Dumonda da la fracziun da la PS concernent il project per la zona d'industria a San Vittore
Sessiun: 18.04.2012
En la vischnanca da San Vittore è planisada ina zona d'industria d'impurtanza chantunala cun ina surfatscha da circa 180'000 m². Il project pertutga il territori da l'anteriura plazza aviatica ch'è actualmain en possess dad armasuisse. La populaziun da San Vittore ha survegnì dubis areguard quest project, cunzunt dal puntg da vista da la protecziun da l'ambient e da la cuntrada.
Sin fundament da quests dubis e da malsegirezzas è pia vegnida lantschada ina petiziun cunter il project ed è vegnida fundada in'uniun per la protecziun da la planira da San Vittore.
Intgins aspects dal project n'èn anc betg clers. Els duain vegnir sclerids cun las suandantas dumondas:
1. Tge motivs pledan per in project d'ina tala grondezza (ca. 180'000 m²)?
2. Igl è enconuschent che la concentraziun da pulvra fina a San Vittore ed en la part sut da la Mesolcina è ina da las pli autas en Svizra. Na ristgan ins betg da pegiurar la situaziun e da periclitar la sanadad da la populaziun indigena cun domiciliar novas industrias? N'ha l'uffizi per la natira e l'ambient betg examinà la situaziun e proponì eventualas mesiras preventivas?
3. Dacurt ha il sviluppader regiunal Moritz Piller declerà ch'i vegnian applitgads criteris per manaschis che vulan sa domiciliar al lieu, per uschia garantir la domiciliaziun da manaschis cun in gronda valurisaziun. Da tge criteris sa tracti? Co vegn controllada l'applicaziun da quests criteris? Tge tips da manaschis fissan ideals?
4. Quant grond è il dumber stimà da plazzas da lavur che vegnan stgaffidas da nov? Da tge tip da plazzas da lavur novas sa tracti: relaziun da lavur temporara, relaziun da lavur malsegira u plazzas da lavur fixas cun salaris en l'autezza da la media svizra?
5. Ina da las finamiras da la regiun Mesolcina e da la nova uniun da turissem èsi da promover il turissem en la Mesolcina. N'èsi alura betg deplazzà en quest reguard da domiciliar novas industrias en la vischinanza dal territori d'abitar?
6. Sa cunfa in tal project cun la finamira d'ina collavuraziun pli stretga cun il chantun Tessin vischin per promover il svilup economic? N'exista betg la ristga da promover la concurrenza tranter ils dus chantuns areguard la domiciliaziun da manaschis e da periclitar uschia la collavuraziun?
Cuira, ils 18 d'avrigl 2012
Thöny, Baselgia-Brunner, Bucher-Brini, Frigg-Walt, Gartmann-Albin, Jaag, Müller, Noi-Togni, Peyer, Pfenninger, Pult, Trepp, Deplazes, Hensel, Michel (Igis), Monigatti
Resposta da la regenza
Ils quitads da la populaziun da San Vittore areguard il project ston vegnir prendids serius. La populaziun po vegnir infurmada davart il concept previs per sviluppar ina zona da plazzas da lavur (nagina industria greva), uschespert ch'igl è avant maun ina chapientscha communabla da tut las acturas principalas e da tut ils acturs principals areguard il concept da realisaziun ed uschespert ch'igl è vegnì sutsegnà in document da basa, l'uschenumnà "Memorandum of Understanding". Ils discurs en chaussa èn actualmain anc en curs.
Tar la dumonda 1: L'engrondiment – teoreticamain pussaivel, acceptabel dal puntg da vista da la planisaziun dal territori ed oriundamain er prendì en mira – da la zona existenta da plazzas da lavur importa circa 40 ha. Il perimeter dal project da svilup è vegnì reducì – en enclegientscha cun la vischnanca da San Vittore e cun la regiun Mesolcina – a circa 18 ha. La grondezza tschernida è il resultat d'ina consideraziun dals interess tranter las differentas gruppas participadas. Ma i dovra dentant ina tscherta grondezza minimala, per ch'ils custs d'avertura per m2 stettian en ina relaziun economicamain raschunaivla e supportabla. L'utilisaziun da la zona vegn realisada en etappas raschunaivlas.
