Ozendi è l'augment da l'effizienza in tema omnipreschent. I va per spargnar resursas, per trair a niz sinergias, per eliminar duplicitads e per stgaffir transparenza. Senza cumprova d'in augment da l'effizienza na vegn strusch persequitada vinavant ina nova idea e strusch instradà in nov project.

Las suandantas propostas èn da chapir sco impuls per la cumissiun che vegn eventualmain nominada:

1. Manaschi general dal cussegl grond

1.1 Disciplina da temp
Tenor l'urden da gestiun dal cussegl grond duran sias sesidas per regla da las 8.15 fin las 12.00 e da las 14.00 fin las 18.00. Savens vegnan las sesidas dentant cumenzadas pli tard, per resguard da las commembras e dals commembers dal cussegl grond che n'èn betg anc preschents. Consequentamain vegnan las sesidas prolungadas la saira. Il cussegl grond duai cumenzar e terminar sias sesidas cun dapli punctualitad; retardaments e prolungaziuns da las sesidas duain vegnir minimads.

1.2. Prolungaziun da las pausas / spustament dals discurs privats
Cun duas giadas 30 minutas èn las pausas relativamain curtas. Durant las sesidas dal cussegl grond chaschuna quai in viv ir e vegnir sco er blers discurs privats en sala. Ina prolungaziun da las pausas a duas giadas 45 minutas (empè da duas giadas 30 minutas) duai vegnir examinada.

1.3. Circulaziun d'intervenziuns en sala
Cur che las intervenziuns circuleschan, vegnan las commembras ed ils commembers dal cussegl grond interruts en lur lavur. Per rimnar las suttascripziuns duai vegnir ponderada ina soluziun pli effizienta u p.ex. in'exposiziun da las intervenziuns a la recepziun.

2. Andament da las fatschentas

2.1. Titulaziuns
Mintga votum vegn cumenzà cun in brimbori da titulaziuns, per part pliras giadas a di. La titulaziun duess vegnir reducida ad in minimum. Ina giada per sessiun e per oratura u oratur bastass.

2.2. Andament da la debatta d'entrada
En la debatta d'entrada discurran savens pliras e plirs u schizunt tut las commembras e tut ils commembers da la cumissiun. Plinavant vegnan puncts da la tractativa detagliada savens anticipads da la cumissiun sco er d'autras commembras e d'auters commembers dal cussegl grond. La debatta d'entrada sto vegnir cumprimida. Quai che l'oratura u l'oratur precedent ha gia ditg, na duai betg vegnir repetì.

3. Chaussas organisatoricas

3.1. Stampa / distribuziun dals documents, dals protocols e dals rapports da gestiun dal cussegl grond
Oz vegnan da princip tut ils documents tramess a las parlamentarias ed als parlamentaris per posta sin palpiri. La pussaivladad da pudair consultar ils documents en moda individuala e tenor basegn sin via electronica duai vegnir examinada.

Cuira, il 1. da settember 2011

Stiffler (Cuira), Grass, Joos, Aebli, Bezzola (Samedan), Burkhardt, Cavegn, Clalüna, Claus, Davaz, Della Vedova, Fontana, Giacomelli, Heiz, Hitz-Rusch, Holzinger-Loretz, Jenny, Kappeler, Koch (Igis), Locher Benguerel, Marti, Meyer-Grass, Michael (Castasegna), Müller (Tavau Plaz), Niggli (Samedan), Noi-Togni, Papa, Pedrini, Peyer, Pult, Steck-Rauch, Tomaschett-Berther (Trun), Trepp, Waidacher, Wieland, Zanetti, Zweifel-Disch, Rodigari