L'incumbensa prenda l'acceptaziun da l'iniziativa cunter las abitaziuns secundaras sco motiv per pretender da promover investiziuns en indrizs fotovoltaics.

Il dretg fiscal federal armonisà accepta duas pussaivladads per il tractament fiscal dals custs per indrizs fotovoltaics:

- La taglia federala directa tracta las investiziuns en energias regenerablas tar edifizis existents tuttina sco ils custs per il mantegniment da l'immobiglia e permetta la deducziun da quests custs. En cas d'edifizis novs n'è la deducziun betg pussaivla. Il gudogn che resulta da la vendita da l'electricitad producida cun l'indriz fotovoltaic è in'entrada ch'è suttamessa a la taglia.
- La soluziun grischuna è quella, ch'il gudogn che resulta da la vendita da l'electricitad producida cun l'indriz fotovoltaic vegn qualifitgà sco entrada. L'entrada vegn dentant sutta-messa a la taglia mo, sch'il gudogn cumulà surpassa ils custs d'investiziun. Ina deducziun directa dals custs per l'indriz fotovoltaic n'è ni pussaivla ni necessaria en quest sistem. La soluziun grischuna funcziuna en cas d'edifizis novs tuttina bain sco en cas d'edifizis existents e dal princip constituziunal fundamental da l'imposiziun da taglia tenor la capacitad economica vegni tegnì quint en moda optimala.

Il dretg fiscal federal armonisà lascha decider ils chantuns d'introducir ina deducziun per mesiras per spargnar energia (art. 9 al. 3 da la lescha federala davart l'armonisaziun da la taglia directa dals chantuns e da las vischnancas, CS 642.14). Sch'il chantun vul introducir ina tala deducziun, sto quella vegnir concepida stringentamain tuttina sco tar la taglia federala directa; ella dastga vegnir applitgada mo per edifizis existents. Tras questa deducziun vegnissan ils custs, che ston vegnir qualifitgads sco investiziuns che augmentan la valur, tractads tuttina sco ils custs che mantegnan la valur. Ils custs dastgassan pia vegnir deducids da la taglia.

La finamira da l'incumbensa èsi da midar a la soluziun da la taglia federala directa. Ella vul pia realisar l'onn d'investiziun ina deducziun dals custs d'investiziun per la promoziun fiscala d'indrizs fotovoltaics. La regenza ha adina exprimì sia opiniun ch'il dretg fiscal n'è betg adattà per cuntanscher finamiras directivas extrafiscalas, e quai per differents motivs. Pervia da las tariffas da taglia progressivas han mesiras fiscalas tut tenor la grevezza fiscala marginala in effect fitg different. Qua tras po resultar in subvenziunament da dimensiun fitg differenta, malgrà ils medems custs. Ils custs da mesiras directivas en il dretg fiscal na vegnan betg budgetads, betg eruids e betg controllads. Quai dastgass er esser il motiv per lur popularitad. Las mesiras da promoziun na vegnan er betg messas en dumonda periodicamain. Ed en connex cun mesiras da spargn na vegnan questas mesiras regularmain betg resguardadas. Er la dimensiun da las mesiras directivas, q.v.d. il dumber dals indrizs fotovoltaics, na po betg vegnir dirigì, perquai ch'ils custs correspundents vegnan simplamain deducids en la decleraziun da taglia. Ultra da quai manca ina controlla da l'effect da las mesiras directivas, perquai che l'autoritad ch'è responsabla per la finamira directiva na surpiglia nagins custs e perquai che l'administraziun da taglia n'è ni responsabla ni en il stan d'examinar las consequenzas da finamiras extrafiscalas. E la finala reduceschan questas mesiras directivas l'entrada ch'è suttamessa a la taglia, cun la quala èn colliadas ozendi las prestaziuns las pli differentas (reducziun individuala da las premias, stipendis, pajaments directs a l'agricultura, taxa per la canorta d'uffants pitschens e.u.v.).

La regulaziun vertenta concernent ils indrizs fotovoltaics tegna quint en moda optimala dal princip da l'imposiziun da taglia tenor la capacitad economica. Sche la politica vul prender ulteriuras mesiras da promoziun, stuessan quellas vegnir realisadas ordaifer il dretg fiscal. La regenza propona perquai da refusar l'incumbensa Kappeler.

20 da zercladur 2012