La Svizra scolescha oz main che la mesadad dal dumber d'informaticras e d'informatichers ch'il martgà da lavur dovra oz ed ils proxims onns. L'organisaziun da tetg da las professiuns da la tecnologia d'infurmaziun e da communicaziun «ICT-Furmaziun professiunala Svizra» conferma che la quota d'emprendistas e d'emprendists importa mo 3,7 pertschient en proporziun cun las emploiadas e cun ils emploiads dad ICT; quai en cumparegliaziun cun la media naziunala da 5,4 pertschient en autras branschas.
Tenor studis actuals partan ins dal fatg ch'i manchian – senza cuntramesiras – 32'000 spezialistas e spezialists dad ICT (informaticras ed informatichers, mediamaticras e mediamatichers) fin l'onn 2017 sin tut ils stgalim da qualificaziun; quai en in champ professiunal che ha ina impurtanza decisiva per la cumpetitivitad da la Svizra. La quota dal product naziunal brut da la branscha dad ICT sezza importa 5 pertschient resp. 25 milliardas francs.
La promoziun da spezialistas giuvnas e da spezialists giuvens en l'informatica èn d'ina impurtanza centrala per il svilup economic da noss chantun e da tut la Svizra. Tant l'economia privata sco er il maun public èn perquai dumandads da medema maniera d'introducir mesiras correspundentas.
La dumonda da la promoziun da spezialistas giuvnas e da spezialists giuvens sto da princip vegnir prendida per mauns sin differents stgalims. Las activitads ston cumenzar gia sin il stgalim da la scola populara e vegnir cuntinuadas sin il stgalim secundar. Realisond las mesiras planisadas duai er vegnir persequitada la finamira da svegliar l'interess da mattas e da dunnas giuvnas per las professiuns dad ICT.
Da las ponderaziuns qua survart resultan las suandantas incumbensas:
1. En il rom d'in project dad ICT che cumpiglia tut ils departaments duai il departament d'educaziun sclerir la direcziun strategica e la coordinaziun da las mesiras existentas e planisadas en il sectur dad ICT sin tut ils stgalims da la furmaziun.
2. Da vart da la regenza ston vegnir prendidas mesiras che permettan da cumbatter la mancanza da spezialistas e da spezialists dad ICT, spezialmain d'informaticras e d'informatichers. En spezial duai il chantun propagar e promover – en collavuraziun cun l'economia privata – la creaziun da plazzas d'emprendissadi correspundentas. In'attenziun speziala duai vegnir dada particularmain a mattas ed a dunnas giuvnas che vesan oz anc adina memia pauc savens ina professiun dad ICT sco lur punct da partenza professiunal.
Cuira, ils 19 d'october 2011
Kollegger (Cuira), Koch (Igis), Cavegn, Aebli, Brandenburger, Buchli-Mannhart (Stussavgia Plaz), Caluori, Campell, Candinas, Casutt, Clalüna, Clavadetscher, Conrad, Dosch, Foffa, Gasser, Jaag, Kappeler, Koch (Tumein), Mani-Heldstab, Michael (Donat), Michael (Castasegna), Müller, Niggli-Mathis (Grüsch), Noi-Togni, Papa, Parolini, Pedrini, Steck-Rauch, Tomaschett (Breil), Tscholl, Buchli (Favugn), Deplazes, Fausch, Haltiner, Liesch, Monigatti
Resposta da la regenza
La mancanza da spezialistas e da spezialists en Svizra na pertutga betg mo las informaticras ed ils informatichers, mabain cumpiglia l'entir champ da lavur tecnic sco er ils fatgs da sanadad. Pervia dal svilup demografic vegn la mancanza da spezialistas e da spezialists a daventar anc pli acuta ils proxims onns. Tenor indicaziuns da l'uffizi federal da statistica è il dumber da naschientschas vivas en Svizra sa reducì dad 82'203 (GR: 2'135) l'onn 1995 (onn da naschientscha dals giuvenils che han oz 16 onns) a 71'848 (GR: 1'689) l'onn 2003 ed è puspè s'augmentà fin l'onn 2010 ad 80'290 (GR: 1'602). Entant ch'ins ha puspè observà in augment da las naschientschas vivas ils onns 2003 fin 2010 sin plaun naziunal, sa reduceschan quests dumbers en il chantun Grischun percunter vinavant. La concurrenza areguard giuvenils cun bunas abilitads per professiuns pretensiusas e per scolaziuns da cuntinuaziun vegn a s'intensivar. En il program da la regenza 2013 – 2016 ha la regenza perquai formulà l'intenziun strategica da cuvrir – cun glieud da professiun scolada bain – il basegn da las interpresas da survegnir spezialistas e spezialists, e plinavant da rinforzar l'attractivitad dal Grischun sco lieu da scolaziun e da perscrutaziun.
