L'emna passada ha la Viafier retica communitgà ch'il 5 milliunavel vehichel è vegnì transportà. Il tunnel dal Veraina è ina istorgia da success per tuts. Ma er questa istorgia ha sias varts negativas. Venderdi, ils 6 da schaner 2012, è il traffic sa stagnà sur plirs kilometers sin la via d'Engiadina en direcziun da Sagliains. Per motivs da segirezza ha il pass dal Güglia stuì vegnir serrà, uschia che tut il traffic da l'Engiadin'ota è ì en direcziun dal Veraina e da l'Engiadina bassa. Questa situaziun extraordinaria ha chaschunà temps da spetga da pliras uras. La situaziun è daventada anc pli critica il proxim di (sonda, ils 7 da schaner 2012), perquai ch'il traffic massiv dal e per il Livign è anc vegnì vitiers. Ultra da quai è la via tranter Zernez e Brail vegnida serrada pervia da privel da lavinas. Uschespert che las zonas da spetga dal transport d'autos tras il Veraina èn plainas, stagnescha il traffic sin la via d'Engiadina, uschia ch'i n'è betg pli pussaivel dad ir vinavant.
Cun ina dumonda dal deputà Stiffler (Tavau) l'onn 2008 è la regenza vegnida rendida attenta als problems da la stagnaziun dal traffic da la vart dal nord e da la vart dal sid dal tunnel dal Veraina. En il nord èn vegnidas prendidas mesiras. En il sid è – tenor las enconuschientschas actualas – vegnì fatg pauc.
Nossas dumondas a la regenza:
1. Èn – suenter la dumonda Stiffler (Tavau) – vegnidas prendidas mesiras a Sagliains cunter las stagnaziuns dal traffic che impedeschan la circulaziun dal traffic sin la via d'Engiadina?
2. Tge quinta la regenza da far per evitar resp. per mitigiar la bloccada sin la via d'Engiadina a Sagliains sid che resulta da la stagnaziun dal traffic?
3. Datti la pussaivladad d'engrondir las zonas da spetga a Sagliains?
4. Datti la pussaivladad da crear ulteriuras zonas da spetga (model ovras electricas d'Engiadina/tunnel a Livign)?
Cuira, ils 15 da favrer 2012
Bezzola (Zernez), Stiffler (Tavau Plaz), Parolini, Aebli, Berther (Camischolas), Bezzola (Samedan), Blumenthal, Bondolfi, Brandenburger, Buchli-Mannhart, Burkhardt, Casanova-Maron, Casty, Casutt, Cavegn, Clavadetscher, Conrad, Dermont, Dosch, Engler, Foffa, Furrer-Cabalzar, Grass, Gunzinger, Hardegger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jeker, Jenny, Joos, Kasper, Komminoth-Elmer, Kunz (Cuira), Lorez-Meuli, Märchy-Caduff, Meyer-Grass, Michael (Donat), Michael (Castasegna), Michel, Niederer, Niggli-Mathis (Grüsch), Perl, Pfäffli, Rosa, Tenchio, Tomaschett (Breil), Troncana-Sauer, Vetsch (Claustra Vitg), Wieland, Bundi, Degonda, Epp, Hauser, Menghini, Motti, Patt, Schucan
Resposta da la regenza
Il tunnel dal Veraina vegn stimà fitg. Per onn profitan var 500'000 vehichels da questa pussaivladad da transport. Cun questas grondas frequenzas arrivan las capacitads da chargiada a lur cunfins a dis cun fitg bler traffic, en spezial, sche autras colliaziuns da traffic han problems.
Sin basa d'in rapport d'examinaziun da l'onn 2005 ha la Viafier retica (VR) gia examinà differentas mesiras per augmentar la prestaziun da la staziun da chargiada Sagliains ed er realisà singulas da quellas. Malgrà questas mesiras po il temp da spetga importar fin a 120 minutas a 10 fin 15 dis per onn. Per motivs economics n'èsi strusch pussaivel d'augmentar las capacitads, uschia che quai na vegn betg pli ad esser il cas en l'avegnir. Perquai è la VR sa stentada da meglierar ils dus secturs, nua ch'il traffic stagnescha al nord ed al sid per reducir las consequenzas negativas per l'ulteriura rait da vias en cas da situaziuns extremas. En in emprim pass è l'access nà da Zernez vegnì engrondì cun in agen vial d'access. Il medem mument è vegnì construì in vial da spetga per quest spartavias che ha plazza per var 15 autos. Questa mesira ha per consequenza che la situaziun sin la via chantunala è daventada bler pli segira e che la capacitad da spetga ha pudì vegnir meglierada levamain. La via chantunala è vegnida bloccada dapi quest mument maximalmain dus dis per onn. Da la vart da nord è il spazi da spetga vegnì engrondì l'onn 2010 uschia che dus ulteriurs vials da spetga pon vegnir mess a disposiziun sin l'areal da spetga. Quai correspunda circa ad ina capacitad da dus trens per transportar autos. Uschia hai pudì vegnir evità dapi lura che er fitg grondas affluenzas da vehichels blocheschan la via chantunala resp. naziunala.
L'enviern passà è crudada extraordinariamain blera naiv e perquai hai er dà relaziuns fitg precaras sin via. Quai ha chaschunà che la purschida da chargiar il vehichel sin il tren al tunnel dal Veraina è stada dumandada anc pli fitg. Cun excepziun d'in di èn las mesiras prendidas sa cumprovadas e la rait da vias cunfinanta n'è betg vegnida tangada.
Tar las dumondas tschentadas:
1. L'access nà da Zernez è vegnì engrondì cun in agen vial d'access. Il medem mument è vegnì construì in vial da spetga per var 15 autos.
2. Il favrer 2012 han la corporaziun regiunala Pro Engiadina bassa, la VR e la polizia chantunala dal Grischun discutà differentas propostas per meglierar la situaziun. In'idea è da construir in areal da spetga supplementar tranter Zernez e Sagliains.
3. Per engrondir l'areal da spetga a Sagliains fissi imaginabel da far in terz vial da spetga. Quai pretendess dentant la construcziun d'elements da sustegn cumplexs. Quai fiss ina gronda sfida tecnica. Ils custs d'investiziun previs da var 2,3 milliuns francs na laschassan betg sa giustifitgar cun motivs da l'economia da manaschi en vista al dumber relativamain pitschen dals dis da grond traffic cun temps da spetga.
4. La construcziun d'ulteriurs areals da spetga per il traffic nà da Zernez vegn examinada actualmain.
23 d'avrigl 2012