad sin il martgà – crudads sut 50 raps/kWh. Tenor la lescha d'energia s'augmenta uschia la part maximala da la fotovoltaica al fond da promoziun ICF (limita sura) d'enfin ussa 5 % sin 10 %, uschia ch'i pon vegnir dads libers a partir da l'onn 2011 mintga onn implants d'electricitad solara che han ina prestaziun da totalmain 50-70 MW empè da la prestaziun accessorica da totalmain ca. 30 megawatt (MW). Uschia po la glista da spetga dals projects annunziads per implants da fotovoltaica vegnir liquidada previsiblamain fin l'onn 2013.
Sut premissas optimalas duvrass ina cumplettaziun da la lescha d'energia dal chantun Grischun (LEG) cun la basa per incassar ina tariffa chantunala per utilisar las raits almain in onn. Quest temp vegniss duvrà per ils differents pass da la procedura da legislaziun fin a l'entrada en vigur dal relasch revedì. En il meglier cas pudess la basa legala correspundenta pia vegnir introducida il cumenzament da l'onn 2013. Per quest termin vegn la ICF – tenor la decisiun dal cussegl federal – ad esser gia alimentada cun meds finanzials avunda, uschia ch'ina ICCF na vegn pia betg pli ad esser necessaria.
Per ils motivs menziunads refusa la regenza l'incumbensa.
07 da settember 2011