Sco quai ch'igl è usità en il mund da lavur, èsi er en ils champs professiunals informatica e mediamatica chaussa da las organisaziuns correspundentas dal mund da lavur da stgaffir e da propagar plazzas d'emprendissadi. Gia dapi onns sustegna il chantun questas activitads cun differentas mesiras. Uschia survegn p.ex. il center da scolaziun d'informatica Engiadina, sco lavuratori d'emprendissadi, mintga onn subvenziuns considerablas per pudair garantir la scolaziun da spezialistas e da spezialists dad ICT en Engiadina. Per propagar plazzas d'emprendissadi da mediamatica ha il chantun plinavant puspè dischlocà il lieu da la scola professiunala spezialisada dad Uzwil a Cuira, ed el ha collavurà cun l'economia en connex cun las stentas da stgaffir plazzas d'emprendissadi supplementaras. Sur ses chanals d'infurmaziun e da documentaziun en la cussegliaziun professiunala ed en la surveglianza da la furmaziun professiunala sustegna il chantun er vinavant ils sforzs da l'economia. In project autonom ICT sut la responsabladad dal chantun cuntrafaschess dentant al princip dal tractament egual visavi autras branschas cun il medem interess.
Per pudair motivar dapli dunnas giuvnas per professiuns tecnicas ha il chantun sustegnì ils onns passads differents projects, sco p.ex. "Mädchen-Informatik-los!" u inputs da studi e da carriera per professiuns da scienza natirala en gimnasis. Il chantun examinescha projects per entusiasmar dapli dunnas per professiuns tipicas d'umens e viceversa.
Plinavant constatescha il studi "Generaziun giuvna d'inschigners en Svizra 2011" che mintga quarta maturitad professiunala è oz ina maturitad professiunala tecnica e che las maturitads professiunalas tecnicas sa chattan pia – suenter las maturitads professiunalas commerzialas – a la segunda plazza.
En tut la Svizra vegn actualmain elavurà il Plan d'instrucziun 21. Quel cuntegna il champ da cumpetenzas "ICT e medias" cun prescripziuns correspundentas per l'instrucziun en la scola populara. Previsiblamain l'onn 2014 vegn il Plan d'instrucziun 21 dà liber per l'introducziun en ils chantuns. Perquai na fissi betg cunvegnent, sch'il chantun Grischun sviluppass atgnas prescripziuns dad ICT per la scola populara.
La regenza prenda posiziun sco suonda davart las incumbensas parzialas, ed ella è pronta d'acceptar l'incumbensa en il senn da questas explicaziuns:
1. Resguardond l'urari per l'introducziun dal Plan d'instrucziun 21 vegni elavurà in rapport per mauns dal cussegl grond. Quest rapport cuntegna in'analisa da la situaziun e recumandaziuns d'agir. Il rapport sto cuntegnair ina cumparegliaziun cun la situaziun en ils chantuns vischins e sto resguardar l'egualitad tranter dunna ed um.
2. Cun las mesiras gia prendidas cuntinuescha il chantun en collavuraziun cun las organisaziuns dal mund da lavur, e l'interess da dunnas giuvnas per professiuns tecnicas duai vegnir promovì er vinavant.
15 da december 2011