Tar la dumonda 2: L'uffizi per la natira e l'ambient (UNA) è involvì tant en il rom dal svilup dal project sco er en connex cun la consultaziun tar la revisiun parziala da la planisaziun locala. Ord vista da la protecziun da l'ambient n'èn betg vegnids constatads criteris d'exclusiun per realisar il project. Il motiv principal per la grevezza da pulvra fina n'èn betg ils manaschis domiciliads, mabain las nundumbraivlas pitschnas pignas privatas da laina. Tut ils pass che vegnan instradads per concretisar las proximas proceduras da planisaziun dal territori e las futuras proceduras per la permissiun da construcziun ston correspunder a las prescripziuns legalas vertentas, sco p.ex. er a l'ordinaziun davart la protecziun da l'aria.
Tar la dumonda 3: Da princip duain vegnir permess mo manaschis cun activitads productivas u interpresas da servetsch che stattan datiers da la producziun. Da preferir èn interpresas orientadas a la tecnologia, innovativas, cun paucas immissiuns sco er activas en moda persistenta. Da princip n'èn betg giavischadas utilisaziuns che basegnan bler terren e che porschan mo in pitschen dumber da plazzas da lavur, sco magasins, negozis, manaschis da logistica, plazzas da deposit e chaussas sumegliantas. Ils criteris d'utilisaziun vegnan fixads en il "Memorandum of Understanding". Quest document è en lavur e vegn sutsegnà da la confederaziun svizra, dal chantun Grischun, da la vischnanca politica da San Vittore e da la regiun Mesolcina. L'instituziun responsabla che sto vegnir fundada e controllada dal chantun, da la regiun Mesolcina e da la vischnanca da San Vittore vegn a survegliar che quests criteris d'utilisaziun vegnian applitgads.
Tar la dumonda 4: Il dumber da las plazzas da lavur che ston vegnir stgaffidas da nov è grev da stimar. I vegn empruvà da stgaffir uschè bleras plazzas da lavur persistentas sco pussaivel. Previsas èn plazzas da lavur cun salaris sco ch'els èn usitads al lieu ed en la regiun.
Tar la dumonda 5: Il concept directiv per l'economia dal Grischun 2010 prevesa d'exaurir ils potenzials da svilup ch'èn avant maun. Questa finamira pretenda ina politica economica che tegna quint da las differentas premissas dals lieus. La part sut da la Mesolcina è fitg attractiva per domiciliaziuns d'industria. En spezial il territori al sidvest da San Vittore è remartgà en il plan directiv chantunal sco zona da plazzas da lavur per utilisaziuns che dovran ina gronda surfatscha. La promoziun dal turissem en ils territoris da la regiun Mesolcina ch'èn adattads per quest intent na vegn betg periclitada da questa industria. Il cuntrari, la concentraziun da las domiciliaziuns industrialas en l'aglomeraziun da Bellinzona permetta d'utilisar en moda optimala il turissem en il rest da la Mesolcina.
Tar la dumonda 6: Cun il conclus da la regenza dals 31 d'avust 2010 (protocol nr. 807) ha la regenza decidì d'accordar il svilup da l'economia locala cun il chantun Tessin. En il nov program da realisaziun dal Grischun 2012 – 2015 per la nova politica regiunala è questa accordanza previsa en il rom da la collavuraziun interchantunala. Il concept da collavuraziun vegn elavurà actualmain. La finamira da quest concept è da dar ina infurmaziun vicendaivla, da chattar sinergias potenzialas e d'impedir ina concurrenza malsauna sin il champ communabel e funcziunal.
11 da zercladur 2012