Il potenzial da la fotovoltaica vegn inditgà en in studi da potenzial da l'uffizi d'energia e da traffic (UEnTr) da l'onn 2011, che vegn cità en il rapport davart la politica d'electricitad dal chantun Grischun, cun 200 GWh/a. Questa valitaziun para a las sutsegnadras ed als sutsegnaders dad esser memia pessimistica. La calculaziun sa basa sin ina valur per persuna dad 1 MWh per abitant(a) ed onn. Quai na po dentant strusch esser la valur gista per il chantun Grischun. Uschia vegnan edifizis gronds, indrizs e surfatschas libras en las muntognas resguardads memia pauc fin insumma betg.
Perquai vegn la regenza incumbensada d'elavurar in cataster solar per ils edifizis publics ch'èn adattads per la forza dal sulegl e da fixar las cundiziuns generalas per la gestiun tras terzas persunas. Ultra da quai duai la planisaziun dal territori per l'utilisaziun solara da surfatschas libras en las muntognas vegnir prendida per mauns.
Cuira, ils 30 d'avust 2012
Joos, Kollegger (Cuira), Kasper, Baselgia-Brunner, Berther (Camischolas), Blumenthal, Bucher-Brini, Caduff, Caluori, Casutt-Derungs, Cavegn, Darms-Landolt, Dosch, Fallet, Foffa, Frigg-Walt, Gartmann-Albin, Geisseler, Jaag, Kollegger (Malix), Locher Benguerel, Märchy-Caduff, Michael (Donat), Niederer, Papa, Parolini, Parpan, Pedrini (Roveredo), Peyer, Pfenninger, Pult, Tomaschett (Breil), Trepp, Zanetti, Degonda, Michel (Igis)
Resposta da la regenza
Il potenzial realistic per augmentar la producziun d'electricitad cun fotovoltaica vegn inditgà en il rapport davart la politica d'electricitad dal chantun Grischun cun 200 uras da gigawat per onn (vesair la missiva da la regenza, carnet nr. 6/2012 - 2013, 347 s.). Cuntrari ad autras tecnologias na pon ins betg far quint tar la producziun d'electricitad sin basa solara ch'il potenzial possia effectivamain vegnir realisà entaifer paucs onns. La producziun d'electricitad sin basa solara vegn limitada en emprima lingia da la creschientscha e betg da las resursas. Ultra da quai duain implants da fotovoltaica en il territori surbajegià (tetgs, fatschadas) vegnir privilegiads envers implants sin surfatschas libras, perquai n'èn ils implants da fotovoltaica sin surfatschas libras betg resguardads en la calculaziun dal potenzial.
L'incumbensa pretenda ch'il chantun duai elavurar in cataster solar per ils edifizis publics ch'èn adattads per la forza dal sulegl e ch'el fixeschia las cundiziuns generalas per la gestiun tras terzas persunas. Ultra da quai duain vegnir prendidas mesiras da la planisaziun dal territori per l'utilisaziun solara da surfatschas libras en las muntognas.
Il chantun ha l'intent d'eruir il potenzial pussaivel per producir electricitad cun la forza dal sulegl sin ils agens edifizis chantunals pli gronds. Ins po partir dal fatg che – sin basa da quest scleriment – surfatschas adattadas sin tetgs pon vegnir surlaschadas a terzas persunas per l'utilisaziun. Sco basa per quai ston vegnir elavuradas las cundiziuns generalas necessarias per il manaschi. I n'è percunter betg previs d'extender l'eruida dal potenzial sin ulteriurs edifizis publics, p.ex. da las vischnancas, dals stabiliments chantunals.
Ensemen cun la Scola auta per tecnica a Buchs (NTB) e cun ulteriurs partenaris examinescha l'uffizi d'energia e da traffic actualmain da stgaffir in cataster solar per il chantun Grischun. La basa da las datas per elavurar in cataster solar per l'entir territori chantunal na basta mumentanamain dentant anc betg. Mo en paucs cas èn avant maun las datas necessarias per territoris parzials La lavur per metter a disposiziun datas segiradas per l'entir chantun dovra bler temp e custa bler. Perquai èsi per il mument mo pussaivel d'eruir il potenzial cun tschertas restricziuns.
L'uffizi federal d'energia (UFE) ha l'intenziun da metter a disposiziun in cataster solar per tut la Svizra. I na sa tracta qua betg d'in cataster solar sco tal, mabain d'in instrument che pussibilitescha da renconuscher il potenzial. Quest instrument cuntegna la radiaziun, cun la quala i po vegnir fatg quint sin la surfatscha inclinada dal tetg (medias da 10 onns). En il portal SIG da la confederaziun vegnan ils potenzials ad esser preschentads sco agens layers ed a star gratuitamain a disposiziun a la publicitad. L'UFE fa quint ch'il cataster possia vegnir mess a disposiziun online per la segunda mesadad da l'onn 2013.
La prioritad ha la realisaziun d'implants solars sin surfatschas surbajegiadas. Da quest princip na vegni betg devià. Implants solars sin surfatschas libras na vegnan però betg exclus a priori. Tals projects duain vegnir tractads per sasezs sco cas singuls. Ina mesira da la planisaziun dal territori per l'utilisaziun solara da surfatschas libras en las muntognas n'è betg previsa.
La regenza è pronta d'acceptar l'incumbensa cun las restricziuns menziunadas.
22 d'october 2012